Vitendo 13:43 - Ibibiliya mu Shimakonde Imbodi Yaambi na dimbande dya Imbodi Yakala

⁴³ Kutwala nkodyanio paumalilike, vayuda voe pamo na vanu valiinjidyénge vandímwoda Paulu namu Balinaba váshitangola na vanavo vavashomba pakulota vauke mushu muumonyo wake Nnungu.

Vitendo 13:43 ပူးပေါင်းရင်းမြစ်များ

Mateu 23:15

“Mupambale mwenu mmamwalimu mmadishaliya na mmapalishayo. Mmanu mmashinankulaba mwe! Mumalila imanga na mwangu pakulota mumpate wakuliinjidyanga jumo tu bai, mukampata munkumpindula kuva mwana wakushena kumpunda mmene.

Vitendo 11:23

Balinaba akawike kwanavo akone umonyo wa Nnungu pakati pave andípuwanga namene na ashindavanonowanga vanu uti pakulota vavenavo ntima wakukulupilika na kuvalaililila havanamwambukange Umu

Vitendo 13:50

Kanji vayuda vandívatumbilikanga vanang'olo pamo na vakongwe vakulipudya na vakwishimika vapalikaja alyo kutwala vanavo kutunduvanga kuvapapata vapaulu na vandívavinganga mulilanga alyo.

Vitendo 14:22

Mumakaja alo, vanavo vashindapita vavanonowanga vakwoda vavapa ntima pakulota vauke mushu mulikulupililo na vavamanyiya doni, “Indivaikila tupite mumauvilo oe kwambangidya twinjile muutawala wa Nnungu.”

Vitendo 14:3

Napavedoni vandíikala maduva oe namene pa Ikoniu vammalanganga Umu pavakajugulanga shinu na Umu nae ashindaing'a ushuda kwalilove lyaumonyo wake kwaindila yakuvapa dimongo dyakutandela vimanyikilo na vyakutikinikanga.

Vitendo 16:14

Pakati pavakongwe váshitwigwilila andípagwa nkongwe jumo áshilipudya kwa Nnungu walina Lidiya áshishumidyanga dinguvo dyakupapeka dyailangi yanshambalau na wakwalakela kulikaja lya Tiyatila. Umu napane andímuungula ntima pakulota kwigwa shana vyashitangola Paulu.

Vitendo 17:17

Napavedoni nae ashindataukananganavo vayuda na vanu vanji vakunjopa Nnungu mushitala shave shakulipudidya na kutaukananga na vanu vanji váshipita pashiwanja shamikodyanio.

Vitendo 17:34

Kanji vanji vakalyunganiange namu nae, vandíkulupila: pakati pave, Dionishiu washipinga shavaliyopagu, nkongwe jumo walina Damalishi na vanu vanji.

Vitendo 17:4

Bai vayuda vanji vandishambegwa kutwala kulyunganianga namu Paulu namu Shilashi; namomo indílyunganianga imbumba yavagalegu váshilipudya kwa Nnungu pamo na vakongwe voe vakwishimika.

Vitendo 18:7

Bai Paulu andyúma pashitala shakulipudidya po kuka kwing'ande yamunu jumo walina Titu Yustu, munu wakunjopa Nnungu na ing'ande yake indíijamananga na shitala shakulipudidya.

Vitendo 2:10

twálakadile ku Piligiya, ku Pampiliya, ku Mishili, twálakela ku Libiya twíkala pepi na pa Kulene, twálakela kunjini wa Loma,

Vitendo 28:23

Napane vakavike liduva lyakukadyania namu nae, vandímwidila vanu voe palyutu lyashiikala na nae kutunduvangila lyamba mpaka lyulo andívaigwiniya ataa ushuda yautawala wa Nnungu alingangila avashombe kwaing'ano imwe Yesu kutunduvangila mu Lilamulo lyake Musha namomo mu Vakulava.

Vitendo 6:5

Malove ala imbumba yavakwoda uti andívanagwela. Nadoni vandívatandola vanu ava: Shiteva munu walikulupililo lyoe na wakumuumbala Imumu Wanashwe, kwatika Pilipo, Polokolo, Nikanoli, Timoni, Palamena namu Nikolau munu wa ku Antiyokiya e aliinjidyénge mwidini yavayuda.

Valoma 11:6

Napane ikava kenga ni kwaumonyo, hainava shinu kavili kwashimadengo, leka ive davo umonyo haunave kavili umonyo.

Valoma 3:24

vavalangiligwa kuva ishaliya muumonyo wake kenga inudyo kwaindila yakwambola kupagwíte nkati mumwe Klistu Yesu.

Valoma 5:2

Kwaindila yake nae namomo wetu tundipata litala lyakwinjila kwalikulupililo muumonyo au watupagwa na tunkulitamangila mulilindilililo lyalishangelo lyake Nnungu.

Valoma 5:21

kwambangidya kenga mo mwalitawalidile lidambi nkati mukupela, namomo umonyo utawale nkati mwishaliya iidanavo shingumi shíkamalilika kwaindila imwe Yesu Klistu Umu wetu.

II Vakolintu 5:11

Napavedoni pakuva tundimanya kunjopa Umu, tunkuvashomba vanu. Shatuvele sho, shinkumanyika na Nnungu; ninkulindila kenga shinkumanyika momo mmakumbukililo enu amuntima.

II Vakolintu 6:1

Napane, tukola madengo namu Nnungu tunkunnaililila hamunapwashalele bule umonyo wake Nnungu.

Vagalata 5:1

Ivele mupagwe muunaiti shitadídye Klistu amwambole; napavedoni linatele, hamunatawaligwe kavili na likangoti lyautumwa.

Vagalata 5:4

Mwenu múlambela mupate ishaliya kwalilamulo, mundilyapula kumwe Klistu, mundipalanyoka muumonyo wa Nnungu.

Vaepeshu 2:8

Mwaa mundyambwalegwa kwaumonyo kwaindila yalikulupililo; asho hashinaalakela shinu kwenu mwenu, ni inudyo ya Nnungu.

Vapilipo 3:16

Napane ashilá shatuulwile, shosho sho twode.

Vapilipo 4:1

Napavedoni mmanung'unuvangu mwenu mmaninnagwaledya mwemwe wanguvenavo mweshe, mùvele lipuwilo lyangu na lidaka lyangu, imila dadoni mukunanopa nkati mumwe Umu, mwenu mmakunagwaleka vangu.

Vakoloshu 1:23

ikava kenga mundauka mushu mulikulupililo munanopa na mulinatela bila kwambukanga lilindilililo lyantenga wambone wamwigwite uvalangangilíke muviumbi uti vivéle pai. Au ni ntenga wowo uukíle nangutadya nangu Paulu ngùve ntumika.

Vakoloshu 1:28

Ni jojo watummalanganga, tuduma na tumpundisha kula munu nkati mulimanyilo uti pakulota tunnodye kula munu washalowa-uti nkati mumwe Klistu.

Titu 2:11

Mwaa umonyo umwe Nnungu undilyumilidya widanavo kwambolegwa kwavanu uti

Vabalaniya 12:15

Lishunge, hanapagwe wakulota kulinyemya muumonyo wake Nnungu; halunapagwe lushija lwakukalala lwakwipuka pakati penu kutwala kutadya kumwangaishanga na kwambukishigwa vanu voe,

Vabalaniya 13:9

Hamunaleke mutwaligwa mumapundisho oeoe ashijeni mwaa shambone mitima vyetu kunonowangika muumonyo i kwavyakulya víkavaalalidye avalá vaalíle.

I Patulu 5:12

Kwalipwashalelo limwe Shilivanu aijá wanimwamini kuva nung'unumunu wakukulupilika, nangu ndimwandikila mwenu kwaungwipi ninjugwangila na ngumyaa ushuda kenga: au ni umonyo wiu wake Nnungu. Pagwa mukunanopa nkati muumonyo wake Nnungu.

II Patulu 3:14

Napavedoni mmakunagwaleka, akuno mulindila vinu avi likanyalidye pakulota nae ankodye nkati mu amani, múkave lilemba na múkave likosha.

I Nshuwau 2:28

Mmanavangu napanelo pagwa nkati mwake nae kwambangidya dashi, palota kulilodya tuvenavo ntima shii patukalinyemya pamevo pake kwamwaa wadyoni.

II Nshuwau 1:9

Uti aijá ákapagwa nkati mumapundisho amwe Klistu kanji apundanianga anavo, ajo have Nnungu. Napane aijá ápagwa nkati mumapundisho, ankuvanavo Atata namomo kuvanavo Mwana.