2 Corintios 4:4 - Li Santil hu

⁴ Incꞌaꞌ nequeꞌxtau ru xban nak laj tza naramoc re lix ya̱lal chiruheb li incꞌaꞌ nequeꞌpa̱ban. Naxba̱nu aꞌan re nak incꞌaꞌ teꞌxtau ru lix ya̱lal li colba-ib li nacꞌutuc chiku lix lokꞌal li Cristo, ut lix lokꞌal li Dios.

Q'eqchi Bible

⁴ cho'q reheb' li maak'a' neke'xpaab', xb'aan naq li xyos li ruuchich'och' a'in xmutz'o'b'resi li xk'a'uxeb' re naq ink'a' taalemtz'unq chiruheb' li xsaqenkil li xChaab'il Esil li Kriist nim xloq'al, a'an a'in li xjalam u li Yos.

2 Corintios 4:4 ပူးပေါင်းရင်းမြစ်များ

San Juan 12:40

Chanchaneb li mutzꞌ xban nak queꞌiloc ut incꞌaꞌ queꞌxtau xya̱lal. Queꞌcacuubresi̱c lix chꞌo̱leb xban li Dios re nak incꞌaꞌ teꞌxtau xya̱lal chi moco teꞌsukꞌi̱k riqꞌuin re nak tixqꞌuirtesiheb. (Isa. 6:10)

2 Corintios 3:14

Xban xcacuilal xchꞌo̱leb incꞌaꞌ queꞌxtau ru nak lix lokꞌal li najter chakꞌrab ta̱e̱lk. Ut chalen anakcuan incꞌaꞌ ajcuiꞌ nequeꞌxtau ru. Chanchan nak li tꞌicr aꞌan toj yo̱ chi ramoc chiruheb lix ya̱lal nak nequeꞌrabi li najter chakꞌrab. Ut li tꞌicr aꞌan na-el caꞌaj cuiꞌ riqꞌuin xpa̱banquil li Cristo.

Hechos 26:18

Chanchan nak ta̱teo̱nk li xnakꞌ ruheb nak ta̱chꞌolob lix ya̱lal chiruheb. Chanchan nak teꞌe̱lk saꞌ li kꞌojyi̱n ut teꞌoc saꞌ cutan nak teꞌxtau ru lix ya̱lal. Teꞌe̱lk rubel xcuanquil laj tza ut teꞌoc rubel xcuanquil li Dios. Riqꞌuin inpa̱banquil la̱in, ta̱cuyekꞌ ta̱sachekꞌ lix ma̱queb, ut ta̱cua̱nk xnaꞌajeb saꞌ xya̱nkeb li sicꞌbileb ru xban li Dios,” chan cue li Ka̱cuaꞌ.

Isaías 6:10

Ut quixye cuiꞌchic cue li Ka̱cuaꞌ: —A̱lobresi lix chꞌo̱leb li tenamit aꞌin re nak incꞌaꞌ teꞌxtau xya̱lal. Incꞌaꞌ saken cheꞌabi̱nk ut incꞌaꞌ saken cheꞌilok re nak incꞌaꞌ cheꞌilok riqꞌuin li ruheb ut incꞌaꞌ saken cheꞌabi̱nk riqꞌuin lix xiqꞌueb, chi moco lix chꞌo̱leb chixtau xya̱lal, chi moco teꞌsukꞌi̱k cuiqꞌuin re tebinqꞌuirtesi, chan.

1 Juan 5:19

Ut nakanau nak la̱o ralal xcꞌajol li Dios. Abanan li jun chꞌol chic li ma̱jiꞌ nequeꞌpa̱ban re li Dios, eb aꞌan cuanqueb rubel xcuanquil laj tza.

2 Corintios 4:6

Nak toj kꞌojyi̱n chak ru li ruchichꞌochꞌ, li Dios quixye, “Chicua̱nk li cutan re xcutanobresinquil ru li ruchichꞌochꞌ.” Ut aꞌan ajcuiꞌ li nacutanobresin re li kacꞌaꞌux re nak naru takanau chanru lix lokꞌal li Dios. Ut li Jesucristo naxcꞌut chiku lix lokꞌal li Dios.

Efesios 2:2

Xeba̱nu chak li ma̱usilal saꞌ ruchichꞌochꞌ ut xeqꞌue e̱rib chi takla̱c xban laj tza li nataklan saꞌ xbe̱neb li ma̱us aj musikꞌej. Aꞌan li nataklan saꞌ xbe̱neb li nequeꞌkꞌetoc ra̱tin li Dios.

Efesios 6:12

Moco yo̱co ta chixyalbal kakꞌe riqꞌuin cui̱nk. Yo̱co ban chi pletic riqꞌuin qꞌuila pa̱y ru chi ma̱us aj musikꞌej li cuanqueb xcuanquil saꞌ eb li cutan aꞌin, li nequeꞌtaklan saꞌ ikꞌ ut saꞌ li ruchichꞌochꞌ li cuan saꞌ xkꞌojyi̱nal ru li ma̱c.

San Juan 12:31

Anakcuan xcuulac xkꞌehil nak li Dios ta̱rakok a̱tin saꞌ xbe̱neb li cuanqueb saꞌ ruchichꞌochꞌ. Anakcuan ta̱sachekꞌ xcuanquil laj tza li nataklan saꞌ ruchichꞌochꞌ.

San Juan 8:12

Li Jesús quia̱tinac cuiꞌchic riqꞌuineb li tenamit ut quixye reheb: —La̱in lix cutan saken li ruchichꞌochꞌ. Li ani ta̱pa̱ba̱nk cue la̱in, incꞌaꞌ chic ta̱cua̱nk saꞌ xkꞌojyi̱nal ru li ma̱c. Ta̱cua̱nk ban saꞌ cutan saken ut ta̱cua̱nk xyuꞌam chi junelic, chan.

San Juan 12:35

Quichakꞌoc li Jesús ut quixye reheb: —La̱in li cutan saken. Xinchal chixchꞌolobanquil lix ya̱lal che̱ru. Toj tincua̱nk chic caꞌchꞌinak saꞌ e̱ya̱nk. Joꞌcan nak qꞌuehomak e̱chꞌo̱l chinpa̱banquil nak toj cuanquin saꞌ e̱ya̱nk re nak incꞌaꞌ texcua̱nk saꞌ xkꞌojyi̱nal ru li ma̱c. Li ani nacuan saꞌ xkꞌojyi̱nal ru li ma̱c incꞌaꞌ naxnau bar yo̱ chi xic.

San Juan 14:30

Incꞌaꞌ chic ta̱ru̱k tina̱tinak chi nabal e̱riqꞌuin xban nak yo̱ chi cha̱lc li nataklan saꞌ li ruchichꞌochꞌ, usta aꞌan ma̱cꞌaꞌ xcuanquil saꞌ inbe̱n la̱in.

2 Corintios 3:18

La̱o aj pa̱banel moco tzꞌaptzꞌo ta li kiloba̱l riqꞌuin tꞌicr re xtzꞌapbal xlokꞌal li Dios joꞌ quixba̱nu laj Moisés. Chanchano ban jun lem nak nakacꞌut xlokꞌal li Ka̱cuaꞌ. Ut li Ka̱cuaꞌ aꞌan ajcuiꞌ li Santil Musikꞌej li nocoxjalanobresi ut naxqꞌue kalokꞌal re nak yo̱ko xcꞌutbal xlokꞌal li Cristo.

Colosenses 1:27

Li Dios quiraj nak la̱ex li ma̱cuaꞌex aj judío, te̱nau nak e̱re ajcuiꞌ li colba-ib. Li resil aꞌan mukmu nak quicuan chak. Abanan anakcuan nanauman nak lix ya̱lal li lokꞌlaj esil, aꞌan aꞌin: Nak li Cristo cuan e̱riqꞌuin ut saꞌ xcꞌabaꞌ aꞌan textzꞌako̱nk riqꞌuin lix nimal xlokꞌal li Dios.

Colosenses 1:15

Li Dios incꞌaꞌ na-ilman ru. Abanan nakanau chanru li Dios xban nak li Ralal quicꞌulun saꞌ ruchichꞌochꞌ chixcꞌutbal chiku. Li Jesucristo aꞌan li kꞌaxal nim xcuanquil chiruheb chixjunil li queꞌyoꞌobtesi̱c.

1 Juan 2:8

Abanan chanchan acꞌ ajcuiꞌ li chakꞌrab xban nak kꞌaxal nim xcuanquil. Ut li chakꞌrab aꞌan, aꞌin nak te̱ra e̱rib che̱ribil e̱rib. Joꞌ quixba̱nu li Jesucristo, joꞌcan ajcuiꞌ takaba̱nu la̱o. Li ra̱tin li Jesucristo naxcutanobresi kanaꞌleb. Nak nakacanab li ma̱cobc, chanchan nak yo̱ chi numecꞌ li kꞌojyi̱n. Ut nak nakapa̱b li ra̱tin li Jesucristo, chanchan nak yo̱ chi cha̱lc li cutan.

Filipenses 2:6

Li Jesucristo tzꞌakal Dios, aban incꞌaꞌ quicꞌoxlac xcanabanquil lix lokꞌal.

San Juan 1:14

Li Jesucristo quitzꞌejcualoꞌ ut tzꞌakal cui̱nk nak quicuan arin saꞌ kaya̱nk. Cꞌajoꞌ li rusilal ut aꞌan naxcꞌut lix ya̱lal. Aꞌan li Ralal li Dios li junaj chi ribil ut la̱o xkil lix lokꞌal.

Hebreos 1:3

Li Ralal li Dios, aꞌan nacutanobresin re lix lokꞌal li Acuabej Dios. Ut aꞌan ajcuiꞌ nacꞌutuc chiku chanru lix naꞌleb. Li Ralal li Dios, aꞌan nacu̱tun re li ruchichꞌochꞌ riqꞌuin lix cuanquilal li ra̱tin xban nak aꞌan yal re saꞌ xbe̱n li ruchichꞌochꞌ. Ut nak ac xmayeja rib re risinquil li kama̱c, li Ralal li Dios co̱ saꞌ choxa ut quicꞌojla saꞌ xnim ukꞌ li Dios Acuabej, li kꞌaxal nim xcuanquil.

Tito 2:13

Joꞌcan taxak yo̱ko nak yo̱ko chiroybeninquil li lokꞌlaj cutan nak tol-e̱lk cuiꞌchic li Jesucristo li nakayoꞌoni. Saꞌ li cutan aꞌan ta̱cꞌutbesi̱k chiku lix lokꞌal li kanimajcual Dios, li Jesucristo laj Colol ke.

San Juan 16:11

Incꞌaꞌ nequeꞌxtau ru cꞌaꞌru li rakba a̱tin. Cui ta queꞌxtau ru, teꞌxnau raj nak ac tenebanbil li rakba a̱tin saꞌ xbe̱n laj tza li nataklan saꞌ ruchichꞌochꞌ.

2 Pedro 1:19

Riqꞌuin aꞌin nakanau nak relic chi ya̱l na-uxman li cꞌaꞌru tzꞌi̱banbil chak najter xbaneb li profeta. Us cui te̱qꞌue retal li quilajeꞌxtzꞌi̱ba chak li profeta. Aꞌan naxcutanobresi chiku joꞌ junak xam nacutanobresin saꞌ junak naꞌajej kꞌojyi̱n ru. Li Ka̱cuaꞌ Jesucristo naxcutanobresi saꞌ li ka̱m joꞌ nak naxcutanobresi ru li kꞌojyi̱n li cak chahim nak sake̱uc re.

2 Corintios 3:11

Cui cuan xlokꞌal li najter chakꞌrab li quinumeꞌ xcuanquil, kꞌaxal cuiꞌchic nim xlokꞌal li acꞌ yuꞌam li cuan chi junelic.

1 Corintios 10:20

La̱in incꞌaꞌ ninye nak cuan xcuanquil li yi̱banbil dios, chi moco ninye nak li mayejanbil tib cuan xcuanquil. Li yo̱quin chixyebal, aꞌan aꞌin: eb li incꞌaꞌ nequeꞌxpa̱b li tzꞌakal Dios nequeꞌmayejac, aban ma̱cuaꞌ chiru li Dios nequeꞌmayejac. Chiru ban li ma̱us aj musikꞌej. Ut la̱in incꞌaꞌ nacuaj nak yo̱kex chi oque̱nc saꞌ lix naꞌlebeb li ma̱us aj musikꞌej.

San Juan 12:45

Li ani nanaꞌoc cuu la̱in, naxnau ajcuiꞌ ru li quitaklan chak cue.

San Juan 15:24

Ma̱cꞌaꞌeb raj xma̱c cui ta incꞌaꞌ xeꞌril li milagros li xinba̱nu chiruheb, li milagros li ma̱ ani chic naru xba̱nunquil. Abanan eb aꞌan queꞌril li xinba̱nu. Joꞌcan nak xicꞌ niquineꞌril la̱in ut xicꞌ ajcuiꞌ nequeꞌril lin Yucuaꞌ.

San Juan 1:18

Ma̱ ani qui-iloc ru li Dios. Caꞌaj cuiꞌ li Dios Cꞌajolbej, aꞌan tzꞌakal li cuan chi sum a̱tin riqꞌuin li Dios Acuabej. Ut aꞌan li quicꞌutbesin chiku chanru li Dios.

Salmos 50:2

Nalemtzꞌun chak lix lokꞌal li Dios saꞌ li naꞌajej Sión li bar nahilan cuiꞌ.

1 Timoteo 1:11

Li katijbal aꞌan li quicꞌuteꞌ chiku xban li lokꞌlaj colba-ib li naxqꞌue ke li nimajcual Dios, li tenebanbil saꞌ inbe̱n xyebal resilal yalak bar.

1 Reyes 22:22

Li musikꞌej quixye, “La̱in tin-oc riqꞌuineb chixjunileb li profeta re nak teꞌxye ticꞌtiꞌ re laj Acab,” chan. Ut li Ka̱cuaꞌ quixye re, “Us. Ayu ut balakꞌi laj Acab. Ta̱uxma̱nk joꞌ xaye” chan.—

San Mateo 13:22

Ut li iyaj li quinak saꞌ xya̱nk li qꞌuix, aꞌaneb li nequeꞌabin re li ra̱tin li Dios. Abanan caꞌaj cuiꞌ li cꞌaꞌak re ru cuan saꞌ ruchichꞌochꞌ nequeꞌxcꞌoxla, joꞌ li biomal ut xra̱bal ru li cꞌaꞌak chic re ru. Ut aꞌan li naramoc lix ya̱lal chiruheb. Ma̱cꞌaꞌ na-oc cuiꞌ li ra̱tin li Dios chiruheb.

Hechos 26:23

Queꞌxye nak tento ta̱camsi̱k li Cristo, laj Colonel li yechiꞌinbil xban li Dios, abanan aꞌan li xbe̱n li ta̱cuacli̱k cuiꞌchic chi yoꞌyo saꞌ xya̱nkeb li camenak ut tixchꞌolob xya̱lal li evangelio reheb laj judío joꞌqueb ajcuiꞌ li ma̱cuaꞌeb aj judío, chan laj Pablo.

2 Corintios 2:11

Takacuy xma̱c re nak laj tza incꞌaꞌ ta̱numta̱k saꞌ kabe̱n xban nak chikajunilo ac nakanau nak aꞌan cuan xnaꞌleb chi balakꞌic.

2 Corintios 2:12

Nak quincuulac saꞌ li tenamit Troas chi cꞌanjelac chiru li Ka̱cuaꞌ, kꞌaxal queꞌxqꞌue xchꞌo̱l chirabinquil nak quinchꞌolob xya̱lal li colba-ib saꞌ xcꞌabaꞌ li Jesucristo.

Gálatas 1:4

Li Jesucristo quixkꞌaxtesi rib chi ca̱mc saꞌ xcꞌabaꞌ li kama̱c xban nak joꞌcan quiraj li Dios Acuabej. Quixba̱nu aꞌan re kacolbal chiru li ma̱usilal saꞌ li ruchichꞌochꞌ.

Hebreos 6:4

Cuanqueb li ac xeꞌxtau xya̱lal. Xeꞌxcꞌul li rusilal li Dios. Xeꞌxcꞌul li Santil Musikꞌej.

1 Juan 2:11

Li ani xicꞌ naril lix herma̱n, aꞌan toj yo̱ ajcuiꞌ chi be̱c saꞌ xkꞌojyi̱nal ru li ma̱c. Ut incꞌaꞌ naxnau bar yo̱ chi xic xban nak li ma̱c naramoc re lix ya̱lal chiru.