Filipai 4:1 - ALLALA KUMƐ

¹ Woletɔ n na-kelen-nyɔgɛnu, wola ko di n ye dɛɛ! Wo yen-sɔgɛ ye n na bɛrɛkɛ! Wo ara n nasewa kati, ado n wasinɛ wola ko la a nya ma. N diyana na-kelen-nyɔgɛnu, wo ni wo sɔ gben Marila koe rɔ.

Filipai 4:1 ပူးပေါင်းရင်းမြစ်များ

Yobu 31:36

n si a sa n kawɛ ma alako bɛɛ ni a yen, ni wo ma, n ni a don n kunyɛ la iko mansaya-fulɛ.

Yaburi 125:1

Minnu yigi sanɛ Mari rɔ, wonu mani de iko Marita kɔnkɔ-sɛnimɛ Yerusalɛm. A ti yɛrɛyɛrɛn ka bɔ a gbɛ rɔ muk!

Yaburi 27:14

Ma ni la Mari la. Ma kana bandan. Ma ni to Mari makɔnɔna tolon!

Matiyu 10:22

Wo si gboya mɔgɛ bɛɛ ye ndela ko la kɔnɔ ni min si a munyu ha a laban, wo tigi si kisi.

Yɔni 8:31

Wo kɔma, Yahudiya minnu dɛnkɛninyara a ma, Yisa kumara wonu ye. A ko, “Ni wo ya nna karan bira, nna karan-den-bɛrɛ le wole la.

Kɛwɔlɛnu 11:23

A kera nyɔ tumɛ min, Alla ara ata duwɛ layigi ata mɔgɛnu kuma nya min, wo yen a bolo, a sewara. A ya anu dama makawandi ko anu ni lanayɛ kɛ ka telen Mari ye anu yisi bɛɛ la.

Kɛwɔlɛnu 14:22

Anu ya nyɔ-dɛnkɛninya-mɔgɛnu sɛnbɛ don ka anu makawandi ko anu ni to dɛnkɛninyɛ rɔ yiri! Anu ya anu karan ko, “Yanni ma ni don Allala mansayɛ rɔ, fɔ ma ni tɔrɔya siyaman sɔrɔn.”

Kɛwɔlɛnu 2:42

Wonu tora karanna Yisata kilayɛnu fɛ ka ta-nyɔgɔnyɛ kɛ. Anu tora Marita kima dɔnna anu nyɔgɔn fɛ ka Alla matara.

Romu 2:7

Mɔgɛ donu bi bonyɛ anubɛ gbiliyɛ anubɛ habadan-nimayɛ nyinina Alla bolo min kɛ, woletɔ anu si to ko-nyimɛ kɛla dɛɛ! Tonyɛ le wo la, Alla si habadan-nimayɛ di wonu denu ma.

1 Kɔrɛnti 15:58

Woletɔ n na-kelen-nyɔgɛnu, wo ni wo sɔ gben! Wo ni to wɔlila Mari ye tuma-wo-tuma bawo wo ya a lɔn ko wo ye min kɛla Marita wɔlɛ rɔ, wo ti ma fuyi la mumɛ!

1 Kɔrɛnti 16:13

Wo ni wo ya lakalan ka wo sɔ dɛnkɛninyɛ rɔ yiri! Wo ni wo kerinteya ka wo sɛnbɛ don.

Kalesiya 5:1

Kirasiti ara ma hɔrɔya feu! Wo ara hɔrɔya min kɛ, wo ni wola hɔrɔyɛ bira gben! Wo kana sɔn ko Nɛbi Musata tɔn-kitabu ni wo ma yɔɔn la tun!

Filipai 1:27

Nba, ko-wɛ ye min na, wo le kɛ la. Wo tagama-nya ni bɛn Kirasitila kibara-nyimɛ ma. Woletɔ ni n ya fɛrɛ sɔrɔn ka ta wo yen, ni n ma ta, n si to a lamɔɛnna ko wo sɔnɛ yiri! Wo si a taran, wo ye wɔlila wo nyɔgɔn fɛ kan kelen tɔ kibara-nyimɛla ko la wo dɛnkɛninyanɛ min ma.

Filipai 1:8

N bi n miri-wɛ min kɛla wo ma, wo ye bɔla Kirasiti Yisa nyɛrɛ le yisi rɔ. N ba wo fɔ, Alla ye n sere la ko n bi tonyɛ le fɔla wo la.

Filipai 2:26

A sɔgɛ ye a la ka wo dama yen, ado a yisi sani ma bawo wo ara a lamɔɛn ko a kirayara.

Kɔlɔsi 4:12

Wo ta-nyɔgɛ Ɛpafarasi ye wo kɔndɔnna. Yisa Kirasitita wɔli-kɛlɛ le ale fanan na. A si a raya madiyalɛ ma wo ye tumɛ bɛɛ. A ye Alla matarala ko wo kanbalinɛ ni to sɔnɛ yiri, ka Alla sako bira koe bɛɛ rɔ.

1 Tɛsalonaika 3:13

Alamɛ wo yisi ragbɛlɛyara alako ma Mari Yisa anubɛ ata mɔgɔ-sɛnimɛnu ba na tumɛ min, wo sɛninyanɛ ni taran ma Fa Alla yala.

2 Tɛsalonaika 2:15

Woletɔ ma na-kelen-nyɔgɛnu, wo ni wo sɔ yiri! Ma ya wo karan tonyɛ min na kawandilɛ anubɛ kɛdi rɔ, wo ni wo bira gben!

2 Timoti 2:1

Nba, nna dan, i ni Alla madiya ko a ni i sɛnbɛ makofu. A si i sɛnbɛ makofu ka a tɛgɛ ata hinɛ ma i wara la Yisa Kirasiti baraka rɔ.

Hiburunu 10:23

Ma ye yigi minna ko fɔla, ma ni wo bira gben, bawo ma lanɛ Alla la ko a si ata lanyiri kanbali.

Hiburunu 3:14

Ni ma tora lanayɛ kɛla ka bi a fɔlɔtɛ ha ala ban, ma dama ye ta-nyɔgɔnyɛ kɛla Kirasiti fɛ worɔ.

Hiburunu 4:14

Saraka-masɔla-kun-tigi-wɛ ye ma bolo min bara ta ha Alla yakɔrɔ, Allala dan Yisa, kɔni. Nba, ma ara dɛnkɛninya Yisa ma min kɛ, ma ni dɛnkɛninyɛ wo bira ma bolo filɛ la gben,

2 Pita 3:17

Kɔnɔ n diyana-mɔgɛnu, wo ara ban hɛnkili sɔrɔnna wonu ma min kɛ, wo ni a ma wo fɛrɛma worɔ. Tɔn-tinyalɛ wonu kana a ma, wo ni sama kilɛ ma.