Isikiyɛli 21:22 - ALLALA KUMƐ

²² Nba! Kalabɛn min bi a bolo-nyimɛ rɔ, wo ya Yerusalɛm kilɛ yira a la. Wo ye a fɔla a ye ko a ni tarɛ da-keri-fan sɔ Yerusalɛm soe kan ma. Wo kɔma, ale mansɛ si to worondola ka kɛlɛ-matɔgɔ-kumɛnu fɔ. A si bɔnkɛ layɛlɛ soe wo tarɛ ma alako mɔgɔ-siyaman ni yɛlɛ tarɛ ma kɛlɛ-kɛ-tinɛ soe wo burɔ.

Isikiyɛli 21:22 ပူးပေါင်းရင်းမြစ်များ

2 Mansɛnu 25:1

Wo le ya a ma, Mansa Nɛbukanasa nara ala kɛlɛ-dannu na ka bui Yerusalɛm soe ma. Wo mara Sɛdɛkayala mansayɛ san kɔnɔntɔ, a karɛ tan, tele tan nyɔgɛ ma. Anu ya anu daga makɛ nun Yerusalɛm soe tarɛ kɔma. Anu ya bɔnkɛ ladɛn a nyɔgɔn kuma tala tarɛ kɔma alako anu ni ke kilɛ sɔrɔnna so-burɔ-mɔgɛnu ma.

Yobu 39:25

Buru-fɛ-kan anubɛ sun-tafɛ-kan ye bɔla anu nyɔgɔn fɛ le. A ye tola wula-yan le la, a ni kɛlɛ-sumɛ mabira ka kɛlɛ-kurugbɛ sɛrɛn-kan lamɔɛn.

Yɛrɛmaya 32:24

“Babilɔn kɛnu bara bɔnkɛ ladɛn tarɛ kɔma alako anu ni Yerusalɛm soe bira, ado anu bi ma kɛlɛ-tinɛ le. Kɛlɛ wo, kɔnkɔ wo, anubɛ kirayɛ si a ma, soe kɛ ni don anu bolo. I wara min bɛɛ fɔ, i ma a yen, wo bɛɛ ara bɔ-a-la,

Yɛrɛmaya 33:4

Isirɛlata Mari Alla ko anu yogenu bi tarɛ tuntunna bɔnkɛ la soe kɔma anu kɛlɛ-koe la min kɛ, wo ya a ma, Yerusalɛm kɛnu bara anuna bɔnnu anubɛ Yuda mansɛla bolɔn tii alako anu si tarɛ wonu tagbɛlɛya nya min.

Yɛrɛmaya 4:16

Kuman-kan wo ko wo ni kɛ fɔ sibolo-gbɛrɛnu ye ka a lake wole, Yerusalɛm kɛnu fanan ma ko wo yogenu bi nala ka bɔ wula-yan la pon! Kɛlɛ-kumɛ ye anu da rɔ Yuda soenu kan ma.

Yɛrɛmaya 51:14

Mari Sɛnbɛ-Bɛɛ-Tigi ara a keli ko a si sibolo-siyaman natugu Babilɔn kɛnu kan ma iko kondɔnnu. Anu si anu dɛ bolobɔ ko anu bara Babilɔn nɔ.

Yɛrɛmaya 52:4

Wo le ya a ma, Nɛbukanasa nara ala kɛlɛ-dannu na ka bui Yerusalɛm soe ma. Wo mara Mansa Sɛdɛkayala mansayɛ san kɔnɔntɔ, a karɛ tan, a tele tan nyɔgɛ ma. Anu ya anu daga makɛ nun Yerusalɛm soe tarɛ kɔma. Anu ya bɔnkɛ ladɛn a nyɔgɔn kuma tala tarɛ kɔma alako anu ni ke kilɛ sɔrɔnna so-burɔ-mɔgɛnu ma.

Isikiyɛli 26:8

Minnuna soenu sa yi dafɛ, wonu kunyɛ si to kɛlɛ rɔ bofe! Anu yogenu si bɔnkɛ ladɛn anuna tarɛnu ma alako anu si ke yɛlɛla tarɛ ma nya min anu kɛlɛ-koe la. Anuna nɛgɛ-walannu si ma Taya kɛnu yala iko dandan-gbɛlɛ-wɛ.

Isikiyɛli 26:9

Anu si anuna soe tarɛnu keri tara-keri-fannu na ka anuna nyamanɛ kumafɛlɛn-kan-tina-layan-bɛnu keri nɛgɛ-gbelekɛnu na.

Isikiyɛli 4:2

Wo kɔma, ka a yira ko kɛlɛ ye soe burɔ, i ni denkɛnu sin ala foolɛ rɔ. I ni bɔnkɛ layɛlɛ a tarɛ ma. I si kɛlɛ-dagɛnu nadan ala foolɛ rɔ ka tarɛ-da-keri-kɔlɔmanu sɔ don-dɛnu dafɛ.

Isikiyɛli 5:12

Wole Yerusalɛm kɛnu tatalanɛ sigi-tina sawa la, a tɔnkɔn kelan si to kirayɛ anubɛ kɔnkɛrɔ-soe burɔ. A tɔnkɔn kelan, wonu kundu si bɔ faan la soe kɔma. A tɔnkɔn kelan fanan ta si nyɛnsɛn kesemeren, iko fɔnyɔ wa ta fen na. N si wo sagaran faan la.

Isikiyɛli 5:13

“Wo si nna yisi-bɔɛ sɛnbɛ-dan lɔn ha wo tɔrɔya-nya ni n hɛnɛ. Wo wa ma, wo ti tɛrɛna wo la ko nde, Mari le wara kuma. N yisi ara bɔ ka a tɛgɛ wola telenbɛlitayɛ ma.

Emɔsi 1:14

Wo sɔn, wonu denu bi a mala, a ye tɛ layigila wola soe kuma, Raba, kɔni, ka anubɛ a tarɛ mintan gburr! Wo wati rɔ, sɔnkɔ-sɔnkɔ anubɛ kɛlɛ si taran nyɔ rɔ. Kɛlɛ si gbɛlɛya wo kuma iko banda-fin-fɔnyɔ.

Yasowa 6:20

Saraka-masɔlɛnu ya burinu fɛ. Isirɛla mɔgɛnu ya wo lamɔɛn tumɛ min, anu gbele-gbelenta wɛ kɛ. Tarɛ buira fugbu!

1 Samuwɛli 17:20

Wo wulun sɔgɔma subaga, Dawuda ya a lasɔ. A ya sagɛ wonu kerifanɛ to mɔgɛ do la. A ya dɔn-fan wo damasi bi iko a fa ya a fɔ a ye nya min. A ke dagɛ wo rɔ, a ya a taran, Isirɛla kɛlɛ-dannu bara bɔ dagɛ wo rɔ ka ta anu sɔ anu gbɛ rɔ anu si kɛlɛ kɛ kan min. Anu bi tala gbele-gbelenna anu bolo fɛ nya-kun-kelen.