Romu 5:21 - ALLALA KUMƐ

²¹ Nba, iko hakɛ ya mansayɛ kɛ mɔgɛnu kuma nya min ka sayɛ lana anu ma kɔnɔ Allata hinɛ fanan ye mansayɛ kɛla mɔgɛnu kuma ka mɔgɛnu natelen a nyɛrɛ ye wo nya na le ka ma ladon habadan-nimayɛ rɔ ma Mari Yisa, Allata-Mɔgɔ-Yabɔnɛ baraka rɔ.

Romu 5:21 ပူးပေါင်းရင်းမြစ်များ

Matiyu 25:46

“Nba, wonu si ta habadan-tɔrɔyɛ rɔ kɔnɔ telenbagɛnu si ta habadan-nimayɛ rɔ.”

Yɔni 1:14

Ale min keleta Kumɛ, wo mara mɔgɔni-fin la. A sigira ma tɛma. Ma ya ala gbiliyɛ yen. A fanɛ hinɛ anubɛ tonyɛ la. Gbiliyɛ wo, Allatalata Den kelen pe le ale la min kɛ, a ya wo sɔrɔn a Fa bolo.

Yɔni 10:28

N si habadan-nimayɛ di anu ma. Anu ti halaki mumɛ! Mɔgɔ-wo-mɔgɔ ti ke anu fɔrɔnna n bolo.

Romu 4:13

Alla ya lanyiri kiri Iburayima anubɛ a bɔnsɔn ye ko duninya si ma anutɛ la. Ka a fɔ ko a ya lanyiri kɛ kiri bawo Iburayima ya Allata tɔn-kitabu bira, wo ma. Kɔnɔ a kirita ala dɛnkɛninyɛla ko la. Woletɔ Alla ya a lɔn mɔgɔ-latelennɛ la,

Romu 5:12

Ma benba Hadama le ya hakɛ lana duninya rɔ. Hakɛ wo le nara sayɛ la male hadama-dannu tɛma. Wo ya sayɛ lana mɔgɛ bɛɛ kuma bawo bɛɛ ara hakɛ kɛ.

Romu 5:14

Kɔnɔ ka a dabira ma benba Hadamata wati ma, ha ka a sigi Nɛbi Musata wati la, sayɛ mara mansɛ la mɔgɛ bɛɛ kuma. Hali minnu ma hakɛ kɛ iko ma benba Hadama ya hakɛ kɛ nya min, wonu denu ya Allala kumɛ tinya. Yisa min nara tɔ-a-la, ma benba Hadama mara wo misalɛ la,

Romu 5:17

Tonyɛ le, ka a tɛgɛ mɔgɔ kelan wola hakɛ ma, sayɛ ya mansayɛ kɛ ma kuma. Kɔnɔ Yisa, Allata-Mɔgɔ-Yabɔnɛ ya min ma, wonubɛ kɛ ti sanka anu nyɔgɔn ma. Male ara Allala hinɛ sɔrɔn Yisa baraka rɔ, ado a ya ma sanba telenbagayɛ la fanan. Woletɔ Kirasiti baraka rɔ, male si nɔ-ko sɔrɔn hakɛ ma.

Romu 6:12

Wo kana sɔn, hakɛ ni nɔ-ko sɔrɔn wo ma alako wo ni to wo nyɛrɛ wasala wo diyana-koenu tɔ.

Romu 6:14

ado nɔ-wo-nɔ sa hakɛ bolo wo kuma tun bawo wo sa Nɛbi Musata tɔnnu kɔrɔ tun fɔ Allata hinɛ.

Romu 6:16

Ado nfan, wole ya a lɔn ko wo wa wo nyɛrɛ lasɔnnaya iko yɔɔn ka mɔgɛ dola kumɛ bira, wo ara ma yɔɔn la kun-tigi wo ye. Ni wo tora hakɛ kɛla, wo si ma yɔɔn la hakɛ kɔrɔ, min si a laban sayɛ ma, ni wo ma, wo si ma Allala yɔɔn la ala kuma-birɛla ko la, min si a laban ko-latelennɛ ma Alla ye.

Romu 6:23

Hakɛ sarɛ le sayɛ la kɔnɔ Allala sanbɛ le habadan-nimayɛ la ma Mari Yisa, Allata-Mɔgɔ-Yabɔnɛ baraka rɔ.

Romu 8:10

Hali wo bagbuyi min si faga ka a tɛgɛ hakɛ ma, ni Kirasiti siginɛ wo yisi rɔ, Allala Ni-Sɛnimɛ si a ma, wo ni niyi sɔrɔn, ado wo si a taran, Kirasiti ara koe bɛɛ latelen wole anubɛ Alla tɛma.

Taita 2:11

Alla ara ala hinɛ yira mɔgɛ bɛɛ la alako anu si kisi nya min.

Hiburunu 4:16

Ma ni na ma sɔ Alla yakɔrɔ yisi-latɛgɛ la. Ma si kinikinɛ anubɛ hinɛ sɔrɔn nyɔ le. Ma makoe wa bila fenfen na tumɛ min, a si ma dɛnbɛ wo la.

1 Pita 5:10

Kɔnɔ wo wa tɔrɔ wati-kundu-ni kɔrɔ, hinɛ-bɛɛ-tigi Alla min bi wo kelela ala habadan-gbiliyɛ ma Kirasiti rɔ, ale nyɛrɛ si wo kanbali ka wo sɔ-bole rabɛn gben!

2 Pita 1:1

Nde, Saimon Pita ye kɛdi kɛ sɛbɛla, nde min bi Yisa Kirasitila wɔli-kɛlɛ anubɛ kilayɛ la, kɔni. Minnu bara dɛnkɛninya-bɛrɛbɛrɛ-wɛ sɔrɔn iko male, n bi kɛ sɛbɛla wonu denu ma. Anu ya wo sɔrɔn ma Kisilɛ Yisa Kirasitila telenbagayɛ baraka le tɔ, mata Alla, kɔni.

1 Yɔni 2:25

Kirasiti nyɛrɛ ya lanyiri min kiri ma ye, wo le kɛ la. A ko a si habadan-nimayɛ di ma ma.