Tɔn-Fɔɛ-Fila-Nyɔgɛ 31:17 - ALLALA KUMƐ

¹⁷ Wo wa ma tumɛ min, n fonde si bɔ anu kuma ka n kan-kɔ sɔ anu na. Anu si masiba-koenu sɔrɔn. Anu ba koe kɛnu yen mala anu na tumɛ min, anu si a lɔn worɔ ko nde min bi anuta Alla la, nde sa anu fɛ.

Tɔn-Fɔɛ-Fila-Nyɔgɛ 31:17 ပူးပေါင်းရင်းမြစ်များ

1 Mansɛnu 8:57

Alamɛ mata Mari kana ma boloka dɛɛ! A ni to ma fɛ iko a tora ma benbanu fɛ nya min.

2 Mansɛnu 22:13

“Wo ta Mari manyinika mabɛ nta nyamanita-mɔgɛnu ye ka a tɛgɛ buku kɛ karanla ko ma. Mari ara diminya ma ma bawo ma fanu ma tagama iko a sɛbɛnɛ buku kɛ rɔ nya min.”

1 Ko-Kɔrɔta-Karan 28:9

A ya a tintan ala den Silamɛni na ka a fɔ a ye ko, “Nna den, i ni nta Alla wara-koe lɔn ka ata wɔlɛ kɛ i yisi bɛɛ la. Alla ya ma miriya anubɛ mala natanu lɔn. Ni i ya i gbɛrɛn a ma, a si i rabira. Kɔnɔ ni i ya i kan-kɔ sɔ a la, a si a ban i la feufeu!

2 Ko-Kɔrɔta-Karan 15:2

A tara Mansa Esa taran. A ya a fɔ anubɛ ala mɔgɛnu ye ko, “Wole Yuda bɔnsɔn-mɔgɛnu anubɛ Bɛnyamɛ bɔnsɔn-mɔgɛnu, wobɛ wola mansɛ ni wo wɔlɔ matɔlɔ. Fananta wo ye Mari fɛ, a ye wo fanan fɛ. Ni wo ya a nyini, a si a ma, wo ni a yen. Kɔnɔ ni wo ya wo kan-kɔ sɔ a la, ale fanan si wo boloka.

2 Ko-Kɔrɔta-Karan 21:10

Ka a bi wati wo ma ha a mɛra Idɔm nyamanɛ ye a nyɛrɛ ma le. Wati kelan wo le tɔ fanan, Libina so-burɔ-mɔgɛnu murutiyara a ma bawo Mansa Yɛhoram bara a kan-kɔ sɔ Mari la, a benbanuta Alla, kɔni.

2 Ko-Kɔrɔta-Karan 24:20

Wo kɔma, Allata sɛnbɛ yigira Saraka-Masɔla Yɛhoyadala den Sakaraya ma. A sɔra gbɛ rɔ mɔgɛnu si a yen kan min. A ya a kuli mayɛlɛ ko, “Mari Alla ye nyinikalɛ sala ko nfenna wo ye ata tɔnnu tinyana ka kasarɛ lana wo nyɛrɛ kuma. Wo ara wo kan-kɔ sɔ ale la, woletɔ ale fanan ara a kan-kɔ sɔ wole la.”

Nihɛmaya 9:32

“E, mata Alla, i makawara. I makilannɛ ita sɛnbɛ la. Sarama-kan min kirinɛ ma tɛma, ile ara itɛ latɔnbagaya. Kebi Asiriya mansɛnu ya ma tɔrɛ min dabira, ha bi, ma ye tɔrɔya kelen wo le kun na. Mala mansa wo, mala kun-tigi wo, mala saraka-masɔla wo, mala nɛbi wo, ma benbanu wo, anubɛ mala mɔgɛ toenu wo, ma dama ye tɔrɔyɛ wo rɔ. I yandi, i miri mala tɔrɔyɛ yirika ma.

Yobu 13:24

Nfenna i wara i kan-kɔ sɔ n na ka n lɔn i yoge la?

Yobu 34:11

Mɔgɔ ya ko-wo-ko ma, a si i sara wola ko la. A ye anu birala iko anu kɛ-nya ye nya min.

Yaburi 104:29

I wa i kan-kɔ sɔ anu na, wo si anu takilan. I wa ila fɔnyɔ bi anu bolo, anu si faga. Anu bi sɛgila bɔnkɛ le tɔ tun anu bɔra kan min nun.

Yaburi 2:12

Wo yɛrɛyɛrɛnmatoe ni wo madu a kɔrɔ. Ni wo ma, a fonde si bɔ. Wo si firan dugu-kole kɛ kuma feu! Mɔgɔ-sewanɛ le wo tigi la min bi tala Mari wara kanan-koe rɔ.

Yaburi 27:9

I kana i nyɛrɛ dogon n ma. I kana diminya n ma ka n gben. Kebi fɔlɔ, n dɛnbɛnɛ le ile la woletɔ i kana n boloka. E, Alla, nna kisilɛ le ile la.

Yaburi 30:7

Mari, i ye n fɛ wati min, n tagbɛlɛ iko kɔnkɛ. Kɔnɔ i ya i kan-kɔ sɔ n na wati min, n yisi tinyanta.

Yaburi 44:10

I ya a ma, ma ya ma buri ma yogenu kɔrɔ. Anu ya ma bolo-fannu bi anu nyɛrɛ ma.

Yaburi 89:46

Mari, i kan-kɔ sɔnɛ si to n na ha muntuma? Ita fondo-bɔɛ si to mintannɛ kɛla iko tɛ ha tumɛ nyamintan?

Yaburi 90:11

Yon si ke ita fondo-bɔ-fanka lɔnna? Ma si kilan i la iko a bɛnnɛ ka kilan ita fondo-bɔɛ la nya min.

Aiseya 2:6

E, Alla, i wara i ban ila mɔgɛnu na, Yakoba kegeyɛnu, kɔni. Nyamanɛ kɛ lafanɛ nya-nyini-kɛlɛnu na ka bɔ tele-bɔɛ wara la anubɛ Filisiti nyamanɛ rɔ. Ila mɔgɛnu bi sibolo-gbɛrɛnuna namunyɛ bila.

Aiseya 5:25

Mari fonde bɔnɛ wole, ata mɔgɛnu ma, ado a ara a kɔɛn kɔrɔbi wo tɔrɔ-koe la. Kɔnkɛnu si yɛrɛyɛrɛn. Minnu bi fagala, wonu furi-bolokanɛ si to belenna lu-kolenu ma iko yefe-gbalɛ. Kɔnɔ hali wo, wo ti a ma, Marita fondo-bɔɛ ni ban. A si wo tɔrɔ serr!

Aiseya 63:17

Mari, nfenna i ye a mala, ma ye yilan-yilanna ka bɔ i fɛ? Nfenna i ye a mala, ma tole ye gbɛlɛyala, ma sa i gbiliyala? I yandi, sɛgi ma ma. I halalɛ le male la minnu bi wɔlila i ye buda!

Aiseya 64:7

Mɔgɔ-wo-mɔgɔ sa min bi i batola. Hali ka ma dɛnbɛ, mɔgɔ-wo-mɔgɔ sa min si i manyinika. Ni i ya a yen, wo dama ye mala ma la bawo i wara i kan-kɔ sɔ ma la. Ma dama ara kasara ka a tɛgɛ ma hakɛnu ma.

Aiseya 8:17

Hali Mari ara a dogon ala mɔgɛnu ma, nde lanɛ ale la bawo n yigi le ale la.

Yɛrɛmaya 23:33

Mari ya a fɔ nde, Yɛrɛmaya ye ko nɛbi wo, saraka-masɔla wo, ala mɔgɛ toenu wo, ni wo do ya nde, Yɛrɛmaya manyinika ko, “Mari ya kuma-gbilimɛ nyuman fɔ?” N ni a fɔ wo tigi ye ko, “Wole ara ma kuma-gbilimɛ la Mari ye,” ado a si wo tigi fɛrɛn dugi la pose!

Yɛrɛmaya 23:39

Mari si wo bi ka wo lafili a rɔ pirr! A ya soe min di wobɛ wo benbanu ma, a ya a ban wo la.

Yɛrɛmaya 33:5

Hali wole, Isirɛla mɔgɛ donu bi Babilɔn kɛnu kɛlɛla kɔnɔ anu si wola bon-gba-kɔrɛnu nafa wo furinu na, ado Mari ko ale le ye wo gbesila dugi la ata fondo-bɔɛ la. A ko a ara a kan-kɔ sɔ soe kɛ la ka a tɛgɛ mɔgɛnuna karagbɛlɛyɛ ma.

Yɛrɛmaya 36:7

Bawo Mari ara anu tagbɛrɛn ata fondo-bɔɛ la, tumado anu si Mari madiya ka anu bɔ anu gbɛ da la.”

Yɛrɛmaya 40:2

Kɛlɛ-den-kunyɛ wo tara n na n dan na, a ko, “Wota Mari Alla ara a fɔ nun ko kasarɛ si na wola nyamanɛ kɛ ma,

Yɛrɛmaya 8:19

I wɔlɔ matɔlɔ nna mɔgɛnu di-kɛ-kan la wula-yan la. Anu bi a fɔla ko, “Ha bi, Mari sa Yerusalɛm, ba? Ha bi, Yerusalɛm mansɛ sa nyɔ, wa?” Kɔnɔ Alla ya nde, Yɛrɛmaya manyinika ni wole, ala mɔgɛ kɛnu bi bɛsɛnu kɔla min na ka a ladiminya. A ko sibolo-gbɛrɛnuna bɛsi-fufafuyi le wonu na.

Isikiyɛli 39:29

N si duwa nta mɔgɛnu ye ka n niyi labɔn Isirɛla mɔgɛnu kuma, ado n ti anu boloka wo nya tun! Nde, anu Tigi Mari le wara kɛ fɔ.”

Hoseya 10:4

Wole ye kuma-fuyinu fɔla ka foninya-lanyirinu kiri ka to wo da le fɔla kɛlɛ-makima-koe rɔ. Latelan ara a laban wo bolo ko-raduyi ma kiti-fɔ-tinɛ. Wo mani de iko mɔgɛ wa fui-fan fui, fen-gbɛrɛkɛ ma fɛrɛn nyɔ fɔ dawurɛ.

Hoseya 9:12

ado ni a taranta, den-wo-den sɔrɔnta, n si anu dama wara-koe ka-a-la. Anu do-wo-do ti to a niyi la. N ba n bole bɔ wo rɔ, ko-yogomɛnu si to mala wo la.

Maika 3:4

Kɔnɔ wo wati si na, wo si di Mari dala kɔnɔ a ti a wɔlɔ matɔlɔ wola madiyalɛnu na. A si a kolonkɛ dogon wo ma bawo wo ara ko-yogomɛnu dan-natenbi.

Yilan-Yilan Koe 14:42

Wo kana ta mumɛ! Wo ti anu nɔ hali! Mari sa wo fɛ mumɛ! Wo yogenu si wo nɔ ka wo faga.

Tɔn-Fɔɛ-Fila-Nyɔgɛ 29:20

Mari ti mɔgɔ-sufa wo to nyɔ rɔ. Wo si a ma, Mari fonde si bɔ ka sisi lugbu-lugbu! Tɔrɔyɛ min bɛɛsi sɛbɛnɛ kitabu kɛ rɔ, wonu si sigi ale mɔgɛ wo kuma ha Mari si a kasara pɔɔ!

Tɔn-Fɔɛ-Fila-Nyɔgɛ 30:18

Mari si wole fanan halaki worɔ. N bi wo makawandila ka a gbɛlɛya gben, wo ti mɛ sigini lanyiri-nyamanɛ wo rɔ mumɛ, wo ye tala sigila kan min wo wa Yorodan bɛ tɛgɛ, kɔni.

Tɔn-Fɔɛ-Fila-Nyɔgɛ 30:19

Kaka, nde nyɛrɛ fanan bi fɛrɛ dila wo ma ka wota bi duwɛ anubɛ dankɛ tɛma, simayɛ anubɛ fagalɛ tɛma. San-kole anubɛ dugu-kole si ma sereyɛ la wota bi-koe kɛ rɔ. Nde, Musa ko wo ni simayɛ bi.

Tɔn-Fɔɛ-Fila-Nyɔgɛ 31:18

N ti sɔn anu dɛnbɛna bawo anu bara ko-yogomɛ ladan ka bɛsɛnu kɔ.”

Tɔn-Fɔɛ-Fila-Nyɔgɛ 7:21

Wo ka kilan mɔgɛ kɛnu na mumɛ! Wota Mari Alla ye wo fɛ. Alla-makawanɛ le ale la. A bɛnta mɔgɛ ni kilan a la.

Kɛlɛ-Kurugbɛnu 10:6

Isirɛla mɔgɛnu ya hakɛ kɛ Mari la tun. Anu tara anuna bɛsɛnu Beyali anubɛ Asitɔra kɔ tinɛ. Wo kɔma, Siriyanuna bɛsɛnu wo, Saidon kɛnutɛ wo, Mohabu kɛnutɛ wo, Amon kɛnutɛ wo, Filisitinuna bɛsɛnu wo, anu ya wo bɛɛ kɔ. Anu ya anu kan-kɔ sɔ Mari la ka anu ban a bato-koe ma.

Kɛlɛ-Kurugbɛnu 6:13

Kidiyɔn ya a fɔ a ye ko, “Kɔnɔ n fa, ni Mari ye ma fɛ, nfen ya a to, tɔrɔyɛ kɛnu bi sigila ma la? N bi n mirila kabana-koenu ma Mari ya minnu ma iko ma benbanu bi anu takaranna ma ye nya min nun. Mari le ma na anu na ka bɔ Iyipiti nyamanɛ rɔ, wa? A manɛ iko a ara ma boloka ka ma don Midiyan kɛnu bolo.”