2 Samuel 24:16 - Li Santil hu

¹⁶ Oc raj re chixsachbal ru li tenamit Jerusalén lix ángel li Dios, abanan quiyotꞌeꞌ xchꞌo̱l li Dios chirilbal li raylal yo̱queb chixcꞌulbal. Ut li Dios quixye re li ángel li yo̱ chi camsi̱nc reheb: —Tzꞌakal li xaba̱nu. Ma̱rahobtesiheb chic, chan. Saꞌ li ho̱nal aꞌan lix ángel li Dios cuan chire li naꞌajej li narisi cuiꞌ rix li trigo laj Arauna laj jebuseo.

Q'eqchi Bible

¹⁶ Ut naq li ánjel kixye' li ruq' sa' xb'een Jerusalén re xsachb'al, kiyot'e'k xch'ool li Qaawa' chi xtaqlankil li rahilal a'an, ut kixye re li ánjel li yo chi sachok: “Tz'aqal li xab'aanu. Maarahob'tesiheb' chik”, chan. Sa' li honal a'an li x'ánjel li Qaawa' wank chi xk'atq xch'oxleb'aal laj Arawná aj Jebús.

2 Samuel 24:16 ပူးပေါင်းရင်းမြစ်များ

Éxodo 12:23

Li Dios ta̱numekꞌ saꞌ li junju̱nk chi cab chi rakoc a̱tin saꞌ xbe̱neb laj Egipto. Nak ta̱ril li quicꞌ saꞌ xbe̱n li puerta ut chiru li cuib chi cheꞌ li cuan saꞌ xcaꞌ pacꞌalil li puerta, li Ka̱cuaꞌ Dios ta̱numekꞌ saꞌ li puerta aꞌan ut tixram lix be laj camsinel re nak incꞌaꞌ ta̱oc saꞌ le̱ rochoch chi camsi̱nc.

Génesis 6:6

Ut quiyotꞌeꞌ xchꞌo̱l li Dios nak quixyi̱beb li cristian saꞌ ruchichꞌochꞌ ut cꞌajoꞌ nak quirahoꞌ saꞌ xchꞌo̱l.

Hechos 12:23

Ut saꞌ ajcuiꞌ li ho̱nal aꞌan, jun x-ángel li Ka̱cuaꞌ quixqꞌue jun yajel saꞌ xbe̱n laj Herodes xban nak quixqꞌue rib chixlokꞌoniheb li tenamit ut incꞌaꞌ quixqꞌue xlokꞌal li Dios. Quimotzoꞌin ut aꞌan quicamsin re.

2 Crónicas 3:1

Laj Salomón quixtiquib xyi̱banquil lix templo li Ka̱cuaꞌ aran Jerusalén saꞌ li tzu̱l Moriah saꞌ li naꞌajej li quixcꞌutbesi cuiꞌ rib li Ka̱cuaꞌ chiru laj David lix yucuaꞌ. Li naꞌajej aꞌan, aꞌan li naꞌajej li quirisi cuiꞌ rix lix trigo laj Ornán aj jebuseo, li ac cauresinbil xban laj David re xyi̱banquil li templo.

2 Reyes 19:35

Saꞌ ajcuiꞌ li kꞌojyi̱n aꞌan jun x-ángel li Dios quicuulac saꞌ xmuheba̱leb laj Asiria ut quixcamsi jun ciento riqꞌuin o̱b roxcꞌa̱l mil (185,000) chi soldado aj Asiria. Joꞌ cuulajak chic nak quisake̱u ac camenakeb chic chixjunil.

1 Samuel 15:11

—Incꞌaꞌ sa saꞌ inchꞌo̱l riqꞌuin laj Saúl. Incꞌaꞌ raj xinqꞌue chokꞌ xreyeb laj Israel. Quinixtzꞌekta̱na ut quixkꞌet lin chakꞌrab, chan. Qui-oc xcꞌaꞌux laj Samuel ut quixnumsi li kꞌojyi̱n aꞌan chi tijoc chiru li Ka̱cuaꞌ.

2 Crónicas 32:21

Ut li Ka̱cuaꞌ Dios quixtakla jun li ángel re tixsach ruheb li cauheb rib chi pletic joꞌ eb ajcuiꞌ li nequeꞌcꞌamoc be saꞌ xya̱nkeb ut li nequeꞌtaklan saꞌ xbe̱neb lix soldado lix reyeb laj Asiria. Ut lix reyeb laj Asiria quisukꞌi saꞌ lix tenamit chi yo̱ xxuta̱n. Nak qui-oc saꞌ lix templo lix dios, eb li ralal queꞌxcamsi chi chꞌi̱chꞌ.

2 Corintios 2:6

Tzꞌakal lix kꞌusbal li yo̱ chixcꞌulbal e̱riqꞌuin.

San Marcos 14:41

Ut quisukꞌi cuiꞌchic saꞌ rox sut, coxtauheb cuiꞌchic chi cua̱rc ut quixye reheb: —¿Ma toj yo̱quex ajcuiꞌ chi cua̱rc? Tzꞌakalak li hila̱nc xeba̱nu. Ac xtau xkꞌehil nak la̱in li Cꞌajolbej tinkꞌaxtesi̱k saꞌ rukꞌeb laj ma̱c.

Zacarías 9:7

La̱in tinba̱nu re nak incꞌaꞌ chic teꞌxtzaca li quicꞌ ut incꞌaꞌ chic teꞌxtzaca li tzacae̱mk mayejanbil chiruheb li jalanil dios. Ut la̱in chic tineꞌxlokꞌoni li joꞌ qꞌuial chic teꞌcana̱k. Aꞌanakeb chic laj cꞌamol be saꞌ xya̱nkeb laj Judá. Ut eb laj Ecrón chanchanakeb chic laj jebuseo li queꞌcana rubel xtakl li rey David.

Habacuc 3:2

At nimajcual Dios, nak quicuabi resil li joꞌ qꞌuial xaba̱nu, quinxucua a̱cuu. At Ka̱cuaꞌ Dios, chacꞌutbesi ta cuiꞌchic chiku anakcuan li caba̱nu chak junxil. Chacuuxta̱na taxak ku usta yo̱ a̱joskꞌil saꞌ kabe̱n.

Amós 7:6

Ut quixjal cuiꞌchic xcꞌaꞌux li Ka̱cuaꞌ ut quixye chi joꞌcaꞌin: —Chi moco aꞌin tinba̱nu. Incꞌaꞌ tinsacheb, chan li Ka̱cuaꞌ Dios.

Amós 7:3

Ut li Ka̱cuaꞌ quixjal xcꞌaꞌux. —Incꞌaꞌ texinsach, chan.

Isaías 57:16

Moco junelic ta yo̱kin chixcꞌutbal chiruheb lin tenamit lix ma̱queb, ut moco junelic ta yo̱kin chi joskꞌocꞌ riqꞌuineb. Cui junelic yo̱kin chixyebal reheb, ta̱chꞌina̱nk xchꞌo̱leb li cristian li quinyoꞌobtesiheb ut incꞌaꞌ raj teꞌxcuy rabinquil.

Isaías 27:8

Li Ka̱cuaꞌ quixqꞌueheb laj Israel chixtojbal lix ma̱queb nak quixcanabeb saꞌ rukꞌeb li jalaneb xtenamit. Queꞌchapeꞌ ut queꞌcꞌameꞌ chi pre̱xil saꞌ jalan tenamit. Chanchan nak queꞌcꞌameꞌ xban li cacuil ikꞌ li nachal saꞌ releb sakꞌe.

Salmos 135:14

Li nimajcual Dios ta̱rakok a̱tin saꞌ ti̱quilal saꞌ xbe̱neb lix tenamit. Li Ka̱cuaꞌ ta̱ruxta̱na ruheb lix tenamit.

Salmos 90:13

At Ka̱cuaꞌ, ¿joꞌ najtil chic yo̱k a̱joskꞌil saꞌ kabe̱n? ¿Ma incꞌaꞌ ta̱cuil xtokꞌoba̱l ku la̱o aj cꞌanjel cha̱cuu?

Salmos 78:38

Abanan junelic quixtokꞌoba ruheb. Quixcuy xma̱queb. Nabal sut quijoskꞌoꞌ saꞌ xbe̱neb; abanan quixcuy rib. Joꞌcan nak incꞌaꞌ quixsach ruheb xban xjoskꞌil.

Salmos 35:6

Kꞌojyi̱n taxak ru lix beheb ut yolyo̱lak taxak ru li be nak yo̱k ra̱linanquileb xban lix ángel li Ka̱cuaꞌ.

1 Reyes 19:4

Ut laj Elías co̱ xjunes saꞌ li chaki chꞌochꞌ. Jun cutan quibe̱c. Nak yo̱ chi ecuu̱c, qui-oc chi hila̱nc rubel jun to̱n li cheꞌ enebro xcꞌabaꞌ. Quiraj raj ca̱mc ut xban xrahil xchꞌo̱l quixye re li Dios: —At Ka̱cuaꞌ, tzꞌakal li raylal ac xincꞌul. Us raj cui tina̱qꞌue chi ca̱mc. La̱in moco kꞌaxal cha̱bilin ta chiruheb lin xeꞌto̱nil yucuaꞌ, chan.

2 Samuel 24:18

Saꞌ ajcuiꞌ li cutan aꞌan laj Gad quicuulac riqꞌuin laj David ut quixye re: —Tatxic saꞌ li naꞌajej li narisi cuiꞌ rix lix trigo laj Arauna laj jebuseo. Ut aran ta̱yi̱b jun li artal re xlokꞌoninquil li Ka̱cuaꞌ, chan.

2 Samuel 5:8

Saꞌ li cutan aꞌan laj David quixye: —Li ani ta̱raj ta̱numta̱k saꞌ xbe̱neb laj jebuseo, tento ta̱oc chak cuan cuiꞌ li rok li haꞌ ut tixcamsiheb laj jebuseo, li chanchaneb mutzꞌ ut chanchan ye̱k rokeb, li kꞌaxal xicꞌ nequeꞌcuil, chan laj David. (Chalen aꞌan cuan jun li a̱tin naxye, “Chi moco li mutzꞌ chi moco li ye̱k rok teꞌoc saꞌ lix templo li Ka̱cuaꞌ.”)

Jueces 19:11

lix mo̱s quixye re laj levita: —¿Ma incꞌaꞌ raj us nak toxic saꞌ li tenamit Jebús? Takanumsi li kꞌojyi̱n saꞌ li tenamit aꞌan saꞌ xya̱nkeb laj jebuseo, chan.

Jueces 1:21

Abanan eb li ralal xcꞌajol laj Benjamín incꞌaꞌ queꞌrisiheb laj jebuseo saꞌ li tenamit Jerusalén. Toj chalen anakcuan eb laj jebuseo cuanqueb saꞌ xya̱nkeb li ralal xcꞌajol laj Benjamín.

Josué 15:63

Abanan eb li ralal xcꞌajol laj Judá incꞌaꞌ queꞌru risinquileb laj jebuseo saꞌ li tenamit Jerusalén. Eb laj jebuseo toj cuanqueb saꞌ li tenamit Jerusalén toj chalen anakcuan rochbeneb li ralal xcꞌajol laj Judá.

Éxodo 12:13

Abanan li quicꞌ li te̱qꞌue chire xpuertil le̱ rochoch, aꞌan e̱retalil chicuu. Nak tincuil li quicꞌ, ti̱c tinnumekꞌ saꞌ le̱ rochoch. Ma̱ jun ta̱ca̱mk saꞌ le̱ rochoch la̱ex nak yo̱kin chixcamsinquil li xbe̱n ralaleb aj Egipto.

Éxodo 9:28

Ta̱ya̱ba xcꞌabaꞌ li Ka̱cuaꞌ Dios. Tzꞌakal li xkacꞌul riqꞌuin li sakbach ut li ca̱k. Texincanab chi xic. Incꞌaꞌ chic nacuaj nak texba̱yk arin, chan.

Génesis 10:16

Laj Canaán, aꞌan ajcuiꞌ lix yucuaꞌeb laj jebuseo, laj amorreo, laj gergeseo,

Éxodo 32:14

Ut li Ka̱cuaꞌ Dios quixjal xcꞌaꞌux ut incꞌaꞌ quixsacheb lix tenamit.

1 Corintios 10:10

Chi moco tocuechꞌok, joꞌ queꞌxba̱nu eb aꞌan. Ut xbaneb lix ma̱usilal queꞌcamsi̱c xban li ángel li quixtakla chak li Dios.

Jeremías 26:19

¿Ma quicamsi̱c ta biꞌ laj Miqueas xban li rey? ¿Ma quicamsi̱c ta biꞌ xbaneb laj Judá? Quixxucua ban ru li Ka̱cuaꞌ laj Ezequías ut quixtzꞌa̱ma chiru li Dios nak ta̱ruxta̱na ruheb li tenamit. Ut li Ka̱cuaꞌ quixjal xcꞌaꞌux ut incꞌaꞌ quixtakla li raylal saꞌ xbe̱neb. ¿Ma takabok ta biꞌ raylal saꞌ kabe̱n la̱o riqꞌuin xcamsinquil li cui̱nk aꞌin? chanqueb.

1 Crónicas 1:14

Laj Canaán, aꞌan lix xeꞌto̱nil yucuaꞌeb laj jebuseo, eb laj amorreo, eb laj gergeseo,

Jeremías 42:10

Cui texcana̱k saꞌ li naꞌajej aꞌin ut texcua̱nk saꞌ xya̱lal, la̱in texintenkꞌa ut incꞌaꞌ tinba̱nu raylal e̱re. Texincanab chi cua̱nc saꞌ li naꞌajej aꞌin ut incꞌaꞌ texinqꞌue chi isi̱c. Narahoꞌ inchꞌo̱l xban li raylal li xinba̱nu e̱re.