Filipai 4:19 - ALLALA KUMƐ

¹⁹ Nba, nta Alla si wo makoe bɛɛ nyinya iko ala nɔnfulu-waranɛ ye nya min Kirasiti Yisa rɔ.

Filipai 4:19 ပူးပေါင်းရင်းမြစ်များ

Ko-Dabirɛnu 48:15

Yakoba duwara Yusufula dannu ye ko, “Alamɛ n fa Isiyaka anubɛ n benba Iburayimata Alla ni ata duwɛ layigi den-kei filɛ kɛnu kuma. Ka a bi n dennɛ ma ha ka a sigi kaka la, Alla min ya n kandan ka n tanka masibɛnu ma, alamɛ wota duwɛ tora anu kuma.

2 Samuwɛli 22:7

N bi yakɔrɔ-mamɔɛ wo la n bolo tumɛ min, n ya nta Mari Alla rakele alako a ni n dɛnbɛ. A ya n kan wo lamɔɛn ata Bato-Bon-sɛnimɛ la. A ya a wɔlɔ matɔlɔ n di-kɛ-kan la.

2 Ko-Kɔrɔta-Karan 18:13

Kɔnɔ Nɛbi Mɛkaya ya a fɔ a ye ko, “A ye malebɛ Mari tɛma, nta Alla ye min fɔla n ye, n bi wo le latenbila mansɛ ma.”

2 Ko-Kɔrɔta-Karan 31:8

Mansa Hɛsakaya anubɛ ala mɔgɔ-banu ya a yen min kɛ ko nyamanita-mɔgɛnu bara na kɛ nyɔgɔn sufa la, anu ya Mari tanto ka Marita mɔgɛnu matɔgɔ fanan.

Nihɛmaya 5:19

E, Alla, i yandi, n bara koe min bɛɛsi kɛ mɔgɛ kɛnu ye, a ma, n ni wo barayi sɔrɔn yarɔ.

Nihɛmaya 9:15

“Kɔnkɛ ya anu bira wati min, i ya biredi layigi anu ma ka bɔ san-kole rɔ. Anu kan lagbalata wati min, i ya yi labɔ anu ye farɛ rɔ. I ya anu yili-madiya nyamanɛ minna ko la, i ya a fɔ anu ye ko anu ni nyɔ bi.

Yaburi 104:24

Mari, i wara fen-siyaman dan. Ita hɛnkilimayɛ le ya wo bɛɛ dan. Duninya lafanɛ ila nima-fannu na.

Yaburi 130:7

Isirɛla mɔgɛnu, wo ni la Mari la gben! Bawo ala keninteyɛ ti wo baya, ado tumɛ bɛɛ, a rabɛnnɛ wo kisi-koe la.

Yaburi 36:8

Ma tenbi ladiyɛ rɔ i warɛ bɔn la, ma ti dɔn-fan ban ile bolo. Ita ko-nyimɛ mani de ma ye iko ba-belebele, ma si ma min kan min.

Yaburi 84:11

Ma latankalɛ le Mari la, ado mala gbiliya-mansɛ le. Ala duwɛ ye ma fɛ ka kinikinɛ anubɛ gbiliyɛ di ma ma. A ti ko-nyimɛ bɔ mɔgɔ-telennɛ telen tɔ.

Daniyɛli 6:22

Nta Alla ara ata melika lana ka yarɛ kɛnu dɛ makiri alako anu kana ko ma n na. A ya kɛ ma le bawo n ma ko tinya, ado n ma ko-yogoma ma i la.”

Maika 7:7

“Hali wo, nde, Nɛbi Maika, n bi n kisilɛ Mari Alla makɔnɔna. Nta Mari Alla si a wɔlɔ matɔlɔ nta kumɛ kɛ la.”

Malakayi 3:10

A bɛnta, a ni yaka min nyɔgɔn sɔrɔn wo bolo, a ko wo ni na wo dama la Bato-Bɔn la woletɔ dɔn-fan ra si boroko-baraka nyɔ rɔ. Mari ko wo ni a rasuma. A ko wo si a yen ni a ti san-kolo-dɛnu naka ka fen-nyima-siyaman nayigi wo ma biribiri!

Matiyu 6:32

(Hali Alla-lɔnbɛlɛnu bi nyinina kɛnu denu ma tuma-wo-tuma.) Kɔnɔ wo Fa Alla min bi Arinyɛni tɔ, wo ya a lɔn ko wo makoe ye fan kɛ bɛɛ la.

Yɔni 20:17

Yisa ya a fɔ a ye ko, “I kana i bole tugu n na bawo n ma yɛlɛ wɛ n Fa Alla warɛ. Kɔnɔ ta a fɔ n na-kelen-nyɔgɛnu ye ko n bi nala yɛlɛla san-kole rɔ n Fa anubɛ wo Fa warɛ, nta Alla anubɛ wota Alla, kɔni.”

Yɔni 20:27

Wo kɔma, a ya a fɔ Tamasi ye ko, “I bolo-nɔlɔnɛ sa yan. N bolenu mafɛlɛn. I bole rasagan ka a don n tɔnkɔn rɔ. Sikɛ ni bɔ i rɔ. I ni la n na!”

Romu 1:8

A dabira fɔlɔtɛ, n bi baraka birala n Fa Alla ye wo damala ko la Yisa Kirasiti tɔgɔ rɔ bawo duninya bɛɛ ye wola dɛnkɛninya-koe lamɔɛnna.

Romu 11:33

Allala nɔnfuli kolo de! Ala hɛnkilimayɛ anubɛ ata lɔnnɛ ti ban mumɛ! Yon si ke ata ko-latɛgɛnɛnu faranfasila? Yon si ke a miriyanu lɔnna?

Romu 2:4

Allala nyimayɛ wo, ata dinyɛ wo, anubɛ ata munyu-waranɛ wo, wo ara tɛgɛ wonu tɔ, nyɛ? Ko Alla ye ko-nyimɛ kɛla wo ye alako wo ni tubi a ma, wo ma wo lɔn, ba?

Romu 8:18

N lanɛ a la ko ma ye tɔrɔyɛ min sɔrɔnna kaka, wo ti sanka gbiliyɛ wo ma min si na bɔ gbɛ rɔ ma ye.

Romu 9:23

A ya ala gbiliyɛ min nabon ma kuma, a si wo waranɛ labɔ gbɛ ma fanan. A bɛnta, male min ni ala kinikinɛ lɔn, a ara male rabɛn ala gbiliyɛ-sɔrɔn-koe la,

2 Kɔrɛnti 12:21

N kilannɛ fanan ko n ba ta tumɛ min, nta Alla si n nafɛya wolela ko la. Wo siyaman bara hakɛ kɛ fɔlɔn. N kilannɛ, wo ti sɔn tubila ko-kɔsɔnɛ wonuna ko la. Wo ya min kɛ, wola yɛlɛnya-hakɛnu anubɛ nata-kɛwɔlɛnu si a ma, n ni di biribiri wo siyamanna ko la.

2 Kɔrɛnti 4:17

Nba, ma ara tɔrɔya-kundu-ni kɛ sɔrɔn min ti a laban kɔnɔ wo si habadan-gbiliya-belebele di ma ma, min kolo tɔrɔyɛ wo ko pirr!

Ɛfɛsa 1:18

N bi a matarala ko ata wan-takanɛ ni wo hɛnkili-dɛ laka. Wo wa ma tumɛ min, a ya wo kele yigi min ma, wo ni na to wo lɔnna. Wo kɔma, wo ni a lɔn a ara duwa-belebele min kiri wole, ata mɔgɛnu ye.

Ɛfɛsa 1:7

Kirasiti ya a nyɛrɛ ma sarakɛ la alako a yele ni ma hɔrɔya ma hakɛnu ma. A ya wo ma Allala hina-warani-bɛla ko la,

Ɛfɛsa 2:7

Alla ya a latɛgɛ wo nya na le alako a ni ala hina-waranɛ labɔ gbɛ ma, ado a ya hinɛ wo yira ma la Yisa Kirasiti le tɔ.

Ɛfɛsa 3:16

N bi Alla matarala ko a ni sɛnbɛ di wo ma ata Ni-Sɛnimɛ baraka rɔ alako wo ni sɛnbɛ sɔrɔn wo yisi rɔ iko ala gbiliya-waranɛ ye nya min.

Ɛfɛsa 3:8

Hali Allata mɔgɛ bɛɛ tenbira nde la kɔnɔ Alla ara n gbiliya ka kibara-nyimɛ lake-fɛrɛ kɛ di nde ma. A ya wo di n ma alako n ni Kirasitita hina-waranɛ yira wole sibolo-gbɛrɛnu na.

Filipai 4:7

Nba, Allata yisi-kimɛ min tenbinɛ hadama-den-hɛnkili bɛɛ dan la, wo si wo yisi anubɛ wo hɛnkili kandan Kirasiti Yisa rɔ.

Kɔlɔsi 1:27

ado Allata ko-rabɛn le wo la alako ata mɔgɛnu ni ala gbundu-koe lɔn. Gbundu-koe wo makawara, a gbiliyanɛ. Gbundu-koe wo le ko Kirasiti siginɛ wole sibolo-gbɛrɛnu fanan yisi rɔ. Yigi le wo la alako wo fanan ni wotɛ sɔrɔn Allata gbiliyɛ wo rɔ iko male Yahudiyanu.

Kɔlɔsi 3:16

Kirasitita kumɛ ni sigi wo yisi rɔ ka wara nyɔ. Wo ni wo nyɔgɔn karan ka wo nyɔgɔn makawandi hɛnkilimayɛ la. Wo ni to bɛtinu bɔla Yaburi kitabu rɔ ka sigi-sɛnimɛnu sa. Wo ni bɛti wonu bɔ Alla ye baraka-birɛ la wo yisi rɔ.

1 Tɛsalonaika 2:12

Ma ya wo makawandi ko wo yisi ni kimɛ. Ma ya wo madiya ko wo ni tagama-nyimɛ kɛ ka Alla hɛnɛ, ado ale le ara wo kele ka wo ladon ata mansayɛ anubɛ ala gbiliyɛ rɔ.

1 Timoti 6:17

Nɔnfuli ye minnu bolo duninya kɛ rɔ, i ni wonu makawandi ko anu kana wasi. Anu kana anu yigi sa nɔnfuli kuma iko fen de min bi mɛla. Anu ni anu yigi sa Alla kuma min bi fan bɛɛ dila ma ma foninsereyɛ la ka ma lasewa.

Failiman 1:4

N na-kelen-nyɔgɛ Failiman, n ba Alla madiya tuma-wo-tuma, n bi madiyali kɛla i ye. N si baraka bira nta Alla ye

1 Pita 5:1

Wole chɔchi-mɔgɔ-banu, n bi kɛ sɛbɛla ka wo kɔntɔ-diya. Chɔchi-mɔgɔ-ba le nde fanan na, ado Kirasiti ara tɔrɔyɛ minnu sɔrɔn, wo sereyɛ le nde la. Nde fanan si bɛn gbiliyɛ wo rɔ min si na bɔ gbɛ ma.

1 Pita 5:10

Kɔnɔ wo wa tɔrɔ wati-kundu-ni kɔrɔ, hinɛ-bɛɛ-tigi Alla min bi wo kelela ala habadan-gbiliyɛ ma Kirasiti rɔ, ale nyɛrɛ si wo kanbali ka wo sɔ-bole rabɛn gben!