Yɛrɛmaya 51:11 - ALLALA KUMƐ

¹¹ Mari ara Midiya mansɛnu natugu Babilɔn kɛnu ma bawo a miriya sa fenfen ma fɔ ka anu nato. Anu bara a Bato-Bɔn tinya min kɛ, a ye wo le yili-sarɛ la wo la. Midiya kɛlɛ-den-kunyɛnu si a fɔ ko, “Wo ni wola kalabɛnnu nasulen boiboi! Wo ni wola nɛgɛ-lufɛ bira wo bolo tɔ ka wo sɔ-bole rabɛn.

Yɛrɛmaya 51:11 ပူးပေါင်းရင်းမြစ်များ

1 Mansɛnu 11:14

Mari ya a ma, Mansa Hedadi min bi Idɔm nyamanɛ kun na, wo wulita Mansa Silamɛni kan ma.

1 Mansɛnu 11:23

Alla ya a ma, Ilayadala den Reson wulita Mansa Silamɛni kan ma fanan. Mansa Hadadisa min bi Soba nyamanɛ kun na, Mansa Dawuda ya wo nɔ kɛlɛ rɔ nun anubɛ Siriya kɛlɛ-dan minnu nara a dɛnbɛ tinɛ kɛlɛ rɔ. Wo kɔma, ale Reson ya a buri Mansa Hadadisa kɔrɔ nyɔ le. A tara ma mɔgɔ-mabuilɛnuna kun-tigi la. Anubɛ ala keminɛ wonu tara sigi Damasika soe burɔ. Anu tara a ma Siriya mansɛ la nyɔ rɔ.

1 Ko-Kɔrɔta-Karan 5:26

Woletɔ Alla ya a ma, Asiriya Mansa Pulu tara bui anuna nyamanɛ wo ma. (Ale mansɛ tɔgɛ do le fanan Tigilati-Pilesa.) Rubɛn bɔnsɔn wo, Kadi bɔnsɔn wo, Manasa bɔnsɔn-talɛ wo, ale Mansa Pulu ya wonu bira ka ta anu na pon! A ya donu sigi Hela sigisɔn rɔ. Wo kɔma, a tara donu to Hara sigisɔn rɔ. A tara donu fanan to Koson sigisɔn rɔ min bi Hebɔ bɛ dafɛ. Anu bi nyɔ wara la ha bi.

2 Ko-Kɔrɔta-Karan 36:22

Mansa Sairasila mansayɛ san fɔlɔtɛ Pasiya nyamanɛ rɔ, Marita Nɛbi Yɛrɛmayata nɛbiya-kumɛ bɔra-a-la. Mari ya Mansa Sairasi yisi-kɔrɔ-tugu alako ka kilayɛ kɛ ranyɛnsɛn ala nyamanɛ mumɛ bɛɛ rɔ.

Ɛsira 1:1

Pasiya Mansa Sairasila mansayɛ san fɔlɔtɛ ma, Mari ya min fɔ Nɛbi Yɛrɛmaya ye, wo bɔra-a-la. Mari ya a ma, Mansa Sairasi ya sereya do sɛbɛ min si karan ala nyamanɛ kan tinɛ bɛɛ rɔ.

Aiseya 10:26

A ko a si anu natɛn gbɛn la iko a ya Midiyannu natɛn gbɛn la nya min Ɔrɛbu kuri dafɛ. A si anu tɔrɔ iko a ya Iyipiti kɛnu tɔrɔ nya min nun Kɔgɔ-Yi-Wulan dala.

Aiseya 21:2

N ya min yen ko-rayirɛ wo rɔ, yanfɛ anubɛ kasarɛ. Ilam kɛlɛ-dannu, wo ni wo sɛbɛ don! Midiya kɛlɛ-dannu, wo ni wo bui soenu ma! Babilɔn kɛnu bara tɔrɔyɛ min nana, Alla si yili kiri wo dan la.

Aiseya 21:5

N ya min yen ko-rayirɛ wo rɔ, ladiya-wati ara ke. Gbolo-rafulennɛ ye sala fen-dɔnnɛnu ye. Bɛɛ ye fen-dɔn kun na. Tiriyante wo rɔ, kuman-kan bɔra ko, “Kɛlɛ-dannu, bɛɛ ni ala kɛlɛ-miran bi!”

Aiseya 41:25

“Nde, Mari ara mɔgɛ do tɔnbɔn tele-bɔɛ wara la. A si wo kɛlɛ dabira kantɔ-wara la. Wo wa na, a si kun-tiginu tatɛntɛn iko bore. A si wonu tatugutugu iko bɔnku-daga-sɔlɛ si bɔnkɛ ramaga nya min.

Aiseya 45:1

Mari le wara Sairasi yabɔ ko a ni ma mansɛ la. A ya a yabɔ alako a ni sibolenu nɔ kɛlɛ rɔ. A ya ale Sairasi sɔ ko a ni sibole wonuna mansaya-sɛnbɛ dɛ makeri. Mari nyɛrɛ le ye soe wonu tarɛ-dɛnu nakala alako ale Sairasi ni don anu kuma. Mari ya a fɔ Sairasi ye ko

Aiseya 45:5

Mari ko Mari le ale la. Alla-wo-alla sa nyɔ ale kɔma. A ko hali Sairasi ma a lɔn, a ye nyinina sɛnbɛ min bɛɛ ma, a si wo bɛɛ di a ma.

Aiseya 46:11

A ko a ye kei do kelela tele-bɔɛ min si yigi wo kuma iko tanbakɔrɔmanɛ. A ko ale Mari ara minnu miriya nun, kei wo le ye anu natɔnbagayala. Ale Mari ko a ara ban a fɔla, ado a ye wo nya na le gbɛn!

Yɛrɛmaya 25:25

Simiri nyamanɛ wo, Ilam nyamanɛ wo, Midiya nyamanɛ wo, nyɔ-mansɛnu wo,

Yɛrɛmaya 46:3

Mari ko Iyipiti kɛlɛ-den-kunyɛnu ya anu dɛ bolobɔ. Anu ko, “Wo ni wola nɛgɛ-walannu bi ka ta kɛlɛ rɔ.

Yɛrɛmaya 46:4

Wo ni karafɛnu sa wola soeenu dɛ ma ka sigi anu na. Wo ni wola nɛgɛ-fulɛnu don wo kunyɛnu na ka wo sɔ wo sansan-yili ma. Wo ni wola tanbɛnu nasulen. Wo ni wola nɛgɛ-durukinu don wo kan na.”

Yɛrɛmaya 46:9

Wo ni soeenu naburi wɛ kɛ. Kirindinu gbɛ ni to. Ini kɛlɛ-dannu nata. Sudan kɛnu anubɛ Libiya kɛnu si nɛgɛ-lufɛnu bi. Lidiya kɛnu si kalɛnu tasagan.”

Yɛrɛmaya 50:25

Mari ko a ara ala kɛlɛ-kɛ-miran-bɔn laka anu kan ma. A ko a fonde ara bɔ ha a si na ala kɛlɛ-kɛ-fan bɛɛsi labɔ anu kan ma bawo ale Mari Sɛnbɛ-Bɛɛ-Tigi ko wɔlɛ ye ata kɛlɛ-dannu ye Babilɔn nyamanɛ rɔ.

Yɛrɛmaya 50:3

“Sibole min bi kantɔ-wara la, wo si na kɛ Babilɔn kɛnu ma. A si Babilɔn nyamanɛ ma wula-da-rakolɔn la. Hadama-den wo, sogo wo, bɛɛ si a buri, ado hali mɔgɔ-den-kolo-kelan ti sigi nyɔ tun.”

Yɛrɛmaya 50:45

Mari ko a ara koe min tabɛn Babilɔn kɛnu kan ma, anu ni anu tole masɔ wo la. Hali anuna dannu, anu yogenu si wonu sagan dugi la. Bɛɛ kun ma si kɔ.

Yɛrɛmaya 50:9

N si sibolo kurun nabɔ kantɔ-wara la ka na kɛ Babilɔn kɛnu ma. Wonu si nyamanɛ kɛlɛ ka a nɔ. Donso-nyana le wonu na, min bole di kalabɛn la dɔgɔma-ma-de!

Yɛrɛmaya 51:12

Wo ni kɛlɛ-tamasere-falafalɛ layɛlɛ san ma alako ma ni soe tarɛ keri. Wo ni kila-kandannɛnu kuma sa. Wo ni anu napɛrɛnnɛnu nata.” Mari ko a ye min sigila Babilɔn kɛnu ma, a si na wo sigi anu ma, yɔ!

Yɛrɛmaya 51:24

Mari ko ata mɔgɛnu si a yen, a ye a tayili sarala Babilɔn kɛnu na ka a tɛgɛ anu ya min sigi ata mɔgɛnu ma Yerusalɛm soe burɔ.

Yɛrɛmaya 51:35

Yerusalɛm kɛnu bi a fɔla ko, “Alamɛ Babilɔn birara a la ka a tɛgɛ anu ya karagbɛlɛyɛ min sigi ma ma. Anu bara ma tɔrɔ min kɛ, alamɛ wo yili sarata anu na.”

Yɛrɛmaya 51:36

Nba, Mari ya a fɔ Yerusalɛm kɛnu ye ko a si anu tayili sara anu yogenu na ka a tɛgɛ Babilɔn ya anu bira boloko-yogomɛ min kɛ. Bɛ minnu bi yigila Babilɔn nyamanɛ rɔ, Mari ko a si wonu kunyɛ gbala.

Daniyɛli 5:30

Wulɔn suyi nyɛrɛ rɔ, mɔgɛ do nara Mansa Bɛlisasa faga tinɛ. Mansa Dariyasi min bi Midiya nyamanɛ kun na, Babilɔn nyamanɛ tora wo bolo. Wo ya a taran, Dariyasi sɔrɔn-san ara san bi-wɔrɔ ani san fila (62) bɔ.

Yowɛli 3:10

Wola nunakɛnu ni wola dɛɛnu gbesi faannu na wo ye ka wola sɔnbɛnu gbesi tanbɛnu na. Hali mɔgɔ-rafaganɛnu ni kɛlɛ kɛ.

Yowɛli 3:9

Wo ni kɛ fɔ bɛɛ ye duninya rɔ ko, “Bɛɛ ni a rabɛn kɛlɛla ko la. Wo ni wola kɛlɛ-kurugbɛnu kele. Wola kɛlɛ-dan bɛɛ ni anu gbɛrɛn anu nyɔgɔn ma ka kɛlɛ labui anu yogenu ma.

Saraka-Masɔlɛnuta Tɔnnu 26:25

N si mɔgɛnu nana wo tɛma ka wo kɛlɛ. Wonu si wo tɔrɔya bawo wo ara sarama-kan tinya min bi ma tɛma wo na. Hali wo ya wo ladɛn wola soenu tɔ alako wo ni kisi wo yogenu ma, n si kiraya-yogomɛ lana wo tɛma min ti dandan muk! Wo ra si nama anu kɔrɔ ka wo nyɛrɛ don anu bolo.

Sakaraya 14:12

Sibolo-wo-sibolo ya Yerusalɛm soe kɛlɛ a kɔrɔmɛ la, Mari si kiraya-fitinɛ lana wonu kuma. Anu kɛndɛ si to, anu bi tuluna. Anu yɛ si tuli anu ya-denkɛ rɔ. Anu nagan si tuli anu dɛ rɔ.

Sakaraya 14:2

Mari ko a si sibole bɛɛ kundɛn kan-tina-kelen ka Yerusalɛm kɛlɛ. Anu si wola soe bi wo bolo ka wola bɔnnu nakolonya ka digin wola musinu ma. Kɛlɛ si ta nyama tɔnkɔn la. A toenu si to wola so-tinyanɛ burɔ nyɔ.