Ala fondo-bɔɛ mani de iko ya-makeri kelan kɔnɔ dan sa ala nyimayɛ wo la. Ya-yi si to yigila suyi rɔ kɔnɔ sɔgɔma, diyi wo si a laban a bolo nyagalan ma.
Mari ma ala mɔgɛnu tɔrɔ wo nya na fɔ kɛlɛ tara anu na min kɛ. A tara anu na iko fɔn-gbɛlɛmɛ min bi bɔla tele-bɔɛ wara la wo ye tala fen-gbalɛ la nya min.
A ko a ti to wo kɛlɛla. A ti kɔrɔtɔ wo ma. Ni a tora wonu mala wo la, hadama-dan bɛɛ si firan dugu-kole ma. A ya sɔndɔmɛ min bɛɛ ladan, a ti wo bɛɛ lato dogbe!
A ko n ni ta kilayɛ lake kantɔ-wara la Isirɛla mɔgɛnu bi kan min. Mari ko wole, Isirɛla mɔgɛ minnu telenni ma, wo ni sɛgi ale Mari ma. A ko a ti a kolan firindi wo ma tun! A ko a kinikinite, a fondo-bɔnɛ ti to wo kan ma tun.
Wo yili latɛgɛnɛ ko ale Mari kɔrɔtɔnɛ ti to wo ma. Tɔn si sigi ata kɔrɔtɛ la. Wole Isirɛla mɔgɛnu denu bi kumɛ kɛnu fɔla kɔnɔ wo ye ko-yogomɛnu mala iko a di wo ye nya min.
