Yaburi 33:3 - ALLALA KUMƐ

³ Wo ni bɛti-kurɛnu bɔ a ye. Wo ni mɔlɔnɛ tɛgɛ sɔrɔn fɔ tinɛ. Wo ni a lawɔyɔ sewɛ bolo.

Yaburi 33:3 ပူးပေါင်းရင်းမြစ်များ

1 Ko-Kɔrɔta-Karan 13:8

Mansa Dawuda anubɛ ala mɔgɛnu bi tala anu dɔnna anu sɛbɛ-kuna-wɛ la. Anu bi sigi sala anu sɛnbɛ bɛɛ la. Sɔrɔnnu anubɛ yonbenu anubɛ wasanbɛnu anubɛ burinu kɛnɛ a rɔ ka Alla gbiliya.

1 Ko-Kɔrɔta-Karan 15:22

Anu ya Kɛnɛnaya ma tolonnɛ wonuna kun-tigi la bawo a kusan tolon koe la dɔgɔma-ma.

1 Ko-Kɔrɔta-Karan 25:7

Tolonna mɔgɔ mogan-ni-nanɛ kɛnu kusan dɔgɔma-ma-de! Anu ta-nyɔgɔ Lifayi bɔnsɔn-mɔgɛ doinu fanan kusan fɔli-fannu fɔla. Tolonnɛ wonu damasi lakofunɛ, anu mɔgɔ kɛmɛ fila, mɔgɔ bi-segin anubɛ mɔgɔ segin (288) de!

2 Ko-Kɔrɔta-Karan 34:12

Wɔli-kunyɛ wonu natelenta. Hali mɔgɔ ma anu manyinika wodi wo lawɔli-nya ma. Lifayi mɔgɔ-ba nani bi nyɔ fanan min bi wɔli-kun mɔgɔ sawɛ kɛnu makawandila. Mɔgɔ-ba nanɛ wonu tɔgɛ le kɛnu na, Yehati anubɛ Obadaya ka bɔ Mɛrari kebila-mɔgɛnu tɔ anubɛ Sakaraya anubɛ Mɛsulam ka bɔ Kohati kebila-mɔgɛnu tɔ. Lifayi bɔnsɔn-mɔgɛ min damasi kusan fɔli kɛla,

Yaburi 144:9

E, Alla, n si bɛti-kurɛ bɔ i ye. N si bɔlɔn fɔ ka sigi sa i ye.

Yaburi 149:1

Bɛɛ ni Mari tanto. Wo ni bɛti-kurɛ bɔ Mari ye. Ala lanaya-mɔgɛnu na ni dɛn ka a tanto.

Yaburi 40:3

A ya n karan bɛti-kura-sɛ ma min si mata Alla tanto. Minnu ba kɛ damasi yen, wonu si hɛnkili sɔrɔn ka anu yigi sa Mari rɔ.

Yaburi 40:4

Mɔgɔ-sewanɛ le wonu na minnu yigi sanɛ ile Mari rɔ. Wonu ti la bɛsɛ la, hali ka kofu a kɔlɛnu ma.

Yaburi 96:1

Wo ni bɛti-kurɛ bɔ Mari ye. Duninya mumɛ bɛɛ ni bɛti bɔ Mari ye.

Yaburi 98:1

Wo ni bɛti-kurɛ bɔ Mari ye bawo a ara kabana-koenu kɛ ma ye. A kelen peta sɛnbɛ le ya a ma, a ya nɔ-ko sɔrɔn.

Aiseya 42:10

Wo ni bɛti-kurɛ bɔ Mari ye. Duninya mumɛ bɛɛ ni a matɔgɔ-bɛti bɔ! Min bɛɛ ye kulɔn laburila yi kuma, wo bɛɛ ni a matɔgɔ! Nima-fan min bɛɛ ye kɔgɔ-yi rɔ, wo bɛɛ ni Mari matɔgɔ! Mɔgɔ min bɛɛsi ye nyamani-yannu tɔ, wo ni a matɔgɔ-bɛti bɔ!

Ɛfɛsa 5:19

Yaburi-kumɛnu ni ma wo kirabɔ-fan la. Wo ni bɛtinu bɔ ka Allata siginu sa Mari ye ka a tanto wo yisi rɔ.

Kɔlɔsi 3:16

Kirasitita kumɛ ni sigi wo yisi rɔ ka wara nyɔ. Wo ni wo nyɔgɔn karan ka wo nyɔgɔn makawandi hɛnkilimayɛ la. Wo ni to bɛtinu bɔla Yaburi kitabu rɔ ka sigi-sɛnimɛnu sa. Wo ni bɛti wonu bɔ Alla ye baraka-birɛ la wo yisi rɔ.

Lankɛnimayɛ 14:3

Nyama-siyaman-wɛ wonu sɔra mansaya-sigi-fan anubɛ dali-fen nani anubɛ kɛmɔgɛnu yakɔrɔ. Anu ya bɛti-kurɛ do bɔ, mɔgɔ-wo-mɔgɔ ti ke min bɔla fɔ mɔgɔ waga kɛmɛ, waga bi-nani ani waga nanɛ wonu (144,000), ado wonu denu dɔrɔn kunkara ka bɔ dugu-kole kuma.

Lankɛnimayɛ 5:9

Anu ya bɛti-kurɛ do bɔ. Anu ko, “I si ke ka gbolo-lamininɛ wo bi ka li-kɛɛn wonu bɔ a ma bawo anu bara i faga nun. I ya mɔgɛnu san Alla ye ila sayɛ fɛ ka bɔ bɔnsɔn bɛɛ rɔ anubɛ mɔgɛ bɛɛ rɔ anubɛ sibole bɛɛ rɔ iko anu kan faranɛ nya min.