Yaburi 71:20 - ALLALA KUMƐ

²⁰ I ya tɔrɔyɛ anubɛ dumɛ lana n ma, hali wo, i si na n sɛnbɛ kuraya. I si a ma, n ti yigi kanbɛ rɔ tun.

Yaburi 71:20 ပူးပေါင်းရင်းမြစ်များ

2 Samuwɛli 12:11

Mari ko a ara ban a latɛgɛla ko fɔ ila bonna-mɔgɛ do wa tɔrɔyɛ lana i kuma. A ko fɔ a wa ila musinu bi i bolo ka anu di kei-gbɛrɛkɛ ma. Wo wa ma tumɛ min, i si a lɔn wo rɔ ko a ara min fɔ, tonyɛ le wo la. Kei wo si a sa ila musinu fɛ tele rɔ gbaga!

Yaburi 119:25

N bi n masɔrɔkɔnna gbangban rɔ nɔlɛ bolo. I yandi, n niyi lasɛgi n ma tun iko i wara n yili-madiya nya min nun.

Yaburi 138:7

N nafoonɛ tenbi tɔrɔyɛ la, ile le si n nakanan. N yoge minnu yisi bɔnɛ, i wara i sɔ wonu na. I ya n nakanan ita sɛnbɛ la.

Yaburi 16:10

bawo n yili-latɛgɛnɛ le ko ile Mari ti i ban n na ka n kunyɛ ladon lakira. I ti sɔn ita mɔgɔ-latelennɛ ni tuli kanbɛ rɔ.

Yaburi 60:3

I wara a ma, ita mɔgɛnu bara tɔrɔ kosɛbɛ! Ma ye tonko-tankanna iko gbɛɛtoe si tonko-tankan nya min.

Yaburi 60:5

I ni mala madiyali-kan lamɔɛn ka ma kisi ila sɛnbɛ-wɛ la alako i diyana-mɔgɛnu si kanan nya min.

Yaburi 80:18

Ma ti ma kan-kɔ sɔ i la tun! I ni ni-kura keni ma ye. Wo si a ma, ma ni to i matɔgɔla tolon!

Yaburi 85:6

I ti ma lakuraya tun alako male, ita mɔgɛnu ni i matɔgɔ?

Yaburi 86:13

Ila keninteya-dannatɛgɛbɛlɛ kolo n ye. I wara n nakanan lakira-masibɛ ma.

Yaburi 95:4

Ka a bi faran-kolenu ma ha ka a labɔ kɔnkɔ-layan-bɛnu kuma, Mari ye duninya mumɛ bɛɛ marala.

Aiseya 26:19

Mala mɔgɛ minnu bara faga nun kɔrɔma la, wonu niyi si sɛgi anu tɔ tun. Anu niyi si bila anu bagbuyi rɔ. Minnu bɛɛ ye kinɔgɔla kaburu rɔ, wonu si kunden ka sewa-sigi sa. Iko duri ye a diya donna gbangban rɔ nya min, Mari fanan bi niyi lasɛgila mɔgɔ-fagani-kɔrɛnu tɔ wo nya na le.

Aiseya 38:17

Nna gboyanayɛ mara n ye kun-nadiyɛ la. I taranta n natankala gbalo-koe bɛɛ ma. I ye n hakɛ bɛɛ makotola.

Yona 2:6

I ya n nayigi kɔgɔ-yi kɔrɔ ha kɛnkɛn dabira tinɛ. Yi kankanta n ma, a tora sɛ, a ni lakira-dɛ latogon n ma. Kɔnɔ ile Mari Alla ya n kɛndɛ labɔ dumɛ wo kuri la ka n nayɛlɛ.

Maraka 15:34

Tele-makimɛ-wati (3 pm), Yisa gbele-gbelenta kan-ba la. A ko, “Iloyi, Iloyi, lama sabakatani?” Wo kɔrɛ le, “Nta Alla, nta Alla, i wara n boloka nfenna?”

Kɛwɔlɛnu 2:24

Kɔnɔ Alla ya a lawuli ka bɔ furinu tɛma. A ya a hɔrɔya saya-dumɛ ma bawo a ti ke tola biralɛ rɔ sayɛ bolo,

Ɛfɛsa 4:9

Nba, ma ti ke a fɔla ko, “A yɛlɛta san ma,” ni a ma yigi dugu-kole kɛ kuma nun fɔlɔ.

Lankɛnimayɛ 7:14

N ya a yabi ko, “N fa, nde ma a lɔn. Ile le ya wo lɔn.” A ya a fɔ n ye ko, “Minnu bara kisi ka bɔ bɛnsɛnkɔninya-wɛ rɔ, wonu denu bi wonu na. Anu ya anuna duruku-yannu ku ka a ma, anu ni gbɛ saga-dan-yele rɔ.

1 Samuwɛli 2:6

Mari le si mɔgɛnu faga, ado ale le si niyi bila mɔgɛnu tɔ. Ale si mɔgɛnu nata lakira, ado ale fanan si anu nabɔ nyɔ.