Romu 15:14 - ALLALA KUMƐ

¹⁴ N na-kelen-nyɔgɛnu, nde lanɛ a la ko wo fanɛ ko-nyimɛ la, ado wo fanɛ lɔnnɛ bɛɛ la fanan. Tonyɛ le, wo si ke wo nyɔgɔn makawandila.

Romu 15:14 ပူးပေါင်းရင်းမြစ်များ

1 Kɔrɛnti 1:5

Yisa Kirasiti ya a ma, wo ara ma-a-la ko-nyimɛ-bɛɛ rɔ, ado a ya sɛnbɛ di wo ma ka ata kumɛ lake. A ya lɔnnɛ fanan di wo ma a wara-koe rɔ.

1 Kɔrɛnti 12:8

Ata Ni-Sɛnima kelan wo si hɛnkilimaya-kumɛ di do ma. Lɔnnɛ ye kawandili min tɔ, a si sɛnbɛ wo di mɔgɔ-gbɛrɛ ma fanan.

1 Kɔrɛnti 13:2

Hali kawandili-bɔ-sɛnbɛ dira n ma ka lɔnnɛ bɛɛ sɔrɔn ka gbundu-koe bɛɛ lɔn, ni wo ma, dɛnkɛninyɛ ni wara n bolo ha ka kɔnkɛnu bɔ anu gbɛ rɔ, ni keninteya sa n yisi rɔ, fenfen ma n na.

1 Kɔrɛnti 8:1

Nba, bɛsɛnu si kɔ soge minnu na, n bi nala wonu denu wara-koe fɔla wo ye kɛ la. Tonyɛ le ko bɛɛ ya doni lɔn kɛ rɔ. Kɔnɔ lɔnnɛ sifa wo si a ma, mɔgɛ ni wasi wola ko la. Keninteyɛ le si mɔgɛ layɛlɛ.

1 Kɔrɛnti 8:10

Anu sɔndɔmɛ rafaganɛ koe kɛnu tɔ kɔnɔ wole ara hɛnkili sɔrɔn kɛnu ma. Ni anu ya wo yen soge dɔnna bɛsi-kɔ-tinɛ rɔ, wo si a ma, anu fanan ni soge wo dɔn.

1 Kɔrɛnti 8:7

Kɔnɔ dɛnkɛninya-mɔgɛ bɛɛ ma kɛ lɔn. Mɔgɛ donu durunɛ bɛsɛ kɛnu na ko ha bi, fen de wo la niyi ye min tɔ, woletɔ anu sɔndɔmɛ rafaganɛ Alla wara-koe rɔ. Bɛsɛnu si kɔ soge minnu na, anu ba wonu dɔn tumɛ min, anu sɔndɔmɛ ti gbɛ soge wonu dɔn tinɛ.

2 Kɔrɛnti 8:7

Dɛnkɛninyɛ ye wo bolo, wo kusan kumala, ado lɔnnɛ ye wo bolo fanan. Wo ara wo raya ka dɛnbɛnɛ kɛ anubɛ ka wola keninteyɛ yira ma la. Wo ara ma-a-la koe wo bɛɛ rɔ. Woletɔ ma ye a fɛ, wo ni keninteya-wɔlɛ kɛ fanan kɛ foninsereyɛ la.

Ɛfɛsa 5:9

Minnu bi waan rɔ, wonu si to ko-nyimɛnu kɛla ka ko-telennɛnu ma ka tonyɛ fɔ mɔgɛnu ye.

Filipai 1:11

Yisa Kirasiti kelen pe si ke wo lafala ko-nyimɛ minnu na, alamɛ wo yisi fara wonu na. Alamɛ Alla ya gbiliyɛ anubɛ tantolɛ sɔrɔn wo bɛɛ rɔ.

Filipai 1:7

Wo ye n yisi le tɔ wati bɛɛ! Woletɔ a bɛnnɛ ka n miri wo ma wo nya le. Alla ara hɛrɛ min di n ma kɛ, wo ara wotɛ sɔrɔn n fɛ wo bɛɛ rɔ. N bi yele la wo, n hɔrɔyanɛ tumɛ min wo, ma nɔrɔta kibara-nyima-fɔɛ ma ka a lasabati bɛrɛkɛ ma fɛ.

Kɔlɔsi 3:16

Kirasitita kumɛ ni sigi wo yisi rɔ ka wara nyɔ. Wo ni wo nyɔgɔn karan ka wo nyɔgɔn makawandi hɛnkilimayɛ la. Wo ni to bɛtinu bɔla Yaburi kitabu rɔ ka sigi-sɛnimɛnu sa. Wo ni bɛti wonu bɔ Alla ye baraka-birɛ la wo yisi rɔ.

1 Tɛsalonaika 5:11

Woletɔ wo ni wo nyɔgɔn sɛnbɛ don ka wo nyɔgɔn madɛnbɛ iko wo ye a kɛla nya min kaka.

1 Tɛsalonaika 5:14

Ma na-kelen-nyɔgɛnu, wo ni kalabantenu makawandi. Wo ni yisi-latɛgɛ di kilandɔgɛnu ma. Minnu yisi rafaganɛ, wo ni to wonu dɛnbɛna ka wo munyu wo nyɔgɔn kɔrɔ.

2 Tɛsalonaika 1:11

Wo le ya a to, ma ye Alla matarala wo ye tumɛ bɛɛ. Ma ye a tarala ko a ara wo kele nimaya-su min ma, wo kɛ-nya ni bɛn wo ma. Ko-nyimɛ min bɛɛ kɛ-sɔgɛ ye wo la, alamɛ ata sɛnbɛ ya wo dɛnbɛ wo rɔ ka wola kɛwɔlɛnu dafa.

2 Timoti 1:5

N hɛnkili tonɛ dɛnkɛninya-kɛndɛ wo ko min bi i rɔ. Dɛnkɛninyɛ wo sufa ye i mama Lowisi anubɛ i na Yunasi fanan tɔ, ado n lanɛ a la ko a ye ile fanan tɔ.

Failiman 1:21

N lanɛ a la ko n bara i madiya min na, i si wo kɛ n ye. Woletɔ n bi kɛdi kɛ sɛbɛla i ma. N ya a lɔn ko i si a kɛ hali min tenbira n kuman-kan kɛ la.

Hiburunu 5:12

A bɛnta, wo ni ma karan-mɔgɛnu na kɔnɔ ha kaka, wole bɛrɛn makoe ye karan-mɔgɔ la. Ha bi, wo makoe ye Allala kumɛ dabira koenu na. Wo ti ke dɔn-fen-bɛrɛ dɔnna fɔ ka to wo susunna dɛɛ,

Hiburunu 6:9

N diyana-mɔgɛnu, hali ma ara koe kɛnu fɔ wo ye kɔnɔ ma lanɛ wole la gben! Ma ya a lɔn ko wo ye koenu mala iko mɔgɔ-kisinɛnu si a ma nya min.

2 Pita 1:12

Hali wo ya koe wonu lɔn kɔrɔma la, n si to wo hɛnkili labilala wonu ma tuma-wo-tuma. Wo ara tonyɛ minnu sɔrɔn, hali wo sabatinɛ wonu tɔ, n ti bandan wo lalɔnna tonyɛ wonu ma.

1 Yɔni 2:21

Ka a fɔ ko n bi kɛdi sɛbɛla wo ma bawo wo ma tonyɛ lɔn, wo ma de! N bi wo mala le bawo wo ya tonyɛ lɔn, ado wo ya a lɔn fanan ko foninyɛ ti bɔ tonyɛ rɔ muk!