Yasowa 22:5 - ALLALA KUMƐ

⁵ Wo ni Marila tɔn bɛɛsi bira ka lanayɛ kɛ a ye ka a bato wo yisi bɛɛ la iko Nɛbi Musa ya a fɔ wo ye nya min. Wo ni wola Mari Alla keni wo yisi bɛɛ la.”

Yasowa 22:5 ပူးပေါင်းရင်းမြစ်များ

Yaburi 106:3

Mɔgɔ-sewanɛ le wo tigi la min bi ata kumɛ birala ka to ko-latelennɛ kɛla tolon!

Yaburi 78:7

Wo si a ma, wonu fanan ni la Alla la. Alla ara minnu ma, anu ti nyina wonu ko. Anu si to ata tɔnnu birala tolon!

Bɔ-Koe-Iyipiti 15:26

Mari ko, “Wo ni wo tole masɔ n kuman-kan la a kin na! Koe minnu telennɛ nde, Mari Alla yala, wo ni wonu ma ka nta tɔn bɛɛ bira. Ni wo ya wo ma, n ya kirayɛ minnu sigi Iyipiti kɛnu ma nun, n ti wo fenfen sigi wole ma bawo nde, Mari le wo rakɛndɛyalɛ la.”

Bɔ-Koe-Iyipiti 20:6

Kɔnɔ ni min ya n keni ka nta tɔn kɛnu bira, hali wonu bɔnsɔn matiinu, n si nta keninteyɛ yira wonu na.

Bɔ-Koe-Iyipiti 23:13

“Wo kana bɛsɛnu kɔ, hali anu wara-ko-kumɛ kana taran wo da rɔ. N bara min bɛɛsi fɔ wo ye kɛ la, wo ni a ma wo fɛrɛma wonuna ko la.”

Bɔ-Koe-Iyipiti 23:25

Ni wo ya nde, Mari Alla bato, n si dɔn-fan anubɛ yi di wo ma duk, ka kiraya kuntan bɛɛsi bɔ wo tɛma.

Hɛnkilimaya-Kumɛnu 4:23

A ma i fɛrɛma i miri tinɛ bawo tɔ-a-la, i miri-nya si ma i kɛ-nya la.

Aiseya 55:2

I si wodi labɔ fan dola ko rɔ min ti i fa? I si i sara-kunyɛ lagbana, kɔnkɛ ni to i niginigila? Ni wo ya wo tole masɔ ale Mari la, wo si to fen-diyamɛnu dɔnna. Dɔn-fan min bi i sɔndɔmɛ wasala, i si to wo dɔnna.

Yɛrɛmaya 12:16

A ko a sɔgɛ le ye a la nun ko anu ni wole, ata mɔgɛnu kɛ-nya karan. A ko fɔlɔ nun, anu ya wole, ata mɔgɛnu nabila lanyiri-kiri-bole la bɛsi Beyali ye. Kɔnɔ kaka, a sɔgɛ ye a la, anu ni ale Mari tɔgɛ ratɛgɛ lanyiri-kiri-tinɛ. A ye a fɛ anu ni a fɔ ko, “A ye mabɛ Mari tɛma… A ko ni anu ya wo ma, anu bara-koe ti sɛgi kɔma. A ko a si a ma, anu ni taran wole, ata Isirɛla mɔgɛnu kurun tɔ.

Matiyu 22:37

Yisa ya a yabi ko, “A sɛbɛnɛ ko, ‘I ni ita Mari Alla keni i yisi bɛɛ la anubɛ i sɔndɔmɛ bɛɛ la anubɛ i hɛnkili bɛɛ la.’

Matiyu 4:10

Yisa ya a yabi ko, “Setanɛ, bɔ n fɛ! A sɛbɛnɛ Allatalata kitabu rɔ ko, ‘I ni ita Mari Alla kelen pe le bato ka ata wɔlɛ kɛ!’ ”

Matiyu 6:24

“Mɔgɔ ti ke wɔli-kɛla tigi fila ye wati kelan rɔ. Ni a ya wo ma, kelen si diya a ye, kelen si gboya a ye. A si kelan gbiliya ka kelan lafɛya. Wole fanan bi wo nya le. Wo ti Alla anubɛ nɔnfuli nyini nya-kun-kelen.

Luka 1:74

ko a si ma kisi ka ma bɔ ma yogenu bolo. A sɔnta ko ma ni wɔli Alla ye hali ma ma kilan.

Yɔni 12:26

Ni min bi a fɛ ka wɔli n ye, fɔ wo ni bila n fɛ. Woletɔ n bi kan min, nna wɔli-kɛlɛ si taran n fɛ nyɔ. Min ba wɔli n ye, n Fa Alla si gbiliyɛ di wo tigi ma.”

Yɔni 14:15

“Ni nde di wo ye, wo si nna kumɛnu bira.

Kɛwɔlɛnu 11:23

A kera nyɔ tumɛ min, Alla ara ata duwɛ layigi ata mɔgɛnu kuma nya min, wo yen a bolo, a sewara. A ya anu dama makawandi ko anu ni lanayɛ kɛ ka telen Mari ye anu yisi bɛɛ la.

Kɛwɔlɛnu 27:23

N bi Alla min bolo, n bi wo le batola. Wola melika nara n bara su-tenbinɛ.

Romu 1:9

N sere le Alla la ko n bi min fɔ tinɛ, tonyɛ le. N bi wɔlila Alla le ye n yisi bɛɛ la ka ala danta kibara-nyimɛ wara-koe fɔ. Alla ya a lɔn ko wati bɛɛ, n bi n mirila wo ma

Romu 12:9

I ni keninteyɛ yira mɔgɛnu na i yisi bɛɛ la. Bɛɛ ni ko-yogomɛ kɔn. Min kin, wo ni kiri wo le ma.

Romu 8:28

Minnu ya Alla keni, a ara minnu kele ala ko-latɛgɛnɛnu ma, kɔni, ma ya a lɔn ko fenfen wa wonu taran, Allatala si wo yɛlɛma ko-nyimɛ la anu ye,

Tɔn-Fɔɛ-Fila-Nyɔgɛ 10:20

Wo ni wota Mari Alla gbiliya ka ale kelen pe bato. Wo ni ma lanaya-mɔgɛ la ale Alla ye ka wola lanyirinu kiri ale kelen pe tɔgɛ rɔ.

Tɔn-Fɔɛ-Fila-Nyɔgɛ 11:1

Musa ya a fɔ tun ko, “Wo ni wota Mari Alla keni ka ata tɔn bɛɛ bira tuma-wo-tuma.

Tɔn-Fɔɛ-Fila-Nyɔgɛ 11:13

“Min sanɛ wo kuma, n bara Marita tɔn minnu di wo ma bi, wo ni wonu bira. Wo ni Mari Alla keni ka ata wɔlɛ kɛ wo yisi bɛɛ la.

Tɔn-Fɔɛ-Fila-Nyɔgɛ 11:22

“Wo ni wota Mari Alla keni ka ata kumɛ bɛɛsi bira ka ma telenbagɛ la a ye. Ni wo ya tɔn kɛnu bira tuma-wo-tuma,

Tɔn-Fɔɛ-Fila-Nyɔgɛ 13:4

Wo si bila wota Mari Alla fɛ ka a gbiliya bɛrɛkɛ ka ata kumɛnu anubɛ ata tɔnnu bira. Wo ni ale bato ka ma lanaya-mɔgɛnu na ale ye.

Tɔn-Fɔɛ-Fila-Nyɔgɛ 4:29

Wo wati rɔ, ni wo tora wo yɛ lakalanna wota Mari Alla ma ka a nyini wo yisi bɛɛ la, wo si a yen yati!

Tɔn-Fɔɛ-Fila-Nyɔgɛ 4:4

Kɔnɔ mɔgɛ minnu ya anu telen wota Mari Alla ye wo wati rɔ, ha kaka wonu kɛndɛ.

Tɔn-Fɔɛ-Fila-Nyɔgɛ 4:6

Ni wo ya tɔn kɛnu bira, wo si a yira sibolo-gbɛrɛnu na ko hɛnkilimɛ le wole la. Anu ba wola tɔn kɛnu wara-koe lamɔɛn, fɔ anu ba a fɔ ko, ‘Mɔgɛ kɛnu kusan ko ladanna, anu hɛnkili kolo.’ ”

Tɔn-Fɔɛ-Fila-Nyɔgɛ 4:9

“Wo ni a ma wo fɛrɛma de! Wo ara min yen wo nyɛrɛ yɛ la kɛ la, wo kana nyina wo ko wo siyi-tele bɛɛ kɔrɔ. Wo benbanu ya min yen anu sɔra Mari yakɔrɔ Sinayi kɔnkɛ kɔrɔ tumɛ min, wo ni wo rakaran wola dannu anubɛ wo mamanɛnu ye. Mari ya a fɔ nde, Musa ye nun ko n ni Isirɛla mɔgɛnu nadɛn kan-tina-kelen kɔnkɛ wo kɔrɔ nyɔ. Mari ko a sɔgɛ ye a la, anu ni a lamɔɛn a ye nala min fɔla nyɔ woletɔ anu si ale Mari gbiliya anu siyi-tele bɛɛ rɔ. Wo si a ma, anu ni anuna dannu karan alako anu si mata Mari Alla gbiliya nya min.

Tɔn-Fɔɛ-Fila-Nyɔgɛ 5:10

Kɔnɔ a ko ni min ya a keni ka ata tɔnnu bira, hali wonu bɔnsɔn matiyinu, a si ata keninteyɛ yira wonu na.

Tɔn-Fɔɛ-Fila-Nyɔgɛ 6:17

Wo ni a ma wo fɛrɛma. A ara tɔn min bɛɛsi di wo ma, wo ni ata tɔn wo damasi bira.

Hiburunu 12:15

Wo ni a ma wo fɛrɛma ko mɔgɔ-wo-mɔgɔ kana a kan-kɔ sɔ Allala hinɛ la. Wo tigi kana ma iko kɔn-suli-kunayanɛ bawo a si a matii ka a marɛ ranyɛnsɛn mɔgɛ bɛɛ tɛma min si anu sɔndɔmɛ latinya.

Yemesi 1:12

Mɔgɔ-sewanɛ le wo mɔgɛ la min si lanayɛ kɛ kɔrɔbɔlɛ rɔ bawo ala kɔrɔbɔlɛ wa ban tumɛ min, a si barayi min sɔrɔn, wo le a niyi-bɛrɛ la. Minnu bara Alla keni, Alla ara lanyiri kiri wonu ye ko a si barayi di anu ma.

Yemesi 2:5

N diyana na-kelen-nyɔgɛnu, wo ni wo tole masɔ! Alla ara bolo-kolɔnnu yabɔ duninya kɛ rɔ ka anu nama-a-la dɛnkɛninyɛ rɔ. Alla di minnu ye, wonu si mansayɛ sɔrɔn iko a ara lanyiri kiri anu ye nya min.

Yasowa 23:8

Kɔnɔ wo ni bila wota Mari Alla fɛ iko wo ya a ma nya min fɔlɔ ha kaka!

Lankɛnimayɛ 15:3

Anu bi Allala wɔli-kɛlɛ, Nɛbi Musa, anubɛ saga-danta bɛti bɔla ko, “Mari Alla Sɛnbɛ Bɛɛ Tigi, ila kɛwɔlɛnu kolo. Anu makilanta! Sibole bɛɛta Mansɛ, i kɛ-nyanu telennɛ. Tonya-kilɛ le anu na.

1 Samuwɛli 12:20

Samuwɛli ya a fɔ ko, “Wo kana kilan. Hali wo ara ko-yogoma-su kɛnu ma, wo kana wo kan-kɔ sɔ Mari la. Wo ni ata wɔlɛ kɛ wo yisi bɛɛ la.

1 Samuwɛli 12:24

Wo ni Marila tɔnnu bira ka ata wɔlɛ kɛ wo yisi bɛɛ la. A ya ko-makawanɛ minnu ma wo ye nun, wo ni wo miri wonu ma.

1 Samuwɛli 7:3

Samuwɛli ya a fɔ Isirɛla mɔgɛnu ye ko, “Ni wole ya wo ya-lamunun Mari la wo yisi bɛɛ la, fɔ ni wo ya wola bɛsɛnu nakɛ a rɔ katarala wola bɛsɛ ma min nadannɛ musila muninyɛ rɔ min tɔgɛ Asitɔra. Wo ni wo nyɛrɛ dantɛgɛ Mari kelen pe le ma ka ale kelen pe bato. Ni wo ya wo ma, ale si wo tanka Filisitinu masibɛ ma.”