Yemesi 1:19 - ALLALA KUMƐ

¹⁹ N diyana-mɔgɛnu, wo ni wo hɛnkili to kɛ ko! Mɔgɛ bɛɛ ni a kaliya ko-lamɔɛnna kɔnɔ a kana kuma yona. A kana diminya yona,

Yemesi 1:19 ပူးပေါင်းရင်းမြစ်များ

Nihɛmaya 8:18

Ka a bi ladɛn wo tele fɔlɔtɛ ma, ha a tele laban, tele-wo-tele, anu si do karan Allata tɔn-buku wo rɔ. Tele wɔrɔnfila dɛgɛdɛgɛ, anu bi ladɛn wo kun na. A tele segin nyɔgɛ ma, anu ya ladɛn naban kɛ iko tɔn ya a fɔ nya min.

Nihɛmaya 9:17

Anu ma sɔn anu tole sigila ita kumɛ kɔrɔ. I wara kabana-koe min bɛɛ ma anu ye nun kɔrɔma la, anu nyinara wonu ko salon! Anu bilara anu kun-telenmɛ fɛ ka anuna kun-tigi yabɔ min si anu kunyɛ don yɔɔnyɛ rɔ tun iko anu taranta nya min Iyipiti. Kɔnɔ kinikini-mansɛ le ile la. Anu di i ye, ado i si ko-nyimɛ kɛ anu ye. I fonde ti bɔ anu kuma yona. Ila kinikinɛ kolo anu bara la, ado i ma anu boloka mumɛ!

Nihɛmaya 9:3

Hawa sawa, Lifayinu bi anuta Mari Allata tɔn-buku karanna anu ye. A nyɔgɔn hawa sawa fanan, Isirɛla mɔgɛnu bi anu sɔla anu hakɛ la ka anuta Mari Alla bato.

Yobu 32:16

Anu sa kumala min kɛ, nba, n ni n tade wo rɔ, wa? I yɛ lata anu sɔnɛ ma, kuma-wo-kuma sa anu da rɔ tun.

Hɛnkilimaya-Kumɛnu 10:19

Kuma-pɔrɔtɔ-parata-fɔɛ si mɔgɛ don hakɛ rɔ kɔnɔ ni min kunta a dɛ ma, hɛnkilimɛ le wo la.

Hɛnkilimaya-Kumɛnu 13:3

A ma i fɛrɛma kuma-tinɛ woletɔ i niyi la si tanka. Kɔnɔ mɔgɛ min ti a miri kuma-tinɛ, a si a nyɛrɛ kasara yona.

Hɛnkilimaya-Kumɛnu 14:17

Mɔgɛ min yisi lakala, a si kuntanya-koe ladan kɔnɔ hallintore kusan a yisi birala.

Hɛnkilimaya-Kumɛnu 14:29

Ni min si ke a yisi birala, hɛnkilimɛ le wo la. Kɔnɔ mɔgɛ min ti ke a yisi birala, wo ye a yirala ko hɛnkili sa a la.

Hɛnkilimaya-Kumɛnu 15:18

Mɔgɛ min yisi lakala, a si a ma, kɛlɛ ni ta yarɔ tiriya kɔnɔ min si a munyu, wo si kɛlɛ-wuyan bɔ a la.

Hɛnkilimaya-Kumɛnu 15:2

Hɛnkilimɛta kumɛ si hɛnkili di mɔgɛnu ma kɔnɔ kuntanya-kumɛ si to tugula kuntan dɛ rɔ.

Hɛnkilimaya-Kumɛnu 16:32

Yanni i ni sɛnbɛ sɔrɔn ka so-kun kelan gbesi, a fisa, i ni kun i nyɛrɛ ma ka i nyɛrɛ mara.

Hɛnkilimaya-Kumɛnu 17:14

Ka sɔsɔlɛ lawuli, wo mani de iko yi wa balan sɔgɔ. I ni sɔsɔlɛ wo ban yona alako a kana na to koloyala.

Hɛnkilimaya-Kumɛnu 17:27

Kuma-pɔrɔtɔ-parata-fɔɛ ma di ko-lɔnnɛ ye. Mɔgɛ min si ko nya-yen, wo yisi ti bɔ yona.

Hɛnkilimaya-Kumɛnu 18:13

Mɔgɔ ni a tole masɔ yanni a ni kumɛ yabi. Ni min ti wo ma, kun-takolɔn le wo la ado miliyɛ ti bɔ a fɛ.

Hɛnkilimaya-Kumɛnu 18:21

Mɔgɔla kumɛ tenbira niyi anubɛ sayɛ la. Kuma-siyaman-fɔɛ di min ye, wo si nanparan sɔrɔn ka a tɛgɛ a darɔ-kan ma.

Hɛnkilimaya-Kumɛnu 19:11

Hɛnkili ye mɔgɛ min na, wo le ye a yisi birala. Min bi a yɛ lagbanna mɔgɔ sɔn-yogomɛ kun na, wo tigi ara gbiliyɛ di a nyɛrɛ ma.

Hɛnkilimaya-Kumɛnu 19:19

Mɔgɛ min yisi lakala, a si nanparan lana a nyɛrɛ kuma tiriya! I tenbi a bɔla nanparan do rɔ, a ye tala nanparan do ratɛgɛla tun.

Hɛnkilimaya-Kumɛnu 21:23

Yanni i ni nanparan sɔrɔn, a ma i fɛrɛma kuma tinɛ.

Hɛnkilimaya-Kumɛnu 25:28

Mɔgɛ min ti ke a yisi birala, wo mani de iko soe min tarɛ ara wuya.

Hɛnkilimaya-Kumɛnu 29:20

Ni mɔgɔ-wo-mɔgɔ si kuma tiriya, yigi ye kun-takolɔn bolo ka tenbi wo tigi la.

Yilan-Yilan Koe 22:27

Sofɛlɛ ya a yen nkɛkuna, melika masangba tina mumɛ sa tun, a ya a sa kila kole la kelenna! Wo le ya a ma, Belam yisi bɔra ka a dan-natenbi. A ya sofɛlɛ gbesi dabira.

Matiyu 5:22

Kɔnɔ nde ye a fɔla wo ye kaka ko min ba diminya a na-kelen-nyɔgɛ ma, mɔgɔ-banu si wo mɔgɛ kiti. Min ba a fɔ a ta-nyɔgɛ ma ko, ‘Fenfen ma ile la,’ mɔgɔ-banu si wo kiti. Min ba a fɔ a ta-nyɔgɛ ma ko, ‘Ile kun-takolɔn,’ wo tigi ye nyahanama-tɛ-kilɛ le ma.

Maraka 12:37

Mansa Dawuda nyɛrɛ ya a kele ko, ‘Mari.’ Nba, ni Mansa Dawuda ya a kele ko, ‘Mari,’ Allata-Mɔgɔ-Yabɔnɛ si bɔ Mansa Dawuda bɔnsɔn rɔ kama worɔ?” Yisala karan ya a diya don nyama-belebele wo rɔ.

Maraka 2:2

Mɔgɔ-siyaman nara anu nyɔgɔn fɛ ha sɔ-tina wo sɔ-tina ma to hali bonda-dɛ la. Yisa ye Allala kumɛ kawandili bɔla anu ye tumɛ min,

Luka 15:1

Wati do, duti-makelelɛnu anubɛ Alla-batobɛlɛ siyaman nara ka anu tole masɔ Yisa la.

Luka 19:48

Kɔnɔ anu si a faga nya min, anu ma wo lɔn bawo mɔgɛ bɛɛ tora anu tole masɔla a la. A ma di anu ye, hali ala kuma kelen ni tenbi anu tole la.

Kɛwɔlɛnu 1:15

Tele-dande tenbinɛ, dɛnkɛninya-mɔgɛnu bi ladɛn wo rɔ. Anu dama lakofunɛ mɔgɔ kɛmɛ ani mɔgɔ mogan nyɔgɔn (120). Pita ya a lasɔ ka a fɔ anu ye ko,

Kɛwɔlɛnu 10:33

Nba, n ya anu nata i ma kelenna, ado i na-koe kɛ ara i sɔn-nyimɛ yira n na. Awa kaka, Mari ara i sɔ min fɔ tinɛ, ma dama ye i makɔnɔna Mari Alla yakɔrɔ yan ka wo bɛɛ lamɔɛn.”

Kɛwɔlɛnu 13:48

Sibolo-gbɛrɛnu ya wo lamɔɛn tumɛ min, anu sewara. Anu ya Marita kumɛ gbiliya kati! Minnu yabɔnɛ habadan-niyi-sɔrɔn-koe la, wonu dɛnkɛninyara Yisa ma.

Kɛwɔlɛnu 17:11

Nyɔ-mɔgɛnu yisi lakanɛ ka tenbi Tɛsalonaika kɛnu na. Anu ya anu tole masɔ Allala kumɛ la a kin na! Tele-wo-tele, anu bi Allata kitabu fɛsɛfɛsɛla ka a lɔn ni Pɔlita karan le tonyɛ la serr!

Kɛwɔlɛnu 2:42

Wonu tora karanna Yisata kilayɛnu fɛ ka ta-nyɔgɔnyɛ kɛ. Anu tora Marita kima dɔnna anu nyɔgɔn fɛ ka Alla matara.

Ɛfɛsa 4:26

Ni min diminyanɛ mɔgɛ ma, a kana sɔn, ala diminyɛ ni a ladon hakɛ rɔ. A diminyanɛ kana telen gbɛn,

Ɛfɛsa 4:31

Nyɔgɔn-kɔn wo, yisi-bɔɛ wo, diminyɛ wo, wo ni wonu boloka. Wo kana nyɛɛ mɔgɛnu ma ka mɔgɛ manyini, ado wo kana ni-yogoyɛ kɛ wo nyɔgɔn na.

Kɔlɔsi 3:15

Kirasiti ye yisi-kimɛ min dila mɔgɛnu ma, wo ni kun-tigiyɛ kɛ wo yisi rɔ. Alla ara wo ladɛn ka wo ma bagbu kelen na alako wo si yisi-kimɛ kɛ su lɔn nya min. Wo kana ma fisiriwɔlɛnu na.

Kɔlɔsi 3:8

Nba, wo ni koe kɛ bɛɛ boloka kaka, yisi-bɔɛ wo, diminyɛ wo, anubɛ wunduyogoyɛ. Tanama-kumɛ anubɛ kuma-gbondanɛ kana bɔ wo dɛ rɔ mumɛ!

1 Tɛsalonaika 2:13

Ma ye baraka birala Alla ye tumɛ bɛɛ ko ma nara Allala kumɛ la wo ye tumɛ min, wo ya a lamɔɛn ka a bira a kilɛ fɛ. Wo ma a bira iko a bɔra mɔgɛ le bolo. Wo ya a bira iko Allata kumɛ, ado Allala kumɛ ye wɔlila wole dɛnkɛninya-mɔgɛnu burɔ hali kaka.

Yemesi 1:16

N diyana na-kelen-nyɔgɛnu, mɔgɔ kana wo yanfa!

Yemesi 1:2

N na-kelen-nyɔgɛnu Kirasiti rɔ, wo wa don kɔrɔbɔli-subolo-siyamɛ rɔ tumɛ min, wo ni wo bɛɛ lɔn sewɛ la.

Yemesi 1:26

Ni mɔgɛ do ya a miri ko Allata mɔgɛ le ale la, ni a ma a dɛ mara, fuyi le ala dina wo la. A ye a nyɛrɛ mayuwaya tinɛ le dɔrɔn.

Yemesi 2:1

N na-kelen-nyɔgɛnu, wole minnu dɛnkɛninyanɛ ma Mari Yisa, Allata-Mɔgɔ-Yabɔnɛ ma, gbiliya-tigi, kɔni, wo kana mɔgɔ bira-nya lafisaya anu nyɔgɔn ko a yen-nya fɛ mumɛ!

Yemesi 2:5

N diyana na-kelen-nyɔgɛnu, wo ni wo tole masɔ! Alla ara bolo-kolɔnnu yabɔ duninya kɛ rɔ ka anu nama-a-la dɛnkɛninyɛ rɔ. Alla di minnu ye, wonu si mansayɛ sɔrɔn iko a ara lanyiri kiri anu ye nya min.

Yemesi 3:10

Baraka-bira-kumɛ anubɛ dankali-kumɛnu bi bɔla da kelan wo le tɔ. N na-kelen-nyɔgɛnu, wo ma bɛn hali,

Yemesi 4:11

N na-kelen-nyɔgɛnu, wo kana wo nyɔgɔn mapandin ha ka wo nyɔgɔn yiliki. Ni wo ya wo ma, wo ye Alla leta tɔn mapandinna ka a yiliki. Ka a fɔ i si ke a fɔla ko, “Tɔn kɛ bɛnta, tɔn kɛ ma bɛn,” wo kiti-tɛgɛla ma ile la, ado ita wɔlɛ ye min na, wo le, ka tɔn wonu bira wo bolo filɛ la.

Yemesi 5:12

N na-kelen-nyɔgɛnu, kuma-kolomɛ le kɛ la. Wo tenbi lanyiri kirila tumɛ min, wo kana wo gboro. Wo kana wo gboro san-kole rɔ, ni wo ma, dugu-kole rɔ, ni wo ma fanan, fenfen tɔ. Wo ni a fɔ dɔrɔn ko, “Ɔnde,” ni wo ma, “Ade.” Wo le ya a to, wo ti hakɛ kɛ ka yiliki sɔrɔn Alla bolo.

Yemesi 5:19

N na-kelen-nyɔgɛnu, ni do samara wo tɛma ka tonyɛ boloka, ni mɔgɔ-gbɛrɛ ya a lasɛgi tonya-kilɛ ma tun,

1 Yɔni 2:21

Ka a fɔ ko n bi kɛdi sɛbɛla wo ma bawo wo ma tonyɛ lɔn, wo ma de! N bi wo mala le bawo wo ya tonyɛ lɔn, ado wo ya a lɔn fanan ko foninyɛ ti bɔ tonyɛ rɔ muk!