Nihɛmaya 1:3 - ALLALA KUMƐ

³ Wonu ko mɔgɔ-birani-kɔrɛ minnu kunyɛ ma to-a-rɔ, wonu sɛgira Yerusalɛm. Anu kɔndɔfilinɛ kaka dɔgɔma-ma-de! Anu ko fanan ko sibolo-gbɛrɛ minnu bi anuna foolɛ rɔ, wonu yigi tɛgɛnɛ anu tɔ. Anu ya min fɔ n ye Yerusalɛm wara-koe rɔ ko kebi anu ya nyɔ-tarɛ keri ka a don-dɛnu mintan, ha bi, nyɔ tinyanɛ. A la ma dan bɛ.

Nihɛmaya 1:3 ပူးပေါင်းရင်းမြစ်များ

1 Mansɛnu 9:7

n si Isirɛla mɔgɛnu gben ka anu bɔ nyamanɛ kɛ rɔ n ya min di anu ma. N bara Bato-Bɔn min ma ntɛ la kɛ la, n si n ban wo la fanan. Mɔgɔ yigi ti taran Isirɛla mɔgɛnu na worɔ tun!

2 Mansɛnu 25:10

Babilɔn kɛlɛ-dannu ya tarɛ-toe wo damasi keri Yerusalɛm soela foolɛ rɔ.

2 Ko-Kɔrɔta-Karan 36:19

Ale Babilɔn mansɛ ya soe tarɛ keri ka soe anubɛ a Bato-Bɔn mintan gburr!

Ɛsira 2:1

Kebi Mansa Nɛbukanasa tara mɔgɛ kɛnu na Babilɔn nyamanɛ rɔ, anu tora biralɛ le tɔ ha Mansa Sairasi ya anu hɔrɔya wati min. Anu mɔgɔ-siyaman nara to sɛgila wati wo le tɔ Yerusalɛm soe burɔ anubɛ Yuda nyamani-toe rɔ. Bɛɛ tara a halala-so rɔ.

Ɛsira 5:8

“Ma tigi, i ni a lɔn ko ma tara Yuda nyamanɛ rɔ tumɛ min, ma ya a taran, anu bi Alla-makawanɛta Bato-Bɔn sɔla. Anu bi kuru-wɛnu lɛsɛla ka kɔlɔmanu sa dandannu tɔ. Anu bi Bato-Bon-wɔlɛ kɛla anu fɛrɛma. A ye tala yarɔ a kin na!

Nihɛmaya 11:3

Mɔgɔ-toe bɛɛ sigira a benba soe burɔ Yuda nyamanɛ rɔ. Wo kɔma, saraka-masɔlɛ donu wo, anubɛ Lifayi donu wo, anubɛ Bato-Bonna-wɔli-kɛlɛ donu wo, anubɛ Silamɛnita yɔɔn bɔnsɔn wo, wonu sigira anu benba soenu tɔ Yuda nyamanɛ rɔ. Kebila-kunyɛ minnu bɔra Yuda ka ta sigi Yerusalɛm, wonu tɔgɛ le kɛnu na.

Nihɛmaya 2:13

Nna bɔɛ soe wo rɔ, n bɔra tarɛ don-dɛ do la min tɔgɛ ko Lɛɛ. Wo ye tele-yigi wara la le. N ya n tintan ka ta n bolo-maran wara la. N tara tenbi Ninkinankɛ Tenke la ka ta ke don-dɛ wo wara la min tɔgɛ Nyɛ-Rawuya-Dɛ. N bi tala Yerusalɛm tara kerinɛ wo lakɔrɔsila n bolo fɛ. Don-dɛ minnu bara mintan, n bi wonu fanan mafɛlɛnna tala.

Nihɛmaya 2:17

Wo banda kɛ, n ya a fɔ anu ye ko, “Wo ara a yen, ma ye kɔndɔfili-su min tɔ bawo Yerusalɛm soe anubɛ a tarɛ-don-dɛnu mintannɛ. Ma ni mala soe tarɛ sɔ-kura-kɛ tun alako wo miliyɛ ni bɔ ma kuma.”

Nihɛmaya 2:3

N duwara a ye, n ko, “N tigi, alamɛ i mɛra ila mansayɛ kɛ rɔ. N tigi, ma benbanu togon tinɛ wo ara tii. A tarɛ don-dɛ ara mintan gburr! Wo le ara a ma, n yisi ara tinya pɔ!”

Nihɛmaya 7:6

Kebi Mansa Nɛbukanasa tara mɔgɛ kɛnu na Babilɔn soe burɔ, anu tora biralɛ wo le tɔ ha Mansa Sairasita wati rɔ. Anu mɔgɔ-siyaman nara to sɛgila Yerusalɛm soe burɔ anubɛ Yuda nyamanɛ rɔ. Bɛɛ tara a halala-soe rɔ.

Ɛsita 1:1

Pasiya nyamani-tigi min tɔgɛ Sakasi, wo siginɛ Susa soe burɔ. Nyamani-kun kɛmɛ ani nyamani-kun mogan-ni-wɔrɔnfila le ye a kɔrɔ (127). Ka a dabira Yindiya nyamanɛ ma ha ka a sigi Sudan nyamanɛ la, ala nyamanɛ le wo bɛɛ la.

Yaburi 79:4

Sibolo-gbɛrɛ minnu bi mala foolɛ rɔ, wonu bi ma mɔɛnna. Anu bi yɛlɛnna ma ma ka ma manyini.

Hɛnkilimaya-Kumɛnu 25:28

Mɔgɛ min ti ke a yisi birala, wo mani de iko soe min tarɛ ara wuya.

Aiseya 43:28

Mala mɔgɔ-banu ya a bato tinɛ latinya. Ka a tɛgɛ koe wonu ma, a ya kasarɛ lana male Isirɛla mɔgɛnu kuma. A ya a ma, male ala mɔgɛnu tora yarabiyi rɔ.

Aiseya 5:5

“N bi kɛ le mala nna nakɔɛ rɔ ki-fannu kɔrɔ. A sansannɛ min na, n ni wo tinya. N si a ma, sogenu ni nakɔɛ kɛ firan fiya!

Yɛrɛmaya 24:9

A ko a ye kasarɛ min sigila wo ma, wo si a ma, duninya mumɛ bɛɛ ni kilan. Mɔgɛnu si wo mayɛlɛn. Anu si wo ma yɛlɛnma-fan la. Anu si wo tɔgɛ ma dankali-kɛ-fan la.

Yɛrɛmaya 29:18

A ko a si kɛlɛ anubɛ kɔnkɛ anubɛ kirayɛ ma anu gben-fan la, ado sibolo-gbɛrɛnu ba anu yen tumɛ min, anu kuma si tɛgɛ wao! Mɔgɛnu si anu manyini ka anu tɔgɛ ma dankali-kɛ-fan la.

Yɛrɛmaya 39:8

Babilɔn kɛlɛ-dannu ya Yerusalɛm mansɛla bolɔn mintan anubɛ so-burɔ-bɔnnu ka a tarɛ toe keri.

Yɛrɛmaya 42:18

“Mari Isirɛlata Alla ko iko a fonde bɔra Yerusalɛm kɛnu kuma nya min, ni wo tara Iyipiti nyamanɛ rɔ, a fonde ye bɔla wo kan ma wo nya na le. A ko min ba wo yen, wo kuma si tɛgɛ. Mɔgɛnu si wo bira boloko-yogomɛ-kɛ ka wo tɔgɛ ma dankali-kɛ-fan la. A ko wo ti kan-tinɛ kɛ yen tun!

Yɛrɛmaya 5:10

Mari ko a si a fɔ wole, Yuda mɔgɛnu ye ko wo yogenu ni ta wole, Yuda kɛnu malanfan iko mɔgɛ si ki-fannu malanfan nya min kɔnɔ anu kana wo bɛɛ malanfan de! Anu ni mɔgɛnu faga kelen-kelenyɛ ma iko kɔlɔma-gbendalɛ. Anu ni wo ma bawo Marita ma wole, ata mɔgɛ kɛnu denu na tun.

Yɛrɛmaya 52:14

Babilɔn kɛlɛ-dannu ya tarɛ toe wo damasi keri Yerusalɛm soela foolɛ rɔ.

Nimisa Koe 1:7

Mɔgɛ minnu sigi-tina-kɔrɛ ye Yerusalɛm na, wonu bi anu mirila Yerusalɛm sɔ-kinya-kɔrɛ ma. Yerusalɛm yogenu ya a nɔ tumɛ min, sibolo-gbɛrɛ fenfen sa nyɔ min si a dɛnbɛ. A yogenu ya a mayɛlɛnnɛ yen min kɛ, anu tora a mayɛlɛnna.

Nimisa Koe 2:9

Tarɛ wo don-da-wɛnu tora sani yefe-gbalɛ rɔ. A dɛ-balan-kɔnnu ta ara kerikeri. Nna mansɛ anubɛ nna mɔgɔ-banu bi biralɛ rɔ nyamani-gbɛrɛkɛnu tɔ. Nta saraka-masɔlɛnu sa mɔgɛnu karanna tɔn ma tun. Mari sa wɔlɔyiya-kumɛnu yirala nta nɛbinu ma tun.

Nimisa Koe 3:61

“I wara n mamɔɛn-kan lamɔɛn anu bolo, ado anu bara yanfɛ min bɛɛ kiri n ma, ile Mari ya wo bɛɛ lɔn.

Nimisa Koe 5:1

E, Mari, i miri ma ara tɔrɔ nya min nun, i kolan layigi ma yarabi-nya ma ma yogenu bolo.

Saraka-Masɔlɛnuta Tɔnnu 26:31

N si wola soenu bira ka anu kasara. N si wola bɛsi-kɔ-tinɛ bɛɛsi tinya fanan. Hali wo ya sarakɛnu bɔ n ye, n ti sɔn anu na. Anu mintan-sumɛ ti diya n ye muk!

Saraka-Masɔlɛnuta Tɔnnu 26:33

N si wo yogenu nana ka wo kɛlɛ ka wo bira ka ta wo la nyamanɛ siyamɛnu tɔ. Wola nyamanɛ rakolɔn si to. Wola soenu si ma iko tonbon-kɔrɛnu.