Valoma 7:5 - Ibibiliya mu Shimakonde Imbodi Yaambi na dimbande dya Imbodi Yakala

⁵ Mwaa patushinama mumavalelo etu ashimunumunu, ditamaa dyalidambi dikang'alegwa na lilamulo dishindakola madengo mudimbande dyetu dyamumili kwambangidya tupe vyepo vituúkanavo kukupela.

Valoma 7:5 ပူးပေါင်းရင်းမြစ်များ

Mateu 15:19

Muntima mwamunu munkuma makumbukililo akunyata, kubyaa, kunama nankongwe waukannambile, kulavalava, kwiva, ushuda waushwang'a na kukupulu.

Nshuwau 3:6

Doni, shivalékwa kwamili, mili na shivalékwa kwa Imumu, imumu.

Valoma 1:26

Kwamwaa au, Nnungu avakamudidyé muditamaa dyave dyadyoni, ata mpaka vo vakongwe vave vo, vandibadilisha kutenda wendi muvaikidíle kwakutandela munji múkavaikidile.

Valoma 3:20

mwaa kwaindila yashimadengo shalilamulo hapali álota kuvalangiligwa kuva ishaliya pamevo pake pakuva kwaindila yalilamulo inkutadya lidambi limanyike.

Valoma 4:15

Mwaa lyo lilamulo lyo, linkwidanavo shitundi kanji napane palikapagwite lilamulo, hakupali kupujungula.

Valoma 5:20

Mwenu, lilamulo lindida pakulota dashi, kupujungula kwanjadyeke. Napane po palyanjadyeke lidambi, umonyo undipakatika

Valoma 6:13

Hamunajaule dimbande dyenu dyamili kwalidambi kenga vikalelo vyaungave-shaliya kanji lijaule kwa Nnungu kenga mmanu wavantwete mukupela kuka mushingumi na jaula dimbande dyenu kwa Nnungu kenga vikalelo vyaishaliya.

Valoma 6:19

Ngutangola kenga nimunu kwamwaa wakudabadabanga kwenu kwashimunu. Kulingana kenga mo mwamujaulidile dimbande dyenu muushapu na muungave-lilamulo vyuka kupunda ungave-lilamulo napane ambi jaula dimbande dyenu kenga vatumwa vaishaliya vauka kukwilimyanga.

Valoma 6:21

Da mushipata vyepo shani wakati awo kwavinu vyamwanangila dyoni ambi apa? Mwaa kumwisho kwavinu avyo, kupela.

Valoma 6:23

Mwaa nshala walidambi ni kupela kanji inudyo ya Nnungu ni shingumi shíkamalilika nkati mumwe Klistu Yesu Umu wetu.

Valoma 7:23

kanji mudimbande dyamumili mwangu ninkwona lilamulo linji litandána ing'ondo na alilá lilamulo lyamuding'anong'ano dyangu, lilamulo lyolyo lingutádya nguve nintumwa walilamulo lyalidambi livéle mudimbande dyamumili mwangu.

I Vakolintu 15:56

Mwenu, ishumu imwe kupela, lidambi na dimongo dimwe lidambi, lilamulo.

II Vakolintu 10:3

Mwaa ata tukanama shimunu, hatunatenda shinu ing'ondo kwodananavo shimunu.

Vagalata 3:10

Mwaa uti avalá vakulupíla lilamulo vandilanigwa kwoda indyandikigwa doni, “Alaanigwe aijá ákapagwa muvinu avi uti vyandikígwe mulibuku lyalilamulo na vinu avyo me kutandedya.”

Vagalata 5:24

Vamwe Klistu Yesu, shimunumunu shave vandikamela panshalaba pamo na ditamaa na malotelo ake.

Vaepeshu 2:11

Napavedoni mwenu kumbukila doni, mwemwe mwe muvéle mmamidi kwamili, múshishamegwa mmashungu kwa avalá vashamégwa vakukumuligwa, shinu shavatenda mumili na makono,

Vaepeshu 2:3

Pakati pave nawetu momo tushindalilangalalela kwamalotelo ashimunumunu, tutandedya malotelo amili na anding'anong'ano. Nadoni kenga vanji uti, nawetu momo kwashimunumunu tundípagwa mushitundi shake Nnungu.

Vakoloshu 3:5

Nadoni nkati mwenu, pedya uti avilá vyashimunumunu; kulavalava, ushapu, ditamaa, malotelo aukalau na ing'ou, ako ni kulipudya kwavyakushang'apa.

Titu 3:3

Mwaa ata nawetu kala po, tuvele tuvanu túkave ding'ano na túkaigwilila vatwashadyenge tuva tuvatumwa kwavinu vyakula inamuna na ditamaa, shingumi shetu tunama mushishimwashimwa na mwing'ou, tuvangadika na tuvangadyania.

Tiyagu 1:15

Napanelo malotelo ala akaimita livalekwa lidambi kutwala lidambi palikulumuka po, limmaleka kupela.

Tiyagu 4:1

Ding'ondo na kupwatananga vipagwíte pakati penu po, vyalakela kwashi? Da havinaalakela shinu nkati muditamaa dyenu adilá dyakunyata ditandána ing'ondo nkati mwenu mo?

I Nshuwau 3:4

Kula ánatenda shimadambi namomo ankutenda ungave-lilamulo mwaa lidambi ni ungave-lilamulo.