Isikiyɛli 26:16 - ALLALA KUMƐ

¹⁶ Sibolo-gbɛrɛ-mansɛ minnu siginɛ yi dala, wonu si bɔ anuna mansaya-sigi-fannu tɔ ka anuna mansaya-durukinu bɔ anu kan na. Anu si anuna duruku-bonnɛnu bɔ anu kan na ka to yɛrɛyɛrɛnna dugu-kole kuma. Dan ti taran anuna yɛrɛyɛran la ka a tɛgɛ Taya kɛnu kasara nya ma.

Isikiyɛli 26:16 ပူးပေါင်းရင်းမြစ်များ

Yobu 8:22

Ila ko-gboyanɛ minnu ye, a si wonu nayarabi. Kɔnɔ karagbɛlɛnuna bɔnnu si kasara pɔ!

Yaburi 109:18

Dankalɛ namanɛ a da rɔ iko a nyɛrɛ kan-na-duruki si bɔ a kan na nya min. Alamɛ ata dankɛ wonu ya a nyɛrɛ kimɛ iko yi yɔgbɔ! Alamɛ anu donta a kole rɔ iko tuli.

Yaburi 109:29

Alamɛ n yogenu miliyara kɔgɔrɔyɔlɔ! Alamɛ miliyɛ wo mara anu kan-ma-duruki la.

Yaburi 132:18

A ko a si a yogenu namiliya kɔnɔ ata mansayɛ si ta yarɔ ka wara.

Yaburi 35:26

Minnu sewanɛ nta tɔrɔyɛla ko la, alamɛ wonu ya nanparan sɔrɔn ka yarabi. Minnu bi anu nyɛrɛ kɔrɔbila ka tenbi nde la, alamɛ miliyɛ donta wonu kun na yorobi!

Bɔ-Koe-Iyipiti 15:15

Idɔm kɛnu si kilan ha ka a dan-natenbi. Mohabu mɔgɔ-banu si yɛrɛyɛrɛn. Kenan kɛnu mankulan si bɔ anu ma kilan bolo.

Aiseya 3:26

Kiti-fɔ-tinɛnu si ma di-kɛ-tinɛnu na. Yerusalɛm soe rakolonyanɛ si to iko anu bara digin musi min ma.

Aiseya 41:5

“Nde, Mari ara minnu ma, wula-yanna-mɔgɛnu bara wo yen. Anu bara kilan furr, anu kun ma ara kɔ. Anu kun bara dɛn kan-tina-kelen.

Aiseya 47:1

Mari ko, “Babilɔn soe, bɔ ila mansaya-waganɛ rɔ. I ni i sigi gbangban rɔ di-kɛ-tinɛ. I mani de nun iko kɔɛn-kurɛ. So-karantan le ile la nun, kɛlɛ ma ke bɛ min tɔ. I yereyere ma tun iko fɔlɔ. I ye yɔɔnyɛ le la gbɛ!

Aiseya 52:2

I lasɔ gbangban rɔ ka i nyɛrɛ magbɔngbɔn. Ile so-birani-kɔrɛ, i lawuli. I mayigi ila mansaya-waganɛ rɔ. I kirinɛ yɔlɔkɛ min na nun, i ni wonu tatɛgɛ i ma.

Yɛrɛmaya 48:39

Mohabu kɛnu tanyɛnsɛnnɛ ye belenna. A ko bɛɛ ni di bawo anu si na yarabiyi sɔrɔn. A ye nala taranna tonbonyɛ le la, ado anu dafɛ sibolenu bi nala anu mayɛlɛnna. Mari kan le kɛ la.

Nimisa Koe 2:10

Yerusalɛm mɔgɔ-banu-makinikininɛ sigini dugi ma. Gbangban kɛnɛ anu kunyɛ rɔ. Kasa-kurɛ bilanɛ anu kan na alako ka a yira ko anu bi saya-di-kɛ tinɛ. Hali sunkurun-mɛsɛnu, wonu sanɛ dugi ma yisi-tinya bolo.

Isikiyɛli 16:10

N ya duruku-bonni-hakikɛ don i kan na. N ya gbolo-sanbara-hakikɛ di i ma. N ya linɛn-kun-yili-hakikɛ anubɛ kura-da-gbɛlɛ di i ma.

Isikiyɛli 26:21

N si ale Taya ma misali-makilannɛ la. Wo si ma ala ban la. Hali mɔgɛnu ba anu ya lakalan a ma, anu ti a yen tun! Nde, wo Tigi Mari kan le kɛ la.”

Isikiyɛli 28:17

Bawo a ara a yen min kɛ ko a mafɛlɛn di, wo le wara a ma, a ara wasi. A mankan ara a ma, a ye kun-takolonya-koenu mala. Ka a tɛgɛ wo ma, n ya a fɛrɛn dugi la ka a to sani nyɔ alako mansɛ doinu ni kawa a ma nya min.

Isikiyɛli 31:15

“Nde, wo Tigi Mari ko kɔlɔma wo wa don lakira tele min ma, yi minnu bi dugi ma, n si a ma, wonu ni tugu a kun na. Wo si ma diyi-tamasere la. N si bɛnu gbala anu worɔn la. N ti sɔn yinu ni bon anu daga ma tun. Kɔlɔma wo wa faga, n si pinpi burun Lɛbanan kɔnkɛnu kuma bɛff! N si a ma gbɔngbɔn bɛɛ la ni ta gbalala.

Isikiyɛli 32:10

N bi min sigila a ma, wo si sibolo-siyaman maban. N ba nna faan layigi, mansɛnu si to yɛrɛyɛrɛnna kilan bolo. A wa bui lunyɛ min, mansɛ wonu si to buila kumakɔɛ bolo ka a tɛgɛ anu niyila ko ma.

Isikiyɛli 7:27

Wola mansɛnu si to dila. Anuna dannu kumakɔnɛ si to. Mɔgɛ bɛɛ ra si maga kilan bolo. N si wo tɔrɔ ka a tɛgɛ wo ara minnu ma. N si wo kiti iko wo duruta doinu kitila nya min. Wo si a yira wo la wo rɔ ko Mari le nde la.”

Isikiyɛli 7:8

“A ti mɛ tun, wo ye nala nna diminyɛ bɛɛ yenna. Wo ara kasarɛ anubɛ kisimiriya-koe minnu nadan, n bi nala wole kitila ka wo yili sara wo la.

Daniyɛli 5:6

a yakɔrɛ sisira, a mɔlɔkɔnta kilan bolo.

Hoseya 11:10

“N ba nyɛɛ wo yogenu ma iko yarɛ min bi wɔrɔndɔla, wo si bila n fɛ. Wo si wo buri nala ka bɔ tele-yigi wara la.

Yona 3:6

Ninɛfa mansɛ ya wo lamɔɛn min kɛ, a ya a lakɔɛnma ala mansaya-waganɛ rɔ ka ala mansaya-duruki bɔ a kan na ka kasa-kurɛ kɛ a kan ma. A ya a sigi bugurɛ rɔ.

Hegayi 2:22

N si sɛnbɛ bɔ duninya kun-tiginu bolo. Anuna kirindinu si yɛlɛma ala burilɛnu na. Anuna kɛlɛ-dannu anubɛ anuna soeenu si faga kɛlɛ rɔ.

1 Pita 5:5

Fonikenu fanan ni sɔnnaya kɛmɔgɛnu ye wo nya na le. Wo dama ni famayigiya-duruki don wo kan na ka wɔlɛ kɛ wo nyɔgɔn ye, ado a sɛbɛnɛ Allala kitabu rɔ ko, “A mako sa mɔgɔ-wasinɛnu na kɔnɔ a si ata hinɛ yira mɔgɔ-famayiginɛnu na.”

Lankɛnimayɛ 18:9

Mansɛ minnu ya yɛlɛnyɛ anubɛ fɛrɛ-bɔnku-nata kɛ a fɛ, wonu ba soe wo mintan-sisi yen tumɛ min, anu si gbele-gbelen ka di ala ko la biribiri!