Yɔni 6:63 - ALLALA KUMƐ

⁶³ Allata Ni-Sɛnimɛ le ye niyi dila mɔgɛnu ma. Sɛnbɛ sa mɔgɔ-wo-mɔgɔ bolo ka niyi di mɔgɛ ma. N bara kumɛ minnu fɔ wo ye kɛ la, Allala Ni-Sɛnimɛ min si niyi di mɔgɛ ma, wo le si niyi lana wo ma.

Yɔni 6:63 ပူးပေါင်းရင်းမြစ်များ

Ko-Dabirɛnu 2:7

Wo kɔma, Mari Alla ya kei dan ka bɔ bɔnkɛ rɔ. Alla ya a nyɛrɛ niyi bila a sunyɛ rɔ. Kei wo ya niyila fɛyɛ dabira. A mara dali-fen-kɛndɛ la.

Yaburi 119:130

Ita kumɛnu sanɛ gbɛ le ma n ye. Wo le wara waan raka n ma. A si hɛnkilimayɛ di ko nya-yenbɛlɛ ma.

Yaburi 119:50

Hali n bi nanparan-belebele le tɔ, ita yili-madiyɛ wo si a ma, n ni sewa bawo wo le ya niyi keni n ye.

Yaburi 119:93

Ila karan minnu ya n to n niyi la, n ti nyina wonu ko mumɛ!

Hɛnkilimaya-Kumɛnu 4:13

I wara minnu karan kɔrɔma la, i ni to i mirila wonu ma. I niyi-kole le ila karan la.

Yɔni 5:21

N bi nyinina niyi dila furi minnu ma, n si niyi di wonu ma iko n Fa Alla ye furinu nawulila nya min tun ka niyi di anu ma.

Yɔni 6:68

Saimon Pita ya a yabi ko, “Mari, ma si ta yon bara gbɛ? Habadan-niyi-kumɛ ye ile le bolo.

Kɛwɔlɛnu 5:20

“Wo ta wo sɔ Alla-Bato-Bɔn la ka ni-kurɛ kɛ wara-koe fɔ mɔgɛnu ye.”

Romu 10:17

Woletɔ fɔ mɔgɛnu ba sarakanɛ lamɔɛn ka a bɛn Yisa ma, yanni anu ni dɛnkɛninya a ma. Fɔ mɔgɛnu ba Kirasitila ko fɔ anu ye alako anu si a lamɔɛn nya min.

Romu 2:25

Ni minnu ya tɔn-kitabu wara-koe bira, anuta kemininyɛ si ko nyinya anu ma. Kɔnɔ ni minnu ma tɔn-kitabu wara-koe bira, a fisa, anu bilakore ni to nun.

Romu 8:2

bawo Allata Ni-Sɛnimɛ min bi niyi dila ma ma, wo ara ma hɔrɔya Yisa Kirasiti baraka rɔ. A ya ma hɔrɔya ka ma bɔ hakɛta sɛnbɛ kɔrɔ min si na sayɛ la ma kuma.

1 Kɔrɛnti 15:45

ado a sɛbɛnɛ Allala kitabu rɔ ko, “Alla ya mɔgɔ fɔlɔtɛ min dan, ma benba Hadama, kɔni, a ya niyi di wo ma.” Kɔnɔ Yisa min bi Hadama laban la, wo le si niyi di mɔgɛ ma kaka.

Kalesiya 5:25

Allata Ni-Sɛnimɛ ara ni-kurɛ di ma ma min kɛ, a fɛrɛ sa fɔ ma ni to ala sɛnbɛ kɔrɔ.

Kalesiya 5:6

ado ni ma lara Yisa Kirasiti la, ma kemininyanɛ anubɛ ma kemininyabɛlɛ, kelen de wonu na. Min kolo, wo le mala dɛnkɛninyɛ min si a ma, keninteyɛ ni to ma tɛma.

Kalesiya 6:15

Ni mɔgɔ kemininyara wo, ni a ma kemininya wo, tana-wo-tana ma wo la. Kɔnɔ min kolo, alako dɔrɔn ma ni ma mɔgɔ-kurɛ la Kirasiti ye.

Tɔn-Fɔɛ-Fila-Nyɔgɛ 32:47

Fufafu ma karan kɛ la de! Wo niyi-kole le kɛ la. Ni wo ya a bira, wo si simayɛ sɔrɔn lanyiri-nyamanɛ rɔ Yorodan bɛ kɔgɔma wo ye nala tala kan min.”

1 Tɛsalonaika 2:13

Ma ye baraka birala Alla ye tumɛ bɛɛ ko ma nara Allala kumɛ la wo ye tumɛ min, wo ya a lamɔɛn ka a bira a kilɛ fɛ. Wo ma a bira iko a bɔra mɔgɛ le bolo. Wo ya a bira iko Allata kumɛ, ado Allala kumɛ ye wɔlila wole dɛnkɛninya-mɔgɛnu burɔ hali kaka.

1 Timoti 4:8

Tonyɛ le kɛ la, ado i ni la a la ka a bira gben, ko ka i fɛrɛ ramaga, wo si koe do nyinya. Kɔnɔ ka i ramaga Allata wɔli-kɛ-tinɛ, wo si ko nyinya nya bɛɛ ma. A si i dɛnbɛ duninya kɛ rɔ anubɛ lakira fanan.

Hiburunu 13:9

Wo kana sɔn, karan-kurɛnu ni wo labɔ wola kila-telennɛnu fɛ. A fisa, wo sɔndɔmɛnu ta ni gbɛlɛya Allala hinɛ fɛ. Ka a fɔ ko wo ni tɔn bira dɔn-fen-koela ko la, wo ti ko-wo-ko nyinya wo ma, ado minnu bilanɛ tɔn wonu fɛ, wonu ma dɛnbɛni sɔrɔn wonu tɔ.

Hiburunu 4:12

Nba, Allata kumɛ ye a niyi la. A sɛnbɛ kolo. A dɛ ye a la ka tenbi faan da filɛ la. A si don mɔgɔ fɛrɛ burɔ pon, ha a sɔndɔmɛ anubɛ niyi ye kan min. A si mɔgɛ tɛgɛ ha fɛrɛ latugun tinɛ anubɛ kolota kɛɛn ye kan min. A ye mɔgɔ-diyana-koenu anubɛ a miriya bɛɛ labɔla gbɛ ma.

Yemesi 1:18

Ka a tɛgɛ ala keninteyɛ ma mala ko la, a ya ma ma ala dan la kamasɔrɔn a ya tonya-bɛrɛ di ma ma iko a ya a latɛgɛ nya min. A ya wo ma alako male ni sɔ-tina-fɔlɔtɛ sɔrɔn ala dali-fan bɛɛ tɛma. A halalɛ le male la gbɛ!

1 Pita 1:23

Wo ara sɔrɔn a kurɛ la Allala habadan-kuma-nimɛ baraka rɔ. Alla min ti faga, wo ara ma wola dannu na!

1 Pita 3:18

Wo ni wo miri kɛ ma. Kirasiti nyɛrɛ fagara ma ye iko kelen pe ma hakɛla ko la. Ale mɔgɔ-nyimɛ fagara male mɔgɔ-yogomɛnuna ko la alako a ni ma lana Alla ma nya min. A ye hadama-denyɛ la tumɛ min, anu ya a faga kɔnɔ a tora a niyi la Allata Ni-Sɛnimɛ baraka rɔ,

1 Pita 3:21

ado yi-fɛ wo le batasili-misalɛ la bawo wole ara kisi Yisa Kirasitita lawuli-sɛnbɛ fɛ wo nya na le. Ka a fɔ ko wo ni wo ku, wo dɔrɔn ma de! Ma wa batasili kɛ, ma ye Alla matarala ko a ni ma sɔndɔmɛ gbɛ.