Yobu 8:10 - ALLALA KUMƐ

¹⁰ Woletɔ ma ni hɛnkili nyini ma benbanu bolo. Kebi fɔlɔ, bɛɛ ya a lɔn ko hakɛ-tiginu si tɔrɔ. Anu bi nala ma hɛnkili kɔla anuta lɔnnɛ min na, ma ni wo lamɔɛn.

Yobu 8:10 ပူးပေါင်းရင်းမြစ်များ

Yobu 32:7

N ya n miri n nyɛrɛ ma ko wole ni hɛnkilimaya-kumɛ fɔ bawo kina le wole la.

Yobu 8:11

Kebi fɔlɔ, ma benbanu si nyinikali kɛ, “Sɔnfɔn si bɔ gbele ma, wa? Ade, mɔgɛ si anu taran fuyi le tɔ.

Yobu 8:9

bawo male sɔrɔn-san le, ado ma hɛnkili dafani ma. Maleta wati manɛ tele-dande la duninya kɛ rɔ iko ninɛ si tenbi nya min.

Yaburi 145:4

Denbɛnu si ila ko-makawanɛ rakaran anuna dannu ye. Anu si ila wɔli-nyimɛ faranfasi anuna dannu ye.

Hɛnkilimaya-Kumɛnu 16:23

Yanni hɛnkilimɛ ni kuma, a si a miri. Ni a ya kuma-wo-kuma fɔ, hɛnkilimaya-kuma-bɛrɛbɛrɛ le wo la min si mɔgɛ karan a kilɛ fɛ.

Hɛnkilimaya-Kumɛnu 18:15

Hɛnkilimɛ si karan tuma-wo-tuma, ado tuma-wo-tuma, a ye hɛnkili-kura-nyinɛ la.

Matiyu 12:35

Mɔgɔ-nyimɛ si ko-nyimɛ labɔ ata nyimayɛ rɔ. Sɔn-yogoma-tigi si ko-yogomɛ labɔ ata sɔn-yogomɛ rɔ.

Tɔn-Fɔɛ-Fila-Nyɔgɛ 11:19

Wo taranta kan-bo-kan, wo tenbi luyi ma wo, wo tenbi bɔn na wo, wo tenbi wɔlila anubɛ wo tenbi wo sulenna, wo ni to wola dannu makolola karan kɛ la. Wo ni to anu karanna wola dannu ye tuma-wo-tuma.

Tɔn-Fɔɛ-Fila-Nyɔgɛ 6:7

Wo taranta kan-bo-kan, wo ni to wola dannu makolola karan kɛ la. Wo tenbi luyi ma wo, wo tenbi bɔn na wo, wo tenbi wɔlila wo, wo tenbi wo sulenna wo, wo ni to a karanna wola dannu ye tuma-wo-tuma.

Hiburunu 11:4

Dɛnkɛninyɛ le fɛ, Ebɛli ya saraka-bɛrɛbɛrɛ bɔ Alla ye min tenbira Kenta sarakɛ la. Alla nyɛrɛ sɔnta ata kɔ-fannu na ka a yira ko a ara a hɛnɛ. Ala dɛnkɛninyɛ fɛ, hali Ebɛli faganɛ kɔnɔ ha bi, a ya koe min ma, wo ye kumala ma ye.

Hiburunu 12:1

Nba, ma ara mɔgɛ min bɛɛla ko fɔ wo ye nun, ma lafoonɛ wonu na. Anu bara anuna dɛnkɛninyɛ lagbɛ ma ye. Woletɔ koe min bɛɛ si a ma, ma ni bui, ma ni wonu boloka. Hakɛ min bara ma bira gben, ma ni wo bɛɛ boloka! Nyɔgɔn-to-buri min bi ma yarɔ, ma ni ma tunadiya wo ma wona.