Hoseya 4:12 - ALLALA KUMƐ

¹² Wo ye kɔlɔma-malɛsɛnɛnu mala wola nya-nyini-kɛ-fannu na. Kɔlɔma-fuyi le wonu na dɔrɔn. Wo si min ma, wonu denu bi wo labilala wonu na. Wo ara wo kan-kɔ don nde, Mari la feufeu! Wo ara nde, Mari boloka iko musu-yɛlan si ala kei boloka nya min ka ta yɛlɛnya-kɛ-tinɛ.

Hoseya 4:12 ပူးပေါင်းရင်းမြစ်များ

2 Mansɛnu 17:7

Samariya soe kasarata bawo Isirɛla mɔgɛnu ya hakɛ kɛ anuta Mari Alla la min ya anu nabɔ yɔɔnyɛ rɔ nun Iyipiti mansɛ bolo. Alla ara Kenan kɛ minnu gben anu yarɔ nun, anu tora wonuna bɛsɛnu kɔla. Anu ya anu sanka wonu ma ka wonu sɔn bi, ado Isirɛla mansɛnu fanan tora sɔn wo le la anu bolo.

2 Ko-Kɔrɔta-Karan 21:13

Kɔnɔ i ya Isirɛla mansɛnu sɔn bi ka sɔ Yerusalɛm kɛnu anubɛ Yuda kɛnu yarɔ telenbɛliyɛ rɔ Mari yala iko Mansɛ Ehabu ya a ma nya min Isirɛla nyamanɛ rɔ. I ya i dɔgɛnu faga nun, ado wonu tenbira i la.

Yaburi 106:39

Anu kɛ-nya ya anu natinya, ado anu denu ma telen Alla ye.

Yaburi 73:27

Mɔgɔ-wo-mɔgɔ ya a masɛgi ile la, wo tigi si tɔrɔ, yɔ! Ni mɔgɔ-wo-mɔgɔ ma a telen i ye, i si wo tigi halaki.

Yɛrɛmaya 10:8

Hɛnkilimɛ wonu hɛnkili sa, ado kuntan le anu na. Anuna hɛnkilimayɛ wonu bɔnɛ anuna bɛsi-fuyi wonu denu tɔ.

Yɛrɛmaya 2:27

Wo kɛnɛna a fɔla wola kɔlɔma-malɛsɛnɛnu ma ko wo fa le wonu na. Wo kɛnɛna a fɔla wola kuru-malɛsɛnɛnu ma ko wonu denu ya wo sɔrɔn. Mari ko wo ara wo yɛ bɔ a la. Wo ara wo kan-kɔ sɔ a la. Kɔnɔ nanparan wa na wo ma, wo ye dila Mari dala wo kisi-koe la.

Yɛrɛmaya 23:13

A ko a ara Samariya nɛbinu hakɛ yen a kolan la. Anu bi yarɔ-kumɛnu fɔla bɛsi Beyalila ko rɔ. Anu bara a ma, ata Isirɛla mɔgɛnu bara kilɛ maka.

Isikiyɛli 20:32

Anu bara a latɛgɛ ko anu ni ma iko sibolo-gbɛrɛnu ka kɔlɔmanu anubɛ kurinu kɔ. Kɔnɔ wo ti ma mumɛ!

Isikiyɛli 21:21

Babilɔn mansɛ wa ke kila-tangbɛ wo ma, a si nya-nyini-kɛ kalabɛnnu na alako a ni a lɔn, ni a si ta kilɛ min fɛ. Wo kɔma, a si ala bɛsɛnu manyinika ka bolo-tafɛlɛn benya la alako ni a si kilɛ lɔn nya min.

Hoseya 14:3

Wo kɔma, wo ni a fɔ ko, “Asiriyanu ti ke ma lakisila. Mala kɛlɛ-kɛ-soeenu ti ke ma lakisila. Ma ti a fɔ tun ko bɛsɛ le mata Alla la.” Wo ni a fɔ ko, “E, Mari, i ni ma dɛnbɛ bawo ma mani de iko kelennɛ minnu bi dɛnbɛnɛ sɔrɔnna ile le bolo.”

Hoseya 5:4

Wole Isirɛla mɔgɛnu bara ko-yogomɛ minnu ma, wo le ye wo mabelila wota Alla-bato-kilɛ ma. Bɛsi-kɔɛ ara wo bira gbuturu! Wo ma Mari lɔn fenfen na.

Hoseya 6:10

N bara koe min tayen Isirɛla nyamanɛ rɔ, wo ma daga. Wole nna mɔgɛnu, wo ara wo nyɛrɛ latinya bɛsi-kɔ-koe fɛ. A ma bɛn defan, wo ni a bato.

Hoseya 9:1

Wole Isirɛla mɔgɛnu, wo ni wo fara wola ladiyɛnu kɛla iko Alla-lɔnbɛlɛnu. Wo ara wo kan-kɔ sɔ wota Alla la ka ma telenbɛlɛnu na a ye. Wo ara wo nyɛrɛ ma iko musu-yɛlan ka wo nyɛrɛ latenbi wola bɛsi Beyali ma nyamanɛ kɛ mumɛ bɛɛ rɔ iko bɛsɛ wo le wo de-nyinina ka wola fui-fan sabati.

Saraka-Masɔlɛnuta Tɔnnu 17:7

Mɔgɛnu kana anuna kolo-fannu faga dagɛ kɔma bawo dina-do-mɔgɛnu bi anuna baanuna muninyɛ kɔla nyɔ. Ni min ya wo ma, wo tigi ara a nyɛrɛ purukulu Mari bolo. Tɔn kɛ siginɛ Isirɛla mɔgɛnu ma ka a fɔlɔ bi ma ha duninya si ban.

Saraka-Masɔlɛnuta Tɔnnu 20:5

Mari si a kan-kɔ sɔ wo ko-yogoma-kɛlɛ anubɛ ala denbayɛnu na anubɛ a fɛ-sɔlɛnu. Min ya a to, a ye kɛnu fagala bawo wo mani de iko anu bara anu kan-kɔ sɔ Mari la ka anuna dannu ma sarakɛnu na Molɛki ye. Allata ma mɔgɔ sufa wonu na tun.

Maika 2:11

“Mari ko wole kensuntenu bi nyinina foninya-nɛbinu ma minnu si wo mayuwaya. Wonu si belenna a fɔla wo ye ko, ‘Baan-feremɛnu bi wola ko la duk!’

Habakuku 2:19

Wole karagbɛlɛnu, wo si wota nondɔn sɔrɔn de serr! Wo ye a fɔla kɔlɔma-kundi ye ko, “Kunden!” Wo ye a fɔla kuru-kundi ye ko, “I lasɔ!” Bɛsɛ kɛnu si a ma, wo ni ko-rayen kɛ, wa? Hali bɛsɛ wo makirinɛ sɛnɛ anubɛ wodi-gbɛ la kɔnɔ a niyi sa a rɔ.

Yilan-Yilan Koe 15:39

Wo wa a bunsan kɛnu yen tumɛ min, wo si wo miri Marila tɔnnu ma ka anu bira. Wo si a ma, wo ti wo nyɛrɛ sako kɛ ka wo kan-kɔ sɔ a la.

Tɔn-Fɔɛ-Fila-Nyɔgɛ 31:16

Mari ya a fɔ Musa ye nyɔ ko, “Musa, i sa mɛla so-sɛgi-kɛla tun. I wa so-sɛgi-kɛ tumɛ min, mɔgɛ kɛnu si n boloka ka sarama-kan tinya ka don lanyiri-nyamanɛ bɛsi-kɔ-koenu tɔ anu bi tala kan min.

Kɛlɛ-Kurugbɛnu 18:5

Anu ya a fɔ a ye ko, “I yandi, n fa, Alla manyinika ma ye ni mala tagama si diya.”