Kɛlɛ-Kurugbɛnu 18:10 - ALLALA KUMƐ

¹⁰ Ma si ta wonu natɛrɛna nyɔ rɔ. Anu ti ko-wo-ko lɔn a rɔ. Nyamanɛ wo kolo dɔgɔma-ma-de! Mɔgɛ ye fenfen nyinina duninya rɔ, wo ye nyɔ. Alla ara nyɔ don ma bolo.”

Kɛlɛ-Kurugbɛnu 18:10 ပူးပေါင်းရင်းမြစ်များ

Bɔ-Koe-Iyipiti 3:8

N bara na anu kunyɛ bɔ tinɛ yɔɔnyɛ rɔ ka anu bɔ Iyipiti kɛnu bolo. N si ta anu na Kenan nyamani-hakikɛ rɔ, Kenannu anubɛ Hɛtinu anubɛ Amoranu anubɛ Pɛrasanu anubɛ Hefanu anubɛ Yebusinu siginɛ kan min. Nyamani-diyamɛ le Kenan nyamanɛ wo la.

Isikiyɛli 20:6

Wati wo le tɔ, n ya anu bɔ-koe latɛgɛ Iyipiti ka lanyiri kiri anu ye ta-koe la dugu-hakikɛ rɔ, n ya min yabɔ anu ye. Nyamanɛ wo dugi kin dɔgɔma-ma-de! Fan si nanfa a rɔ kubukubu!

Tɔn-Fɔɛ-Fila-Nyɔgɛ 2:29

Ni ma ara ban tenbila ila nyamanɛ rɔ, ma si Yorodan bɛ tɛgɛ ka ta nyamanɛ wo rɔ Mari Alla si na min di ma ma.’ Isɔ kegeyɛ minnu bi Idɔm nyamanɛ rɔ anubɛ Lɔti kegeyɛ minnu bi Mohabu nyamanɛ rɔ, katarala Ari soe ma, wonu sɔnta ko ma ni tenbi anuna nyamanɛ rɔ.

Tɔn-Fɔɛ-Fila-Nyɔgɛ 4:1

Musa ya a fɔ Isirɛla mɔgɛnu ye tun ko, “Wo ni wo tole masɔ! N bi nala tɔn min bɛɛsi fɔla wo ye kɛ la, wo ni anu bira gben! Ni wo ya wo ma, wo benbanuta Mari Alla ye nala nyamanɛ min dila wo ma, wo si simayɛ sɔrɔn ka sigi yisi-kimɛ rɔ nyɔ rɔ kaka!

1 Timoti 6:17

Nɔnfuli ye minnu bolo duninya kɛ rɔ, i ni wonu makawandi ko anu kana wasi. Anu kana anu yigi sa nɔnfuli kuma iko fen de min bi mɛla. Anu ni anu yigi sa Alla kuma min bi fan bɛɛ dila ma ma foninsereyɛ la ka ma lasewa.

Yasowa 2:23

Mɔgɔ filɛ wonu bɔra anu dogon tinɛ. Anu tara Yasowa wara. Min bɛɛ kera, anu ya anu dantɛgɛ a ye.

Yasowa 2:24

Anu ya min sa wo kuma, wo le ko, “Ma ya a lɔn serr, ko Mari ara nyamanɛ wo bɛɛ di ma ma. Mɔgɛ bɛɛ kilannɛ ma la kati!”

Yasowa 6:16

A wɔrɔnfila nyɔgɛ, saraka-masɔlɛnu ya buri fɛ tumɛ min, Yasowa ya a fɔ mɔgɛnu ye ko, “Wo ni gbele-gbelen. Mari ara soe kɛ nɔ ma ye.”

Kɛlɛ-Kurugbɛnu 18:11

Dan bɔnsɔn-mɔgɔ kɛmɛ wɔrɔ (600) ya anu mabɛn kɛlɛ wo kan ma ka bɔ Sora soe anubɛ Ɛsateyoli soe burɔ.

Kɛlɛ-Kurugbɛnu 18:27

Dan bɔnsɔn-mɔgɛ wonu tɛ Maikala saraka-masɔlɛ la, anu tara bui Leyisa soe ma. Leyisa soe anubɛ Bɛti-Rihobu soe ye lɛɛ kelen de rɔ, ado Leyisa mɔgɛnu makimani de! Anu miri sa kɛlɛ ko ma. Dan bɔnsɔn-mɔgɛnu tara anu natɛrɛna ka anu faga. Anu ya soe wo mintan. Leyisa so-burɔ-mɔgɛ wonu ma anu dɛnbɛna sɔrɔn ka bɔ Saidon soe burɔ bawo anu fɛ-yan wonu na, ado anu ti sɔn basanna mɔgɔ-gbɛrɛkɛnu na iko komi wonu si na anu dɛnbɛ. Dan bɔnsɔn-mɔgɛ wonu ya soe wo sɔ a kurɛ kɛ tun ka anu sigi nyɔ.

Kɛlɛ-Kurugbɛnu 18:7

Ko-lakɔrɔsila mɔgɔ lolɛ kɛnu bɔra nyɔ. Anu tara ha Leyisa soe burɔ. Anu ke nyɔ, anu ya so-burɔ-mɔgɛ wonu makimanɛ taran sigini iko Saidon kɛnu siginɛ nya min. Anu sa bagala mɔgɛ ma, mɔgɛ sa bagala anu ma. Nɔnfulu-tigi le anu na, ado anu fɛ-yan Saidon kɛnu na. Wo kɔma, anu ti sɔn basanna mɔgɔ-gbɛrɛkɛnu na, anu siginɛ minnu dafɛ.

Kɛlɛ-Kurugbɛnu 18:9

Anu ya a fɔ anu ye ko, “Ma ya anuna nyamanɛ yen, a kin dɔgɔma-ma-de! Ma ta wona tiriya ka ta bui Leyisa soe ma ka a bi anu bolo. Ma kana to sigini wo nya fufafu!