2 Samuel 6:16 - Li Santil hu

¹⁶ Nak yo̱queb chirocsinquil li Lokꞌlaj Ca̱x Jerusalén, saꞌ lix tenamit laj David, lix Mical lix rabin laj Saúl yo̱ chi iloc saꞌ li ventana. Nak quiril nak laj David yo̱ chi xajoc ut yo̱ chi piscꞌoc re xqꞌuebal xlokꞌal li Ka̱cuaꞌ, xicꞌ quirecꞌa.

Q'eqchi Bible

¹⁶ Naq li xLoq'laj Kaax li Qaawa' ki'ok sa' xTenamit laj David, lix Mikal, xrab'in laj Saúl, yo chi ilok sa' b'entaan, ut naq kiril li awab'ej yo chi pisk'ok ut xajok chiru li Qaawa', kixtz'eqtaana sa' li xch'ool.

2 Samuel 6:16 ပူးပေါင်းရင်းမြစ်များ

1 Corintios 2:14

Li ani ma̱cꞌaꞌ li Santil Musikꞌej riqꞌuin incꞌaꞌ naxcꞌu̱luban lix ya̱lal li naxcꞌut li Santil Musikꞌej. Aꞌan to̱ntil naꞌleb chiru xban nak incꞌaꞌ naxtau ru. Caꞌaj cuiꞌ li ani cuan li Santil Musikꞌej riqꞌuin naru tixtau ru xban nak li Santil Musikꞌej aꞌan li nacꞌutuc re lix ya̱lal chiru.

1 Crónicas 15:29

Nak yo̱ chi cuulac saꞌ lix tenamit laj David li Lokꞌlaj Ca̱x, lix Mical lix rabin laj Saúl qui-iloc saꞌ li ventana. Quiril nak laj David yo̱ chi piscꞌoc ut yo̱ chi xajoc xban xsahil xchꞌo̱l. Ut quichal xjoskꞌil saꞌ xbe̱n.

Salmos 69:7

At inDios, saꞌ a̱cꞌabaꞌ la̱at nincꞌul raylal ut nincꞌul hobecꞌ ut nequeꞌxcꞌut inxuta̱n riqꞌuin li nequeꞌxba̱nu cue.

Hechos 2:13

Cuanqueb ajcuiꞌ yo̱queb chi hoboc ut yo̱queb chixyebal: —Ma̱re teꞌcala̱k, chanqueb.

2 Samuel 3:14

Ut laj David quixtaklaheb lix takl riqꞌuin laj Is-boset, li ralal laj Saúl re teꞌxye re: —Kꞌaxtesi cuiꞌchic cue lix Mical, li cuixakil xban nak la̱in ac xintoj rix riqꞌuin jun ciento ruꞌuj xtzꞌejcualeb li cui̱nk aj filisteo, chan.

Isaías 53:3

Xicꞌ qui-ileꞌ ut quitzꞌekta̱na̱c xbaneb li cuanqueb saꞌ ruchichꞌochꞌ. Junes rahil chꞌo̱lejil quixcꞌul ut quixcuy li rahobtesi̱c. Ma̱ ani quiraj iloc re. Quikatzꞌekta̱na ut ma̱cꞌaꞌ na-oc cuiꞌ chiku nak quikil.

2 Samuel 5:7

Usta ac cauresinbil chi us li tenamit, abanan laj David quinumta saꞌ xbe̱neb ut qui-oc saꞌ li naꞌajej Sión. Toj chalen anakcuan “Xtenamit laj David” nayeheꞌ re li naꞌajej aꞌan.

2 Samuel 6:15

Chi joꞌcaꞌin laj David ut chixjunileb li ralal xcꞌajol laj Israel queꞌxcꞌam li Lokꞌlaj Ca̱x. Yo̱queb chixjapbal reheb xban xsahil xchꞌo̱leb ut yo̱queb chixya̱basinquil lix trompeta.

2 Samuel 6:20

Ut laj David co̱ saꞌ rochoch chixtzꞌa̱manquil chiru li Dios nak ta̱rosobtesiheb li cuanqueb saꞌ li rochoch. Lix Mical qui-el chixcꞌulbal ut quixhob ut quixye re: —Anakcuan qꞌuebil chic a̱lokꞌal, at rey, riqꞌuin li cꞌaꞌru xaba̱nu chiruheb li ixk, lix mo̱seb li nequeꞌcꞌanjelac cha̱cuu. Riqꞌuin li cꞌaꞌru xaba̱nu, xacꞌutbesi a̱cuib joꞌ nequeꞌxba̱nu li incꞌaꞌ nequeꞌxnau xuta̱nac, chan.

1 Samuel 18:17

Saꞌ jun li cutan laj Saúl quixye re laj David: —La̱in tinqꞌue lix Merab, li xbe̱n inrabin, chokꞌ a̱cuixakil. Caꞌaj cuiꞌ li nacuaj la̱in nak cauhak a̱chꞌo̱l chi pletic saꞌ xcꞌabaꞌ li Ka̱cuaꞌ, chan. Laj Saúl quixye saꞌ xchꞌo̱l: —Ma̱cuaꞌ la̱in tincamsi̱nk re laj David. Aꞌaneb ban laj filisteo teꞌcamsi̱nk re, chan saꞌ xchꞌo̱l.

1 Samuel 18:20

Ut lix Mical, lix rabin jun chic, quixra laj David. Quiyeheꞌ resil re laj Saúl nak lix Mical naxra laj David. Ut quixcꞌul xchꞌo̱l laj Saúl nak quirabi.

Salmos 123:3

Chacuil taxak xtokꞌoba̱l ku, at nimajcual Dios. Chacuuxta̱na ku xban nak incꞌaꞌ chic nakacuy xnumsinquil li raylal li yo̱queb xba̱nunquil ke.