1 Samuel 13:6 - Li Santil hu

⁶ Eb laj Israel queꞌril nak cuanqueb saꞌ chꞌaꞌajquilal ut incꞌaꞌ chic queꞌxtau cꞌaꞌru teꞌxba̱nu re xcolbaleb rib. Queꞌxmuk ribeb saꞌ eb li ochoch pec, saꞌ eb li jul, saꞌ eb li sako̱nac, ut saꞌ xya̱nkeb li ni̱nki pec ut queꞌxmuk ajcuiꞌ ribeb saꞌ eb li rok haꞌ li ma̱cꞌaꞌ haꞌ chi saꞌ.

Q'eqchi Bible

⁶ Naq eb' laj Israel ke'ril li ch'a'ajkilal wankeb' wi' ut li nimla rahilal yo chi chalk sa' xb'eeneb', koxe'xmuq rib' sa'eb' li ochoch pek, sa'atqeb' li xhopolal ut x'atz'alaleb' li saqoonak, rub'elatq ch'och' ut sa'eb' li kumb'-ha'.

1 Samuel 13:6 ပူးပေါင်းရင်းမြစ်များ

Jueces 6:2

Eb laj Madián cꞌajoꞌ nak queꞌxrahobtesiheb laj Israel. Joꞌcan nak eb laj Israel queꞌxmuk ribeb saꞌ eb li ochoch pec ut saꞌ eb li tzu̱l. Queꞌxyi̱b lix muheba̱leb saꞌ eb li naꞌajej bar incꞌaꞌ teꞌtaꞌekꞌ cuiꞌ.

Hebreos 11:38

Ma̱cuaꞌ raj xcꞌulubeb li incꞌaꞌ useb xnaꞌleb nak teꞌcua̱nk laj pa̱banel saꞌ xya̱nkeb. Xban nak queꞌrahobtesi̱c, eb laj pa̱banel quilajeꞌe̱lelic chiruheb ut queꞌcuan yalak bar saꞌ li chaki chꞌochꞌ, saꞌ tzu̱l, ut queꞌcuan ajcuiꞌ saꞌ li ochoch pec.

Filipenses 1:23

Chꞌaꞌaj chokꞌ cue xnaubal bar cuan li kꞌaxal us. Nacuaj raj ca̱mc re nak tinxic riqꞌuin li Cristo. Aꞌan raj li kꞌaxal us chokꞌ cue la̱in.

Isaías 42:22

Lix tenamit li Dios queꞌchapeꞌ ut queꞌrahobtesi̱c. Queꞌqꞌueheꞌ saꞌ tzꞌalam ut queꞌtzꞌapeꞌ saꞌ eb li ochoch pec. Quimakꞌeꞌ li cꞌaꞌru reheb ut ma̱ ani quicoloc reheb.

2 Samuel 24:14

Laj David quixye: —Kꞌaxal ra saꞌ inchꞌo̱l ut incꞌaꞌ nintau cꞌaꞌru tinba̱nu. Abanan takacanab kib saꞌ rukꞌ li Dios xban nak nim li rusilal. Incꞌaꞌ nakaj nak totꞌanekꞌ saꞌ rukꞌeb li xicꞌ nequeꞌiloc ke, chan laj David.

1 Samuel 24:3

Yo̱queb chi numecꞌ saꞌ jun li naꞌajej cuanqueb cuiꞌ xcorral li carner. Cuan jun li ochoch pec aran. Laj Saúl qui-oc saꞌ li ochoch pec chixtzꞌekbal rib. Ut saꞌ li ochoch pec aꞌan mukmu̱queb laj David ut eb li cui̱nk li cuanqueb rochben. Toj chi saꞌ cuanqueb chak.

1 Samuel 23:19

Eb li cristian li cuanqueb Zif queꞌco̱eb aran Gabaa chirilbal laj Saúl. Queꞌxye re: —Laj David mukmu saꞌ li kanaꞌaj aran Hores saꞌ li tzu̱l Haquila li cuan saꞌ li sur saꞌ li chaki chꞌochꞌ re Judá.

1 Samuel 14:11

Joꞌcan nak queꞌco̱eb ut queꞌxcꞌut ribeb chiruheb laj filisteo. Ut eb laj filisteo queꞌxye: —¡Ilomakeb! Eb laj Israel yo̱queb chi e̱lc saꞌ li ochoch pec li queꞌxmuk cuiꞌ ribeb, chanqueb.

Jueces 20:41

Ut eb li ralal xcꞌajol laj Israel queꞌxsukꞌisi ribeb ut queꞌxtiquib cuiꞌchic pletic riqꞌuineb. Qui-oc xxiuheb li ralal xcꞌajol laj Benjamín xban nak queꞌxqꞌue retal nak teꞌsachekꞌ ruheb.

Jueces 10:9

Ut eb laj Amón queꞌnumeꞌ jun pacꞌal li nimaꞌ Jordán chi pletic riqꞌuineb li ralal xcꞌajol laj Judá, ut eb li ralal xcꞌajol laj Benjamín, joꞌ ajcuiꞌ li ralal xcꞌajol laj Efraín. Ut kꞌaxal ra queꞌxcꞌul eb laj Israel.

Josué 8:20

Ut eb li soldado re li tenamit Hai queꞌiloc chirixeb ut queꞌxqꞌue retal nak lix tenamiteb yo̱ chi cꞌatc. Yo̱ chi takecꞌ lix sibel saꞌ choxa. Ma̱cꞌaꞌ chic quiru queꞌxba̱nu. Ma̱ bar chic quiru queꞌe̱lelic xban nak eb li soldado aj Israel li yo̱queb chi e̱lelic toj saꞌ li chaki chꞌochꞌ, queꞌsukꞌi saꞌ xbe̱neb ut queꞌoc chi pletic riqꞌuineb.

1 Samuel 7:7

Eb li nequeꞌtaklan saꞌ xbe̱neb laj filisteo queꞌrabi nak cuanqueb aran Mizpa eb laj Israel. Queꞌco̱eb chi pletic riqꞌuineb. Nak queꞌrabi resil nak yo̱queb chi cha̱lc laj filisteo, cꞌajoꞌ nak queꞌxucuac laj Israel.

1 Samuel 13:15

Laj Samuel qui-el Gilgal ut co̱ Gabaa saꞌ xnaꞌajeb li ralal xcꞌajol laj Benjamín. Laj Saúl quirajla lix soldados li cuanqueb rochben ut cuakib ciento (600) aj chic li soldados li cuanqueb rochben.

1 Samuel 14:22

Joꞌcan ajcuiꞌ eb laj Israel li queꞌxmuk ribeb saꞌ lix naꞌajeb li ralal xcꞌajol laj Efraín, li tzu̱l ru. Queꞌril nak yo̱queb chi e̱lelic laj filisteo. Queꞌco̱eb ajcuiꞌ eb aꞌan chi pletic riqꞌuineb laj filisteo.

Jeremías 41:9

Lix julel haꞌ li quixcuteb cuiꞌ li camenak laj Ismael, aꞌan li haꞌ li quixtakla xbecbal li rey Asa nak yo̱ chixcolbal rib chiru laj Baasa lix reyeb laj Israel. Usta nimla jul, abanan quinujac riqꞌuineb li cui̱nk li quixcamsiheb laj Ismael.

Ezequiel 33:27

Ta̱ye reheb nak la̱in li yoꞌyo̱quil Dios ninye nak relic chi ya̱l telajeꞌcamsi̱k li cuanqueb saꞌ eb li tenamit li poꞌbileb. Ut eb li cuanqueb saꞌ li cꞌaleba̱l teꞌlajeꞌcamsi̱k xbaneb li joskꞌ aj xul. Ut eb li cuanqueb saꞌ eb li ochoch pec ut saꞌ eb li cab li nequeꞌxcol cuiꞌ ribeb telajeꞌca̱mk xban caki yajel.

1 Samuel 31:7

Eb laj Israel li cuanqueb jun pacꞌal li ru takꞌa ut eb li cuanqueb jun pacꞌal li nimaꞌ Jordán queꞌril nak queꞌe̱lelic lix solda̱deb laj Israel. Queꞌrabi nak quicamsi̱c laj Saúl rochbeneb li ralal. Queꞌxcanab lix tenamiteb ut queꞌe̱lelic. Ut eb laj filisteo queꞌoc saꞌ lix tenamiteb ut aran queꞌcana chi cua̱nc.