A ko a si a ma, wole Yuda kɛnu si ma mɔgɔ-makawanɛ la duninya-mɔgɛ bɛɛ ye. Mari ko a si kɛ ma ka a tɛgɛ Yuda Mansa Hɛsakayala den Mansa Manasa sɔn ma Yerusalɛm soe burɔ.
Mari ko bɛsi-kɔ-tinɛ minnu bi kɔnkɛnu ma wo, anubɛ wola nɔnfuli anubɛ wola fen-kolomɛnu wo, a ko a si wonu toronde wo la ka wonu natenbi wo yogenu ma bawo wo ara hakɛ kɛ ka a dan-natenbi wola nyamanɛ bɛɛ rɔ.
A ko a ye kasarɛ min sigila wo ma, wo si a ma, duninya mumɛ bɛɛ ni kilan. Mɔgɛnu si wo mayɛlɛn. Anu si wo ma yɛlɛnma-fan la. Anu si wo tɔgɛ ma dankali-kɛ-fan la.
a si kantɔ-mɔgɛ bɛɛ kele wo kan ma katarala Babilɔn Mansa Nɛbukanasa ma, ata wɔli-kɛlɛ, kɔni. A ko mansɛ wo si na wole Yuda nyamanita-mɔgɛ bɛɛ kɛlɛ anubɛ wo dan-masa-nyɔgɛnu. Anu ba ban wo kɛlɛla, anu si wola nyamanɛ kasaranɛ to. Mɔgɛ min ba nyɔ yen, wo kuma si tɛgɛ.
A ko a si kɛlɛ anubɛ kɔnkɛ anubɛ kirayɛ ma anu gben-fan la, ado sibolo-gbɛrɛnu ba anu yen tumɛ min, anu kuma si tɛgɛ wao! Mɔgɛnu si anu manyini ka anu tɔgɛ ma dankali-kɛ-fan la.
Woletɔ Mari ko wo ara a lafɛya bawo wo ma sɔn wo ta-nyɔgɛ Isirɛla mɔgɛnu boloka-koe ma. A ko ale nyɛrɛ-nyɛrɛ si wo boloka. Wo kɔrɛ ye min na ko ka wo to kɛlɛ anubɛ kirayɛ anubɛ kɔnkɛ bolo la. A ko a ye min sigila wo ma, sibolo-gbɛrɛnu ba wo yen, anu si anu bole sa anu dɛ la.
“Mari si a ma, wo yogenu si wo nɔ. Wo wa ta wo yogenu kɛlɛ tinɛ tumɛ min, wo si ta kila kelen fɛ kɔnɔ wonu si wo ranyɛnsɛn. Wole si belenna wo burila anu kɔrɔ kila-siyamɛnu fɛ. Ni mɔgɔ-gbɛrɛkɛnu ya wo tɔrɔya-nya yen, anu si kilan kati!