Valoma 8:29 - Ibibiliya mu Shimakonde Imbodi Yaambi na dimbande dya Imbodi Yakala

²⁹ Mwaa avalá vávamanyite kaladavo, namomo andivapangila kaladavo pakulota dashi valinganane na ing'ope ya Mwanagwe kwambangidya nae ave ntandi kuvalekwa pakati pavanung'unumunu voe.

Valoma 8:29 ပူးပေါင်းရင်းမြစ်များ

Mateu 12:50

Aijá átandedya mwalatela Atata ávele kuwa, ajo ni mwanetu, numbwangu na ajala.”

Mateu 25:40

Umu kutwa kushidoni, ‘Ninkumwaulila mwiu doni, kula shinu shamuntandalele ndikidiki-uti pakati pavanung'uvangu ava, mungutandalelé nangu.’

Mateu 28:10

Bai Yesu andívaulila kushidoni, “Hamunajope! Wena mukavaulile vanung'unuvangu vauke ku Galileya, koko ko vanangwona.”

Mateu 7:23

Ni apo pangulota kuvaulila ngala doni, ‘Mwiko hanimmanyite. Ngunyema apa mwenu mútandedya ungave-lilamulo.’

Nshuwau 17:16

Vanavo havanava shinu vashilambo kenga mo mwanguvalalele nangu ndikave washilambo.

Nshuwau 17:19

Kwamwaa wavanavo nangu ninkulyapulila pakulota navanavo momo valyapulile nkati muumwiu.

Nshuwau 17:26

Nangu ndivatadya vamanye lina lyako namomo ndauka mushu ndivatadya vakumanye pakulota linagwaledyo lyauvenavo kwangu nangu lipagwe nkati mwave na nangu ngupagwe nkati mwave.”

Nshuwau 20:17

Yesu kushidoni, “Haunangukamule mwaa hangunava kukwela kuka kumwe Atata. Napane wena kwavanung'unumunu ukavaulile doni, ‘Ninkukwela kuka kumwe Atata, jo Tatagwenu; kwa Nnungu wangu, jo Nnungu wenu.’ ”

Valoma 11:2

Nnungu havaitile venentete vake avalá vavamanyite kaladavo. Da mwenu hamumanyite mwatangalela Maandiko amwámba Liyashi mwanjugwidile Nnungu na dimongo kwamwaa wavanaishilaeli?

Valoma 13:14

Leka apo, ngwale Umu Yesu Klistu na hamunaing'e litala lyashimunumunu lyakulota kutandedya malotelo ake.

Valoma 9:23

pakulota uumbala walishangelo lyake umanyike kwavyombo avilá vyamushididi shake vyapanganienge kaladavo kwalishangelo,

I Vakolintu 15:49

Kenga mo mwatulitikila ing'ope yawaulongo, namomo tundalitika ing'ope yawakuwa.

I Vakolintu 2:7

Leka apo, tundátangola limanyilo lyake Nnungu lìpiike mushipii, lyo lyapanganienge wakati ukanava kwalishangelo lyetu wetu.

I Vakolintu 8:3

Napane munu akannagwaledya Nnungu, ajo andimanyika namu Nnungu.

II Vakolintu 3:18

Nadoni wetu uti kwading'ope dyavakatwinikididye twaneka lishangelo lyake Umu, tunkujaluwangigwa kwaing'ope yoyo kwalishangelo kuka kulishangelo, kujaluwangigwa kwalakéla kumwe Umu àvele Imumu.

Vaepeshu 1:11

Nkati mwake momo wetu tunditandegwa kuva maleko, wewe tùpangiligwe kala kwodananavo ishabaa yake aijá átenda vinu uti kwauwamushi wamalotelo ake

Vaepeshu 4:24

kutwala kungwala munu waambi ákandyangigwe kwakulinganana namu Nnungu nkati mwishaliya iu na nkati mukwilimyanga kwiu.

Vapilipo 3:21

Nae andabadilisha mili vyetu vyakudabadabanga kutadya vilinganane na mili wake walishangelo kwaindila yadimongo dintádya aulule kuvika vinu uti mwina mwake.

Vakoloshu 3:10

kutwala kungwala munu waambi ádyuwangidya kavili nkati mulimanyilo kwodananavo ing'ope yake aijá ámuumbile.

II Timoti 1:9

aijá átwambwele na átushamile kwalishamelo lyakwilimyanga i kwamwaa washimadengo shetu kanji kwamwaa waishabaa yake jo mwene na umonyo watupatile nkati mumwe Klistu Yesu tangu wakati úkamalilika ukanava kupagwa

II Timoti 2:19

Napane shitunduvangilo shakunanopa sha Nnungu shinkuka mushu shipagwa shivanavo namakong'o aju, “Umu ankuvamanya avalá vake,” na, “Woewoe átambulanga lina limwe Umu aapukanangenavo ungave-shaliya uti.”

I Patulu 1:2

munditandalegwa kwodananavo mwamanyilile kaladavo Nnungu Atata na munkutandegwa mmakwilimyanga kwaindila ya Imumu pakulota mumwigwilile Yesu Klistu ámyayangidile myadi vyake. Umonyo na amani vyanjadyeke kwenu mwenu.

I Patulu 1:20

Ata ikava kenga mwamanyikidile kaladavo shilambo shikanava kukandyangigwa, andililodya muwakati au wamwisho kwamwaa wenu mwenu;

I Nshuwau 3:2

Mmakunagwaleka, wetu napanelo ni tuvanavake Nnungu na mwatulota kuvalela mo hamunava kulilodya; napane palota kwida po, tundava kenga nae mwaa tundamwona kenga mo mwavalalele.

Maono 13:8

Vanu uti vanáma mushilambo shapai, vandalipudya kwake nae, vanavo ni avalá vákaandikigwe mena ave mulibuku lyashingumi lya Ngandolo ábyaigwe tangu kala pavakandyenge shilambo.