Nihɛmaya 11:3 - ALLALA KUMƐ

³ Mɔgɔ-toe bɛɛ sigira a benba soe burɔ Yuda nyamanɛ rɔ. Wo kɔma, saraka-masɔlɛ donu wo, anubɛ Lifayi donu wo, anubɛ Bato-Bonna-wɔli-kɛlɛ donu wo, anubɛ Silamɛnita yɔɔn bɔnsɔn wo, wonu sigira anu benba soenu tɔ Yuda nyamanɛ rɔ. Kebila-kunyɛ minnu bɔra Yuda ka ta sigi Yerusalɛm, wonu tɔgɛ le kɛnu na.

Nihɛmaya 11:3 ပူးပေါင်းရင်းမြစ်များ

Ɛsira 2:1

Kebi Mansa Nɛbukanasa tara mɔgɛ kɛnu na Babilɔn nyamanɛ rɔ, anu tora biralɛ le tɔ ha Mansa Sairasi ya anu hɔrɔya wati min. Anu mɔgɔ-siyaman nara to sɛgila wati wo le tɔ Yerusalɛm soe burɔ anubɛ Yuda nyamani-toe rɔ. Bɛɛ tara a halala-so rɔ.

Ɛsira 2:43

Bato-Bonna-wɔli-kɛlɛ-kebilɛ minnu sɛgira, kebila-kunyɛ wonu tɔgɛ le kɛnu na, Saiha wo, Hasufa wo, Tabeyati wo,

Ɛsira 2:70

Saraka-masɔlɛnu wo, Lifayinu wo, anubɛ a mɔgɛ toe donu sigira Yerusalɛm soe anubɛ ala foolɛ rɔ. A fɔli-kɛla wo, a Bato-Bon-kandanni wo, a Bato-Bonna-wɔlila wo, wonu sigira so-gbɛrɛkɛnu tɔ nyɔla foolɛ rɔ. Isirɛla mɔgɛ toenu sigira anu benba so-kɔrɛnu tɔ.

Nihɛmaya 11:20

Kɔnɔ Isirɛla mɔgɛ toenu anubɛ saraka-masɔla-toenu anubɛ Lifayi-toenu, wonu sigira anu halala-fannu kun na soe donu tɔ Yuda nyamanɛ rɔ.

Nihɛmaya 11:4

Kɛnu denu bɔra Yuda bɔnsɔn-mɔgɛnu tɔ. Yusayala den Ataya, Sakaraya mamanɛ, kɔni, wo nara sigi Yerusalɛm. Sakaraya wo fa tɔgɛ le Amaraya. Amaraya fa tɔgɛ le Sɛfataya. Sɛfataya fa tɔgɛ le Mahalalɛli. Yudala den Pɛrɛsi, wo sɔrɛ le kɛ dama la.

Nihɛmaya 7:39

Saraka-Masɔla Yɛdaya min bɔra Yɛsuwa bɔnsɔn rɔ, wonubɛ a kebilɛ minnu sɛgira, wonu yatɛ bɛnta mɔgɔ kɛmɛ kɔnɔntɔ, mɔgɔ bi-wɔrɔnfila ani mɔgɔ sawa (973) ma.

Nihɛmaya 7:43

Yɛsuwa anubɛ Kadamiyɛli minnu bɔra Lifayi bɔnsɔn rɔ, wonu benba tɔgɛ le Hodafaya. Yɛsuwa anubɛ Kadamiyɛli, wonubɛ anu kebilɛ minnu sɛgira, wonu yatɛ bɛnta mɔgɔ bi-wɔrɔnfila ani mɔgɔ nani (74) ma.

Nihɛmaya 7:46

Bato-Bonna-wɔli-kɛlɛ-kebilɛ minnu sɛgira, wonuna kebila-kunyɛnu tɔgɛ le kɛnu na, Saiha wo, Hasufa wo, Tabeyati wo

Nihɛmaya 7:6

Kebi Mansa Nɛbukanasa tara mɔgɛ kɛnu na Babilɔn soe burɔ, anu tora biralɛ wo le tɔ ha Mansa Sairasita wati rɔ. Anu mɔgɔ-siyaman nara to sɛgila Yerusalɛm soe burɔ anubɛ Yuda nyamanɛ rɔ. Bɛɛ tara a halala-soe rɔ.

Nihɛmaya 7:7

Minnu sɛgira, wonuna kun-tiginu tɔgɛ le kɛnu na, Sarababulu wo, Yasowa wo, Nihɛmaya wo, Asaraya wo, Reyamaya wo, Nehamɛnayi wo, Mɔdekɛyai wo, Belesan wo, Misipɛrɛti wo, Begifeyai wo, Rihum wo, anubɛ Beyana.

Nihɛmaya 7:73

A saraka-masɔla wo, a Lifayi wo, a Bato Bon makandanna wo, a sigi-sala wo, a Bato-Bonna-wɔlila wo, a mɔgɔ-gbɛrɛ wo, a Isirɛla mɔgɛ toenu wo, a bɛɛ tara ata so rɔ Yuda nyamanɛ rɔ.