Malakayi 2:17 - ALLALA KUMƐ

¹⁷ Wola kuma-siyamɛnu bara a ma, Mari ara gbunya wo kɔrɔ. Kɔnɔ wo ye a fɔla ko, “Male ya a ma kama a gbunyara ma kɔrɔ?” Bawo wo ye a fɔla ko, “Mari Sɛnbɛ-Bɛɛ-Tigi mirinɛ ko-yogoma-kɛlɛnu ma ko anu kin. Wo kɔma, anu bara-koe di a ye.” Wo ye a fɔla tun ko, “Alla-telennɛ kɛ ye mintɔ?”

Malakayi 2:17 ပူးပေါင်းရင်းမြစ်များ

Yobu 34:17

Alla min telennɛ tede, i ye sɛgila wo manyinina tun, wa? Ile mirinɛ ko telenbagayɛ ma di a ye, nyɛ?

Yobu 34:36

Wo ni Yobula kumɛ lakɔrɔsi a kila-bɛrɛbɛrɛ fɛ. Wole nyɛrɛ-nyɛrɛ si a yen a ye kumala iko karagbɛlɛ.

Yobu 36:17

kɔnɔ kaka, tɔrɔyɛ min bɛnta karagbɛlɛnu ma, wo ara ma itɛ la.

Yobu 9:24

Alla ya duninya dantɛgɛ karagbɛlɛnu ma. A ya a ma, kiti-tɛgɛlɛ bɛɛ fiyonyara tɛrr! Wo rɔ, ni Alla ma wo ma, yon ya wo ma nun worɔ?

Makawandili Kumɛnu 8:11

Mɔgɛnu bi tola karagbɛlɛyɛ kɛla bawo anu sa anuna tɔrɔyɛ sɔrɔnna yona.

Aiseya 1:14

Wola Karɛ-Kurɛ-Ladiyɛ anubɛ wola ladiya-gbɛrɛkɛnu, a ko wonu ma di a ye tun mumɛ, bawo a ara bandan wonu na.

Aiseya 29:15

A sɔgɛ ye minnu na ka anu miriya dogon Mari ma, wonu si halaki. Anu bi pinpirɔ-koe minnu nadanna, anu miri ko mɔgɔ ya sa anu na. Anu ya a lɔn ko mɔgɔ ma a lɔn anu bi min kun na.

Aiseya 30:18

Hali wo, Mari ye wo makɔnɔna alako a ni kinikini wo ma. A rabɛnnɛ ka kinikini wo ma bawo a ye ko-telenni-gbansan le mala. Mɔgɔ-sewanɛ le wo tigi la min lanɛ Mari la.

Aiseya 43:22

Mari ko male Isirɛla mɔgɛnu sa a batola tun bawo ma sa ma muinna a kɔrɔ.

Aiseya 43:24

woletɔ ma sa isɛnti sanna a ye tun. Ma sa a wasa-koenu kɛla ka to sogo-kɛɛn dila a ma. Kɔnɔ ma ara to ma hakɛ-dunɛnu sala a kuma. A ko ma ara to ko-yogomɛnu sigila a kuma min kɛ, wo ara a labandan.

Aiseya 7:13

Nba, nde, Aiseya ko, “Wole Mansa Dawuda kegeyɛnu, wo ni wo tole masɔ a kin na! Nde ma n munyu wo sɔn ma. Wo kana a ma, Alla ni a munyu wo sɔn ma.

Yɛrɛmaya 12:1

Mari, ile min telennɛ, a bɛnta, n ni n yasere-masa ile le ye. Fɔ n ba i manyinika telenbagayɛ wara-koe ma. Nfenna karagbɛlɛnu bara-koe ye tala yarɔ? Nfenna telenbɛlɛnu nafɛrɛnɛ?

Yɛrɛmaya 15:6

Mari ko wole, Yerusalɛm mɔgɛnu bara wo ban a la, ado wo ye tola tala le tun. Wo sa wo yɛ lasɛgila. Woletɔ a ko a ye wo dan labirala ka wo tɔrɔ. A ko wola koe min nakɔlɔn-kɔlɔnnɛ a burɔ, a ti ke wo birala-a-rɔ tun.

Yɛrɛmaya 17:15

Yuda mɔgɛnu bara nɔrɔ n manyinikɛ ma fantin! Anu bi tola n mayɛlɛnna ko, “Marita wɔlɔyiya-kumɛ kɛ ye kama? Nba, a ni bɔ-a-la ma yala.”

Yɛrɛmaya 44:22

Bi, wola nyamanɛ ye tonbonyɛ le la gbɛ! Mɔgɔ sigini sa a rɔ. Mɔgɛnu ba nyɔ yen, anu si anu bole sa anu dɛ la ka kawa. Anu si wo tɔgɛ ma dankali-kɛ-fan la bawo Mari ti ke a munyuna wola karagbɛlɛya-koe kɛnu kɔrɔ muk!

Isikiyɛli 16:43

N ya i bira nya min, wo tumɛ i dɔgɔ, i wara nyina wo la. I ya n yisi-tinya-koe gbansan le ladan. Woletɔ n bara i sara ila ko-yogomɛ bɛɛla ko la. Nfenna i ya yɛlɛnya-koenu sa i sɔn-yogomɛnu kuma? Nde, i Tigi Mari kan le kɛ la.

Isikiyɛli 18:25

“Isirɛla mɔgɛnu kɛnɛna a fɔla ko, ‘Mari sa ko-telennɛ kun na.’ Kɔnɔ Isirɛla mɔgɛnu ni anu tole masɔ n na. Anu miri ko n bi koenu nadanna nya min, wo ma kin, nyɛ? Anu denuta kilɛ ma telen.

Isikiyɛli 8:12

Alla ya a fɔ n ye ko, “Ile hadama-dan, i wara Isirɛla bɔnsɔn-kun-tiginu yen anu bi min kɛla dogon rɔ? Anu dama ye bɛsɛnu kɔla. Anu bi a fɔla ko, ‘Alla ya sa ma la. A ara a ban mala nyamanɛ la.’ ”

Isikiyɛli 9:9

Alla ara a fɔ ko, “Isirɛla bɔnsɔn-mɔgɛnu anubɛ Yuda bɔnsɔn-mɔgɛnu yilikinɛ anu hakɛ-yogomɛnu bolo. Anu bara niyi-siyaman bɔ anuna nyamanɛ bɛɛ rɔ ka Yerusalɛm soe mumɛ lafa tɔn-tinyɛ la. Anu kɛnɛna a fɔla wo rɔ ko nde, Mari ara n ban anuna nyamanɛ la, ado anu bi a fɔla fanan ko n ya sa anu na.

Emɔsi 2:13

Mari ko a si wo digin dugu la ha wo ni kurun iko dunu-bilɛ wa dunɛ bi, a ti min nɔ.

Sɛfanaya 1:12

Mari ko wo wati wa ke, a si lɛnpu bi ka a yɛ lakalan Yerusalɛm soe tonke bɛɛ rɔ. Ni a ya mɔgɔ-wo-mɔgɔ taran min wasinɛ, ado a lanɛ a nyɛrɛ la, Mari ko a si wo tigi tɔrɔ. Wo tigi ye belenna a fɔla a nyɛrɛ ma ko, “Mari ti ko-wo-ko sigi a ma, a mara a nyima la wo, a mara a yogoma la wo.”

Malakayi 2:14

Wo ye a fɔla ko, “Nfenna Alla sa sɔnna mala sarakɛnu na tun?” Ni i ya a yen, Alla sa sɔnna wola sarakɛnu na bawo wobɛ wola musinu ya lanyiri min kiri wo nyɔgɔn tɛma wo tumɛ wo dennɛ, wo ara wo tinya. Wo ya lanyiri kiri Alla yala ko wo ti wola musinu boloka, ado wo makofu le musi wonu na. Wo ya lanyiri kiri Alla yala ko wo si to lanayɛ rɔ wola musi wonu ye.

Malakayi 3:8

Kɔnɔ Alla ye wo manyinikala ko a bɛnnɛ mɔgɛ ni ale Alla kensun, wa? Wo ma telen kɔnɔ a ko wo ye a kensunna. Wole ye a fɔla ko, “Ma ye a kensunyala kama?” A ko wo ye a kensunna yakanu anubɛ kɔ-fannu tɔ.

Tɔn-Fɔɛ-Fila-Nyɔgɛ 32:4

“Wota farɛ le Mari la min ti bɔ a gbɛ rɔ. Fɛɛ sa ala ko-ladan-nya fenfen na. Latelen-mansɛ le ale la. A si ko-latelennɛ kɛ. A ti lafisayalɛ kɛ.

1 Samuwɛli 2:3

“Wo ni wo fara nyɛrɛ-kɔrɔbiyinu na. Mari Alla, wo le ya koe bɛɛ lɔn. Ale le ye mɔgɛnu kiti tɛgɛla.