Yobu 2:12 - ALLALA KUMƐ

¹² Anu tora wula-yan la, anu ya ale Yobu mafiliyanɛ yen kirayɛ bolo. Anu ya a ragbɛ wati min, anu donta diyi-kɛ rɔ ka anuna durukinu tafara yisi-tinya bolo. Wo kɔma, anu ya gbangban yuluyulu anu kunyɛ rɔ.

Yobu 2:12 ပူးပေါင်းရင်းမြစ်များ

Ko-Dabirɛnu 27:34

Isɔ ya a fa kuman-kan kɛ lamɔɛn tumɛ min, a dira biribiri! A ya a fɔ a fa ye ko, “E, n fa, i yandi, duwa nde fanan ye.”

2 Samuwɛli 13:36

A ma a kuli wo laban defan, Dawudala dan wonu ya anu kunyɛ ladon bɔn la. Anu dama donta di kɛ rɔ. Dawuda anubɛ ala mɔgɔ-banu fanan donta di kɛ rɔ.

Ɛsira 9:3

Kuma sufa kɛ lamɔɛn n bolo, n ya nna duruki rafara n kan na ka n kun-sigi anubɛ n buyɛ mawurun yisi-tinya bolo. N yisi-tinyanɛ ya n sigi dugi ma.

Nihɛmaya 9:1

Karɛ wo nyɛrɛ, a tele mogan-ni-nani nyɔgɛ ma, Isirɛla mɔgɛnu ya anu nadɛn ka sunyɛ don alako anu ni anuta yisi-lafinyɛ yira Mari la. Anu ya kasa-kurɛnu kɛ anu ma ka gbangban kɛ anu kunyɛ rɔ ka diyi-kɛ sɔnsɔn a la. Wo si a yira ko anu nimisanɛ. Wo wati ya a taran, anubɛ sibolo-gbɛrɛnu sa gbundu kelen tɔ tun. Anu bara anu fara wonuta gbundi la nun. Wo kɔma, anu ya anu sɔ anu hakɛ la anubɛ anu benbanu bara min tinya.

Ɛsita 4:1

Kuma sufa wo lamɔɛn Mɔdekɛyai bolo, a ya ala duruki rafara yisi-tinya bolo. A ya kasa-kurɛ kɛ a ma. A ya ta-gbangban kɛ a kunyɛ rɔ. A ya soe bira diyi-kɛ anubɛ woronde la a bolo.

Yobu 1:20

Yobu ya wonu namɔɛn tumɛ min, a ya ala duruki rafara yisi-tinya bolo. A ya a kunyɛ sii. A ya a laburun dugu ma ka Alla bato.

Yobu 19:14

N na-kelen-nyɔgɛnu bara anu masɛgi n na. N kenintenu bara nyina n ko salon!

Nimisa Koe 2:10

Yerusalɛm mɔgɔ-banu-makinikininɛ sigini dugi ma. Gbangban kɛnɛ anu kunyɛ rɔ. Kasa-kurɛ bilanɛ anu kan na alako ka a yira ko anu bi saya-di-kɛ tinɛ. Hali sunkurun-mɛsɛnu, wonu sanɛ dugi ma yisi-tinya bolo.

Isikiyɛli 27:30

Anu bi dila ale Taya soela ko la biribiri! Anu bi gbangban kɛla anu kunyɛ rɔ ka anu sa bugurɛ rɔ di-kɛ-tinɛ.

Yasowa 7:6

Yasowa anubɛ Isirɛla mɔgɔ-banu ya anuna durukinu tafara yisi-tinyɛ bolo. Anu ya anu nyɛrɛ fɛrɛn dugu la Marila tɔn-kenkirɛ yakɔrɔ. Anu ya gbangban kɛ anu kunyɛ rɔ ka a yira ko anu bara nimisa. Anu telenta sani dugu ma gbɛn!

Lankɛnimayɛ 18:19

Anu ya gbangban kɛ anu kunyɛ rɔ yisi-tinya bolo. Anu gbele-gbelenta di-kɛ-tinɛ ko, “E, gbalo! Gbalo ye so-karantan wo kuma! Soe le nun. Kulun-tigi min bɛɛ ye kɔgɔ-yi kuma, anu bara ma nɔnfulu-tiginu na ala nɔnfuli rɔ! Kɔnɔ a ara bɔnɔ fan wo bɛɛ rɔ hawa kelen pe kɔrɔ!”

Kɛlɛ-Kurugbɛnu 2:4

Melika ban kɛ fɔla, Isirɛla mɔgɛ bɛɛsi donta diyi-kɛ rɔ.

1 Samuwɛli 11:4

Anuna kilayɛ kera Kibiya soe burɔ Mansa Sɔli ye kan min. Anu ya nimisa-koe wo rakaran anu ye min kɛ, mɔgɔ damasi donta diyi-kɛ rɔ.

1 Samuwɛli 30:4

Dawuda anubɛ ala keminɛnu dira furr, ha anu bandanta.

1 Samuwɛli 4:12

Bɛnyamɛ bɔnsɔn-mɔgɛ do burimatoe bɔra kɛlɛ rɔ ka ta fɔɔ Sailo. A kera nyɔ wulɔn-tele kɔrɔ. A ya ala duruki wo rafara ka gbangban kɛ a kunyɛ rɔ ka a yira mɔgɛnu na ko a yisi tinyanɛ.