1 Corintios 8:1 - Li Santil hu

¹ Cuan cuib oxib cua̱tin tinye e̱re chirix li tzacae̱mk mayejanbil chiruheb li yi̱banbil dios. Nakanau nak chikajunilo ac xkatzol kib chirix aꞌin. Abanan toj cuan saꞌ e̱ya̱nk nequeꞌxcꞌoxla nak nequeꞌxnau chixjunil ut riqꞌuin aꞌan nequeꞌxkꞌetkꞌeti rib. Aban li ani narahoc, aꞌan naxtenkꞌa li rech aj pa̱banelil chi qꞌui̱c saꞌ lix pa̱ba̱l.

Q'eqchi Bible

¹ Anaqwan too'aatinaq chirix li k'aru mayejanb'il chiruheb' li yal k'oxlanb'il yos. Yaal ajwi' naq “wank qak'a'uxl chiqajunilo”. Ab'an rik'in li xnimal nawok naq'etq'eto'k li winq; ka'ajwi' li rahok nakab'lank re li komonil.

1 Corintios 8:1 ပူးပေါင်းရင်းမြစ်များ

1 Corintios 8:7

Abanan moco chixjunileb ta nequeꞌxtau ru lix ya̱lal aꞌin chirix li mayejanbil tzacae̱mk. Cꞌaynakeb chalen chak najter chixpa̱banquil li yi̱banbil dios, ut anakcuan nak nequeꞌxtzaca li tzacae̱mk mayejanbil chiru li yi̱banbil dios nequeꞌxcꞌoxla nak yo̱queb chixqꞌuebal xlokꞌal li yi̱banbil dios. Ut xban nak toj kꞌuneb xchꞌo̱l saꞌ lix pa̱ba̱l, nequeꞌxcꞌoxla nak nequeꞌxmux ru lix pa̱ba̱leb.

Romanos 14:3

Li ani naxtzaca chixjunil li cꞌaꞌak re ru natzacaman incꞌaꞌ naru tixtzꞌekta̱na li ani incꞌaꞌ naxtzaca chixjunil li cꞌaꞌak re ru. Ut li ani incꞌaꞌ naxtzaca chixjunil li cꞌaꞌak re ru incꞌaꞌ naru naxcuechꞌi rix li jun chic li naxtzaca chixjunil xban nak aꞌan ac xcꞌuleꞌ ajcuiꞌ xban li Dios.

Isaías 5:21

Raylal ta̱cha̱lk saꞌ e̱be̱n la̱ex li nequeye nak cuan e̱naꞌleb e̱junes e̱rib ut la̱ex li se̱b e̱chꞌo̱l nak nequecꞌoxla e̱rib.

Apocalipsis 2:14

Abanan cuan cꞌaꞌak re ru yo̱quex chixba̱nunquil incꞌaꞌ us xban nak cuanqueb saꞌ e̱ya̱nk li toj yo̱queb chixqꞌuebal xcuanquil lix tijleb laj Balaam li quicꞌutuc chiru laj Balac chanru nak tixqꞌueheb chi ma̱cobc laj Israel. Quixye reheb nak ta̱ru̱k teꞌxtzaca li tzacae̱mk li mayejanbil chiru li jalanil dios. Ut quixtacchiꞌiheb re nak teꞌyumbe̱tak ut teꞌcoꞌbe̱tak.

1 Corintios 8:4

Anakcuan tina̱tinak chirix li tzacae̱mk mayejanbil chiruheb li yi̱banbil dios. La̱o nakanau nak li yi̱banbil dios ma̱cꞌaꞌ nequeꞌoc cuiꞌ xban nak moco dioseb ta. Nakanau nak jun ajcuiꞌ li Dios cuan.

1 Corintios 8:2

Li ani narecꞌa nak cuan xnaꞌleb, li jun aꞌan toj ma̱jiꞌ naxtau lix ya̱lal chi tzꞌakal.

Romanos 15:14

Ex herma̱n, la̱in ninnau nak cha̱bilex ut nequenau lix ya̱lal ut nequeqꞌue ajcuiꞌ e̱naꞌleb chi ribil e̱rib.

Efesios 4:16

Li Cristo, aꞌan najolomin ke la̱o aj pa̱banel ut la̱o joꞌ li rok rukꞌ. Li Cristo, aꞌan nacꞌamoc be chiku ut junajo chic. Chikajunilo chikatenkꞌa kib chi kibil kib re nak toqꞌui̱k saꞌ li kapa̱ba̱l xban nak nakara kib chi kibil kib.

1 Corintios 15:34

Checꞌoxla chi us li yo̱quex chixba̱nunquil ut mexma̱cob chic. Cuanqueb saꞌ e̱ya̱nk li toj ma̱jiꞌ nequeꞌxpa̱b li Dios. Re xcꞌutbal e̱xuta̱n nak ninye e̱re chi joꞌcaꞌin.

Hechos 15:29

Incꞌaꞌ te̱tzaca li tzacae̱mk mayejanbil chiru li yi̱banbil dios chi moco te̱tzaca li quicꞌ chi moco te̱tzaca xtibel li yatzꞌbil xul. Ut incꞌaꞌ te̱mux e̱rib riqꞌuin coꞌbe̱tac yumbe̱tac. Cui te̱col e̱rib chiru chixjunil aꞌin, us te̱ba̱nu. Cherilak e̱rib, chan laj Jacobo.

Isaías 47:10

Xecꞌojob e̱chꞌo̱l riqꞌuin li ma̱usilal xeba̱nu ut xeye, “Ma̱ ani na-iloc ke,” chanquex. Xebalakꞌi e̱rib xban nak xecꞌoxla nak cuan e̱naꞌleb ut xeye, “La̱o kꞌaxal cuan kacuanquil. Ma̱ jun chic cuan xcuanquil joꞌ la̱o,” chanquex.

Números 25:2

Eb li ixk aꞌan nequeꞌxbok li cui̱nk aj Israel saꞌ lix ninkꞌeheb nak nequeꞌmayejac chiru lix dioseb. Ut eb laj Israel queꞌxlokꞌoni li jalanil dios Baal-peor ut queꞌxcuaꞌ li tzacae̱mk li mayejanbil chiruheb li yi̱banbil dios.

1 Corintios 10:28

Aꞌut cui junak naxye a̱cue nak li tzacae̱mk aꞌan mayejanbil chiru li yi̱banbil dios, incꞌaꞌ ta̱tzaca aꞌan re nak incꞌaꞌ ta̱chꞌina̱k xchꞌo̱l li xyehoc a̱cue nak mayejanbil tzacae̱mk ut re ajcuiꞌ nak incꞌaꞌ ta̱oc xcꞌaꞌux.

Hechos 21:25

Ac xotzꞌi̱bac riqꞌuineb li queꞌpa̱ban saꞌ xya̱nkeb li ma̱cuaꞌeb aj judío. Ac xkatakla xyebal reheb nak incꞌaꞌ tento teꞌxba̱nu li circuncisión. Li cꞌaꞌru tento teꞌxba̱nu, aꞌan aꞌin: incꞌaꞌ naru teꞌxtzaca li tzacae̱mk mayejanbil chiruheb li yi̱banbil dios, chi moco teꞌxtzaca li quicꞌ, chi moco teꞌxtiu xtibel li yatzꞌbil xul. Ut incꞌaꞌ teꞌcoꞌbe̱tak teꞌyumbe̱tak, chanqueb re laj Pablo.

Hechos 15:10

Anakcuan ut ¿cꞌaꞌut nak yo̱quex chixyalbal rix li Dios riqꞌuin xqꞌuebal li i̱k aꞌin saꞌ xbe̱neb laj pa̱banel li ma̱cuaꞌeb aj judío? ¿Cꞌaꞌut nak te̱puersiheb chixba̱nunquil li naxye li chakꞌrab li incꞌaꞌ xoru chixba̱nunquil la̱o chi moco eb li kaxeꞌto̱nil yucuaꞌ?

Apocalipsis 2:20

Abanan incꞌaꞌ nacuulac chicuu nak nequecꞌam e̱rib saꞌ usilal riqꞌuin li ixk li yibru xnaꞌleb li chanchan lix naꞌleb lix Jezabel. Li ixk aꞌan naxqꞌue rib chokꞌ xprofeta li Dios, abanan moco ya̱l ta. Yo̱ ban chixbalakꞌinquileb laj cꞌanjel chicuu. Riqꞌuin li naxba̱nu yo̱ chixcꞌambaleb xbe chi yumbe̱tac ut chi coꞌbe̱tac. Ut yo̱ ajcuiꞌ chixcꞌambaleb xbe chixtzacanquil li tzacae̱mk mayejanbil chiru li jalanil Dios.

Colosenses 2:18

Cuan li nequeꞌxye nak cha̱bileb ut chanchan nak nequeꞌxcubsi ribeb. Abanan moco ya̱l ta. Lix naꞌlebeb moco qꞌuebil ta xban li Dios. Li cꞌaꞌru nequeꞌxba̱nu, aꞌan yal cꞌoxlanbil. Nequeꞌxlokꞌoni li ángel ut nequeꞌxye cui incꞌaꞌ te̱ba̱nu joꞌ nequeꞌxba̱nu eb aꞌan, incꞌaꞌ te̱cꞌul li yechiꞌinbil e̱re xban li Dios. Abanan me̱pa̱b li cꞌaꞌru nequeꞌxye xban nak moco ya̱l ta.

1 Corintios 14:20

Ex inherma̱n, chanchanakex li cꞌulaꞌal xban nak eb li cꞌulaꞌal incꞌaꞌ nequeꞌxba̱nu li ma̱usilal. Abanan mexcꞌoxlac joꞌ nequeꞌcꞌoxlac li cocꞌal. Tzꞌakalak ban re ru le̱ cꞌaꞌux xban nak moco cocꞌalex ta chic.

1 Corintios 5:6

Me̱nimobresi e̱rib riqꞌuin xcꞌoxlanquil nak us yo̱quex chixba̱nunquil. La̱ex nequexinjuntakꞌe̱ta riqꞌuin xkꞌemal li caxlan cua. La̱ex nequenau nak usta caꞌchꞌin ajcuiꞌ lix chꞌamal naqꞌueman, naxchꞌamobresi chixjunil li kꞌem. Naraj naxye nak incꞌaꞌ naru nacuan li ma̱c saꞌ xya̱nkeb laj pa̱banel re nak incꞌaꞌ teꞌxcꞌam xbeheb li jun chꞌol chic chi ma̱cobc.

1 Corintios 5:2

La̱ex nequekꞌetkꞌeti e̱rib ut toj cuan li ma̱c saꞌ e̱ya̱nk. Narahoꞌ raj e̱chꞌo̱l ut nayotꞌeꞌ raj e̱chꞌo̱l xban xyibal ru li ma̱c li yo̱ xba̱nunquil saꞌ e̱ya̱nk. Li ani xma̱cob chi joꞌcan xerisi raj saꞌ e̱ya̱nk.

1 Corintios 4:18

Cuan li xeꞌkꞌetkꞌetoꞌ saꞌ e̱ya̱nk. Eb aꞌan nequeꞌxye nak ninxucuac. Joꞌcan nak incꞌaꞌ chic ninxic e̱riqꞌuin.

1 Corintios 4:10

La̱ex nequecꞌoxla nak ma̱cꞌaꞌ kanaꞌleb xban nak nakachꞌolob resil li Cristo ut la̱ex cuan e̱naꞌleb xban nak nequenau nabal chirix li Cristo nak nequecꞌoxla. La̱o ma̱cꞌaꞌ kacuanquil ut la̱ex cuan e̱cuanquil nak nequecꞌoxla. Saꞌ e̱chꞌo̱l la̱ex nak la̱ex nequex-oxlokꞌi̱c ut la̱o tzꞌekta̱nanbilo.

1 Corintios 1:5

Xban nak junajex chic riqꞌuin li Cristo, xema̱tani li rusilal li Dios. Cha̱bil chic nequex-a̱tinac ut cha̱bil chic le̱ naꞌleb xban nak nequenau chic lix ya̱lal.

Romanos 14:22

Cui nacanau chi tzꞌakal nak us yo̱cat chixba̱nunquil, canab saꞌ rukꞌ li Dios. Us xak re li ani narecꞌa saꞌ xchꞌo̱l nak moco ma̱c ta li yo̱ chixba̱nunquil.

Romanos 14:14

Xban nak ninpa̱b li Cristo, joꞌcan nak ninnau nak ma̱cꞌaꞌ re̱cꞌ xtzacanquil li cꞌaꞌak re ru. Abanan cui junak narecꞌa saꞌ xchꞌo̱l nak ma̱c xtzacanquil junak tzacae̱mk, us cui incꞌaꞌ tixba̱nu.

Romanos 14:10

¿Cꞌaꞌut nak nacatrakoc a̱tin saꞌ xbe̱n la̱ cuech aj pa̱banelil? Ut, ¿cꞌaꞌut nak nacatzꞌekta̱naheb aj pa̱banel? Incꞌaꞌ naru ta̱ba̱nu chi joꞌcan xban nak saꞌ jun cutan li Cristo ta̱rakok a̱tin saꞌ kabe̱n chikajunilo.

Romanos 12:16

Junajak e̱chꞌo̱l chi ribil e̱rib. Me̱nimobresi e̱rib chiruheb le̱ ras e̱ri̱tzꞌin, ut me̱cꞌoxla nak numtajenak e̱naꞌleb.

Romanos 11:25

Ex herma̱n, nacuaj nak te̱nau jun li naꞌleb mukmu nak quicuan, li quicꞌutbesi̱c chak xya̱lal chicuu. Cui te̱nau aꞌin incꞌaꞌ te̱nimobresi e̱rib riqꞌuin xcꞌoxlanquil nak cuan e̱naꞌleb. Eb laj judío li incꞌaꞌ queꞌpa̱ban queꞌcacuubresi̱c lix chꞌo̱leb. Abanan eb aꞌan teꞌpa̱ba̱nk ajcuiꞌ nak talajeꞌpa̱ba̱nk lix qꞌuialeb li ma̱cuaꞌeb aj judío.

Romanos 14:19

Joꞌcan nak chikaqꞌuehak kachꞌo̱l chi cua̱nc saꞌ tuktu̱quil usilal riqꞌuineb li kas ki̱tzꞌin. Ut chikatenkꞌa kib chi kibil kib re nak toqꞌui̱k saꞌ li kapa̱ba̱l.

1 Corintios 4:6

Ex herma̱n, chixjunil li xinye chirix laj Apolos ut chicuix re e̱tenkꞌanquil nak xinye. Nacuaj nak te̱tau ru li cꞌaꞌru xinye. Chetzol e̱rib kiqꞌuin re nak te̱ba̱nu joꞌ tzꞌi̱banbil saꞌ li Santil Hu. Incꞌaꞌ naru te̱nimobresi e̱rib xban nak nequeta̱ke li jun ut nequetzꞌekta̱na li jun chic.

1 Corintios 10:15

La̱in ninchꞌolob xya̱lal che̱ru xban nak cuan e̱naꞌleb. Ut la̱ex naru te̱ye ma us li ninye malaj incꞌaꞌ.