Nihɛmaya 9:8 - ALLALA KUMƐ

⁸ I ya a yisi-telennɛ yen i wara la. Wobɛ ya sarama-kan kiri wo nyɔgɔn tɛma. Kenannu siginɛ kan min wo, Hɛtinu anubɛ Amoranu siginɛ kan min wo, Perasanu anubɛ Yebusinu anubɛ Kagasanu siginɛ kan min wo, i ya ale Iburayima yili-madiya ko wonuna nyamanɛ si ma a kegeyɛnutɛ la, ado i wara ila sarama-kan wo latɔnbagaya bawo i telenta.

Nihɛmaya 9:8 ပူးပေါင်းရင်းမြစ်များ

Ko-Dabirɛnu 12:7

Mari bɔra gbɛ rɔ Burama ye, a ko, “N bi nyamanɛ min dila i sibolenu ma, wo le kɛ la.” Woletɔ Burama ya saraka-mintan-tinɛ sɔ Mari ye nyɔ.

Ko-Dabirɛnu 15:6

A lara Marita kumɛ wo la. Woletɔ Mari ya a yatɛ telenbagɛ la.

Ko-Dabirɛnu 22:12

Mari ya a fɔ a ye ko, “I kana ko-wo-ko ma ila dan kɛ la kamasɔrɔn n bara a lɔn kaka ko nde, Alla, gbiliyanɛ i bolo. I ma sɔn ka ila dan kelan dogon fɔ ka a di nde, Alla, ma.”

2 Samuwɛli 22:31

“Mata Allala ko-ladan-nyanu telenta. Fɛɛ-wo-fɛɛ sa ala kumɛnu na. Ale manɛ nɛgɛ-walan la wonu ye min bi kisi tinɛ nyinina ale bolo.

1 Ko-Kɔrɔta-Karan 1:14

Kenan kegeyɛ fanan do le Yebusinu wo, Amoranu wo, Kagasanu wo,

Ɛsira 9:15

I yandi, Isirɛlata Mari Alla, i ti sɔn ko-radunɛ ma kɔnɔ hali wo, i wara ma to ma niyi la. Ma ara ma sɔ a la ko yo sa ma bolo. A ma bɛn ko ma ni ma sɔ i yakɔrɔ lefan!”

Nihɛmaya 9:33

Ma tɔrɛ i bolo, wo bɛnta le, yɔ! Hali male ara hakɛ kɛ duk, ile telennɛ ma ye.

Yaburi 116:5

Mari hinante, ado a telenta. Mata Alla, a kinikinite.

Bɔ-Koe-Iyipiti 3:17

N si anu nabɔ Iyipiti tɔrɔyɛ rɔ ka ta anu na Kenan nyamanɛ wo le tɔ, bɔnsɔn kɛnu siginɛ kan min, Kenannu wo, Hɛtinu wo, Amoranu wo, Pɛrasanu wo, Hɛfanu wo, anubɛ Yɛbusinu. Wonu bɛɛsi siginɛ Kenan nyamanɛ wo le tɔ. Nyamani-diyamɛ le nyɔ la.”

Bɔ-Koe-Iyipiti 3:8

N bara na anu kunyɛ bɔ tinɛ yɔɔnyɛ rɔ ka anu bɔ Iyipiti kɛnu bolo. N si ta anu na Kenan nyamani-hakikɛ rɔ, Kenannu anubɛ Hɛtinu anubɛ Amoranu anubɛ Pɛrasanu anubɛ Hefanu anubɛ Yebusinu siginɛ kan min. Nyamani-diyamɛ le Kenan nyamanɛ wo la.

Isikiyɛli 33:24

“Ile hadama-dan, mɔgɛ minnu siginɛ Isirɛla so kasaranɛnu tɔ, wonu bi a fɔla ko Iburayima, mɔgɔ kelen de wo la, ado nyamanɛ bɛɛ dira ale le kelan ma. Anu ko anu denu min siya, anu halala-nyamanɛ le kɛ la gbɛ!

Yilan-Yilan Koe 13:29

Ma ya Amalɛki mɔgɛnu taran Kenan dugula wara la. Hɛtinu wo, Yɛbusinu wo, Amoranu wo, wonu siginɛ kɔnkɛnu tɛma. Kenan mɔgɛ donu siginɛ Mɛdetereniyan kɔgɔ-yi dafɛ anubɛ donu fanan siginɛ Yorodan bɛ wara la.”

Yilan-Yilan Koe 23:19

Alla sa iko mɔgɔni-finyɛ minnu si foninyɛ fɔ. A ti a miriya yɛlɛma iko hadama-dannu. A ya lanyiri kiri fenfenna ko la, a si wo ma, yɔ! Ni a kumara, a ara ban.

Kɛwɔlɛnu 13:22

Wota wati tenbinɛ, Alla ya Dawuda ma anuna mansɛ la. Alla ya kɛ le fɔ Mansa Dawudala ko la, a ko, ‘N bara a yen ko Yɛsila dan Dawuda le si n hɛnɛ kati! Wo le si n diyana-koe bɛɛ kɛ.’

Tɔn-Fɔɛ-Fila-Nyɔgɛ 26:3

Wo si ta a don saraka-masɔlɛ bolo min bi nyɔ wo wati rɔ. Wo ni a fɔ saraka-masɔlɛ wo ye kelen-kelenyɛ ma ko, ‘A sɔgɛ ye ma la ka a fɔ Alla ye ko ma ara na nyamanɛ wo rɔ a ya lanyiri kiri ma benbanu ye minna ko la ma ye. N bi n dantɛgɛla wola ko la.’

Tɔn-Fɔɛ-Fila-Nyɔgɛ 32:4

“Wota farɛ le Mari la min ti bɔ a gbɛ rɔ. Fɛɛ sa ala ko-ladan-nya fenfen na. Latelen-mansɛ le ale la. A si ko-latelennɛ kɛ. A ti lafisayalɛ kɛ.

Tɔn-Fɔɛ-Fila-Nyɔgɛ 7:1

Musa ya a fɔ Isirɛla mɔgɛnu ye tun ko, “Wota Mari Alla si ta wo la nyamanɛ wo rɔ, wo ye nala sigila kan min. Wo tamatoe, wo si sibolo wɔrɔnfila gben wo yarɔ. Wonu fanka kolo wotɛ ko, ado anu siya wo ko. Sibole wonu tɔgɛ le kɛnu na. Hɛtinu wo, Kagasanu wo, Amoranu wo, Kenannu wo, Perasanu wo, Hefanu wo, anubɛ Yebusinu.

Tɔn-Fɔɛ-Fila-Nyɔgɛ 9:5

Iko n ya a fɔ nya min, Mari ye nala nyamanɛ kɛ dila wo ma. A ma wo ma bawo wo mɔgɔ-nyimɛ le wo la, ado wo telenta. Wo ma de! Kɔnɔ a ya wo ma bawo Kenan mɔgɛnu wunduyogo, ado fanan, Mari Alla ya ata lanyiri min kiri wo benba Iburayima, Isiyaka anubɛ Yakoba ye, a ye wo kanbali-koe rɔ.

Taita 1:2

Ale le si yigi di anu ma ko anu ni habadan-nimayɛ sɔrɔn. Alla, min ti foninyɛ fɔ, wo le ya habadan-niyi-lanyiri kɛ kiri ma ye yanni duninya-dan ni bira tumɛ min.

Hiburunu 11:17

Alla ya Iburayima kɔrɔbɔ tumɛ min, dɛnkɛninyɛ le fɛ, Iburayima ya ala dan Isiyaka ma sarakɛ la. Alla ya lanyiri kiri Iburayima ye kɔnɔ hali wo, a rabɛnnɛ hali ka ala dan ma sarakɛ la.

Hiburunu 6:18

ado Alla nyɛrɛ ya ata kelili sa ata lanyiri wo kuma. Fen filɛ kɛnu ti yɛlɛma bawo Alla ti foninyɛ fɔ. Woletɔ male minnu bara ma buri tala a wara la ma latanka-koe la, ma si yisi-latɛgɛ sɔrɔn alako yigi min bi ma yarɔ, ma ni wo bira gben!

Yasowa 11:23

Yasowa ya nyamanɛ wo bɛɛ bira-a-la iko Mari ya a fɔ Musa ye nya min nun. Yasowa ya nyamanɛ wo bɛɛ ratala Isirɛla kebilɛnu na. Wo kɔma, anu ya anu sulen kɛlɛ-kɛ ma.

Yasowa 23:14

“Kaka, n bara kɔrɔya, n siyi ma yan tun. Wole ya a lɔn wo yisi rɔ kaka ko mata Mari Alla ya ko-nyimɛ min bɛɛsi rabɛn wo ye lanyiri fɛ, wo bɛɛsi ara ma tonyɛ la. Mari ya lanyiri kiri fen-nyimɛ min bɛɛla ko la, wo mara tonyɛ la.

Yasowa 9:1

Mansɛ minnu bi Yorodan tele-yigi wara la anubɛ mansɛ minnu bi kɔnkɔ-nyamanɛ rɔ anubɛ minnu bi kɔgɔ-yi dafɛ ha Lɛbanan dugula wara la, wonu bɔnsɔnnu tɔgɛ le kɛnu na, Hɛtinu, Amoranu, Kenannu, Perasanu, Hefanu, anubɛ Yebusinu. Mansɛ wonu ya a lamɔɛn tumɛ min ko Isirɛla mɔgɛnu bara nɔlɛ sɔrɔn, anu ya anu nyɔgɔn nadɛn ka anu miri anu si Yasowa anubɛ ala mɔgɛnu kɛlɛ nya min.

1 Yɔni 1:9

Ni ma ya ma sɔ ma hakɛ la Alla ye, a si ma sɛninya ka ma bɔ mala ko-yogomɛ-bɛɛ rɔ, ado ale min telennɛ, a ye wo le mala. A si ma hakɛ makoto.