Habakuku 1:6 - ALLALA KUMƐ

⁶ Babilɔn kɛ minnu karagbɛlɛ, ado anu yisi lakala kati, n bi nala sɛnbɛ dila anu ma mɔgɛnu kan ma. Anu bara wuli buila sibolo-gbɛrɛnu ma ka anuna nyamanɛnu bi anu bolo.

Habakuku 1:6 ပူးပေါင်းရင်းမြစ်များ

2 Mansɛnu 24:1

Yahoyakim ye mansayɛ la tumɛ min, Babilɔn Mansa Nɛbukanasa tara bui Yuda nyamanita-mɔgɛnu ma. San sawa Mansa Yahoyakim ye Mansa Nɛbukanasa kɔrɔ. Wo kɔma, a murutiyara a ma.

2 Mansɛnu 24:2

Mari ya a ma, nyamani-kun nani mɔgɔ-kurɔn donu wulita Yuda nyamanita-mɔgɛnu kan ma iko Mari ya a fɔ ala wɔli-kɛla nɛbinu ye nya min nun. Kurun do bɔra Babilɔn, do nara ka bɔ Siriya nyamanɛ rɔ, do nara ka bɔ Mohabu nyamanɛ rɔ, anubɛ do nara ka bɔ Amon nyamanɛ rɔ.

2 Ko-Kɔrɔta-Karan 36:17

Wo le ya a ma, Mari ya Babilɔn mansɛ latugu anu kan ma. Ala kɛlɛ-dannu tora Yuda kemini-mɛsɛnu fagala hali minnu bi Bato-Bɔn la. Anu ma kinikini mɔgɔ-wo-mɔgɔ ma. Kei wo, musi wo, denni wo, kina wo, a kirayato wo, Alla ya wonu damasi kunyɛ don anu bolo.

2 Ko-Kɔrɔta-Karan 36:6

Wati tenbinɛ, Babilɔn Mansa Nɛbukanasa tara bui Yuda nyamanita-mɔgɛnu ma. A ya Mansa Yahoyakim bira ka ta a la Babilɔn nyamanɛ rɔ. A kirinɛ yɔlɔkɛ la.

Aiseya 23:13

Wo ni wo yɛ lata Babilɔn nyamanɛ ma. Nyamani ma a la tun. Asiriyanu buira anu ma ka anuna tarɛnu nabui ka a tonbon-nɛ to. Sogo-feremɛnu denu siginɛ nyɔ gbɛ!

Yɛrɛmaya 13:20

Ile Yerusalɛm kun-tiginu, wo ni wo kunyɛnu kɔrɔbi. Wo ni wo yɛ lata. Wo ma wo yogenu yen bɔla kantɔ pan? Alla ya mɔgɛ minnu kerifa wo la, wonu bi mintɔ gbɛ? Nba, wo wasinɛ wonu denu tɔ.

Yɛrɛmaya 21:4

Isirɛlata Mari Alla ko a si a ma, Babilɔn mansɛ ni ale Sɛdɛkayata kɛlɛ-dannu nɔ. Anuta kɛlɛ-kɛ-mirannu ti anu dɛnbɛ nɔ-ko sɔrɔn-tinɛ. Babilɔn kɛlɛ-dannu si don hali Yerusalɛm soe burɔ.

Yɛrɛmaya 21:7

Kɔnɔ Mari ya a fɔ fanan ko ale Sɛdɛkaya wo, ala mɔgɔ-banu wo, hali kiraya-fitinɛ anubɛ kɛlɛ-fitinɛ anubɛ kɔnkɔ-fitinɛ foora wole minnu na wo, Mansa Nɛbukanasa faga-sɔgɛ ye mɔgɛ minnu na, wonu denu si ta wo la, ado ale mansɛ ti kinikini wo ma ka wo fenfen yamasansan. A si wo damasi faga tɛrr! Mari nyɛrɛ kan le kɛ la.

Yɛrɛmaya 25:9

a si kantɔ-mɔgɛ bɛɛ kele wo kan ma katarala Babilɔn Mansa Nɛbukanasa ma, ata wɔli-kɛlɛ, kɔni. A ko mansɛ wo si na wole Yuda nyamanita-mɔgɛ bɛɛ kɛlɛ anubɛ wo dan-masa-nyɔgɛnu. Anu ba ban wo kɛlɛla, anu si wola nyamanɛ kasaranɛ to. Mɔgɛ min ba nyɔ yen, wo kuma si tɛgɛ.

Yɛrɛmaya 30:5

A ko a ye wole, ata mɔgɛnu wɔrɔndɔ-kan lamɔɛnna kumakɔɛ bolo. Wo kilannɛ dɔgɔma-ma-de, ado yisi-kimɛ sa nyɔ.

Yɛrɛmaya 4:11

Wo wati wa ke, kilayɛ kɛ la si ke wo ma. Kilayɛ si a fɔ ko fɔn-kalamɛ si bɔ wularɔ-kɔnkɛnu wara la ka ta wole, Allata mɔgɛnu magbenna. A mani ma de iko fɔn-fɛlɛfɛlɛnɛ, sɛni-salɛnu bi fui-fannu rafɛla min na.

Yɛrɛmaya 4:6

Wo ni tamasere layɛlɛ san ma min si a ma, mɔgɛnu ni Yerusalɛm kilɛ bira. Wo ni wo buri wola kanan-koe la. Wo kana a makɔni bawo a ko a ye kasarɛ lanala ka bɔ kantɔ-wara la. A ko kasarɛ wo si ma kasara-belebele la.

Yɛrɛmaya 4:8

Wo ni kasa-kurɛ bila wo kan na. Wo ni di biribiri, ka wo dɛ sa-a-rɔ bawo Marita diminyɛ ma a kan-kɔ sɔ wɛ wo la.

Yɛrɛmaya 5:15

Wole Isirɛla mɔgɛnu, Mari ko wo ni wo tole masɔ. A ti mɛ tun, nyamanɛ do si na wo tɔrɔ-tinɛ ka bɔ wula-yan la. A ko nyamani-kɔrɔkɔrɛ do le wo la. Mɔgɛ wonu bi kumɛ min fɔla, wo ti wonu kan ragbɛ. Wo ti ke anu kuli ragbɛla.

Yɛrɛmaya 8:10

Mari ko a si anuna musinu di kei-gbɛrɛkɛnu ma. A si anuna wɔli-kɛ-tinɛnu di mɔgɔ-gbɛrɛkɛnu ma. A mɔgɔ-ba wo, a fɛlɛteni wo, anu dama sokesoke wodi-sɔrɔn-koe rɔ. A nɛbi wo, a saraka-masɔla wo, wo bɛɛ siginɛ foninyɛ le ma.

Isikiyɛli 16:40

Wonu si nyama latugu i ma ka i mabon kuri la. Anu si i ratɛgɛ gbede-gbede anuna faannu na.

Isikiyɛli 21:31

N ba nna diminyɛ labɔ wo ma iko ta-mɛlan, wo si a lɔn. N si wo kunyɛ don yisi-gbɛlɛtenu bolo minnu si wo faga boloko-yogomɛ-kɛ.

Isikiyɛli 28:7

nde, Mari si a yoge karagbɛlɛnu natugu a kan ma. A ara min dama sɔrɔn ala hɛnkili anubɛ halliyɛ wo rɔ, anu si fen-nyimɛ wo bɛɛ kasara.

Isikiyɛli 31:12

Sibole do min karagbɛlɛ bɛɛ ko, wo si a tɛgɛ ka a sani to dugi ma fuyan! A bolon-kinamɛnu anubɛ a bolon-mɛsɛnu ta si nyɛnsɛn kɔnkɛnu anubɛ lɛɛnu tɔ nyamanɛ wo bɛɛ rɔ. Sibole min bɛɛ siginɛ a ninɛ kɔrɔ, wonu si ta anu kun fɛ.

Yowɛli 2:3

Anu bi ki-fannu banna le iko tɛ ye bin-gbalɛ banna nya min. Mala nyamanɛ mani de anu ya rɔ iko Alla ya nakɔɛ min nadan ma benba Hadama ye. Anu ba bɔ kan min, nyɔ si ma iko wula-da-rakolɔn. Anu ti tenbi fenfen na.