Kɔlɔsi 3:15 - ALLALA KUMƐ

¹⁵ Kirasiti ye yisi-kimɛ min dila mɔgɛnu ma, wo ni kun-tigiyɛ kɛ wo yisi rɔ. Alla ara wo ladɛn ka wo ma bagbu kelen na alako wo si yisi-kimɛ kɛ su lɔn nya min. Wo kana ma fisiriwɔlɛnu na.

Kɔlɔsi 3:15 ပူးပေါင်းရင်းမြစ်များ

Yaburi 100:4

Min tenbi donna Bato-Bon-kata burɔ, wo ni baraka bira a ye. Wo ni baraka bira a ye ka a matɔgɔ.

Yaburi 107:22

Fɔ anu ba baraka-bira-sarakɛnu bɔ a ye. A ara ko-nyimɛ minnu kɛ anu ye, fɔ anu ni wonu takaran bɛti-diyamɛnu tɔ.

Yaburi 116:17

N si na baraka-bira-sarakɛnu na i ye ka i madiya.

Yaburi 29:11

Mari si sɛnbɛ di ata mɔgɛnu ma. A si ata duwɛ layigi anu kuma. Anu ni yisi-kimɛ sɔrɔn.

Aiseya 26:3

Mari biranɛ minnu bolo gben, ka a ma anu yigi la, a ye yisi-kima-bɛrɛbɛrɛ dila wonu ma.

Aiseya 27:5

Ni a sɔgɛ ye ala mɔgɛnu yogenu na, a ni minnu kumafunfan, a ko anu ni yisi-kimɛ sa a rɔ. Anu ni na anu tɛmɛ rabɛn.

Aiseya 57:15

Alla-gbiliyanɛ min bi san ma pon, min sɛnima, ado a ye nyɔ habadan, wo ko ale mayiginɛ kan-tina-sɛnimɛ le tɔ san ma pon! A ko hali wo, mɔgɔ-famayiginɛ minnu bara nimisa, a si taran wonu tɛma. A ko minnu famayiginɛ, a si ni kurɛ di wonu ma. Minnu nimisanɛ, a si wonu niyi kurakuraya.

Aiseya 57:19

Min nimisanɛ, wonu si a matɔgɔ. A ko minnu fɛ-yan a la wo, minnu fɛ-wuru a la wo, a ko a si yisi-kima-bɛrɛbɛrɛ anubɛ kɛndɛyɛ di wonu ma.

Yona 2:9

Kɔnɔ nde si tantoli-bɛti bɔ ile ye. N si sarakɛ bɔ ile ye. N si nna lanyiri latɔnbagaya i ye. Ile Mari kelen pe le si ke mɔgɔ kisila.

Yɔni 14:27

“N bi yisi-kimɛ tola wo fɛ. N bi nta yisi-kimɛ min dila wo ma, n sa a dila wo ma iko duninya ye a mala nya min. Wo yisi kana tinya. Wo kana kilan.

Yɔni 16:33

N bara kɛ fɔ wo ye woletɔ wo si yisi-kimɛ sɔrɔn nde baraka rɔ. Duninya-mɔgɛnu si wo tɔrɔ kɔnɔ wo ni wo wakila! N bara anu nɔ!”

Romu 1:21

Anu ya Alla lɔn kɔnɔ anu ma a gbiliya, ado anu ma baraka bira a ye hali! Anu miriyɛ bɛɛ manɛ fufafuyi la! Anu hɛnkili rabasannɛ pirikali!

Romu 14:17

Allala mansayɛ ma dɔn-fan anubɛ minni-fan la fɔ telenbagayɛ anubɛ yisi-kimɛ anubɛ sewɛ, Allata Ni-Sɛnimɛ ye min su dila, kɔni.

Romu 15:13

Ma yigi siginɛ Alla min tɔ, alamɛ wo ya wo lafa sewɛ anubɛ yisi-kimɛ la wola dɛnkɛninyɛ fɛ. Wola yigi min bi Yisa rɔ, wo ni to warala Allata Ni-Sɛnimɛ baraka rɔ.

Romu 5:1

Ma ara telen Alla ye dɛnkɛninyɛ fɛ min kɛ, yisi-kimɛ ye mabɛ Alla tɛma ma Mari Yisa, Allata-Mɔgɔ-Yabɔnɛ baraka rɔ.

1 Kɔrɛnti 10:17

Hali ma siyayanɛ, ma bɛɛ ara ma bagbu kelen na bawo ma damasi ara biredi-gbu kelen dɔn.

1 Kɔrɛnti 7:15

Ile dɛnkɛninya-musi, tumado, ila misali-nyimɛ si a ma, ila kei ni dɛnkɛninya. Ile dɛnkɛninya-kei, tumado, ila misali-nyimɛ si a ma, ila musi ni dɛnkɛninya. Hali wo, ni a sɔgɛ ya dɛnkɛninyabɛlɛ bira ka dɛnkɛninya-mɔgɛ wo boloka, nba, tana ma. Dɛnkɛninya-mɔgɛ, a keima wo, a musuma wo, anu filɛ fenfen kirini ma bawo Alla ya wo kele yisi-kimɛ le ma.

2 Kɔrɛnti 4:15

Wo dama ye kɛla ka a tɛgɛ wole ma. Nba, Allata hinɛ min bi kela mɔgɔ siyaman ma nya min, anu siyaman si baraka bira Allata gbiliyɛla ko la wo nya na le.

2 Kɔrɛnti 9:11

A si wo ma fen-tiginu na alako wo ni to mɔgɛnu kɔla wati bɛɛ. Ma wa wola kɔ-fannu natenbi anu ma, wo si a ma, mɔgɔ siyaman ni baraka bira Alla ye wola kɔ-fan wonuna ko la.

Ɛfɛsa 4:16

Ma bagbuyi bɛɛ latugunnɛ anu nyɔgɔn na iko a bɛnta, a ni ma nya min ale bolo. A sɔlɔmɔnya kelen-kelennamɛ-bɛɛ ye wɔlila iko a bɛnnɛ a ni wɔli nya min. Woletɔ a ye koloyala le ka a nyɛrɛ lasabati keninteyɛ rɔ.

Ɛfɛsa 4:4

Bagbu kelen de ma dama la, ado ata Ni-Sɛnimɛ kelen de ma bolo. Alla ara ma kele yigi kelen de ma.

Ɛfɛsa 5:1

Woletɔ wo ni wo raya ka Alla sɔn bi bawo a diyana-dan le wole la.

Ɛfɛsa 5:20

Wo ni baraka bira ma Fa Alla ye fan bɛɛla ko la tumɛ bɛɛ. Wo ni baraka bira a ye ma Mari Yisa, Allata-Mɔgɔ-Yabɔnɛ tɔgɛ rɔ.

Kɔlɔsi 1:12

ye baraka birala n Fa Alla ye sewɛ rɔ. A ara ko-rabɛn-kɛ ko wo ni wotɛ sɔrɔn min maranɛ ala mɔgɛnu ye, ado wo siginɛ ata mansaya-waan kɔrɔ.

Kɔlɔsi 2:7

Wo ni wo suli layigi ale rɔ pon, iko kɔlɔma ye suli layigila dugi la nya min! Wo si a ma, wo si sɛnbɛ sɔrɔn ale rɔ. Wo sɛnbɛ ni don wola dɛnkɛninyɛ rɔ iko wo karanta nya min. Ka a tɛgɛ a ara min ma wo ye, wo ni to baraka birala a ye dɛɛ!

Kɔlɔsi 3:17

Wo ye koe min bɛɛ kɛla anubɛ wo ye koe min bɛɛ fɔla, wo ni wo bɛɛ kɛ Mari Yisa tɔgɛ rɔ. Wo ni baraka bira ma Fa Alla ye Mari Yisa baraka rɔ.

1 Tɛsalonaika 5:18

Ni ko-wo-ko mara, wo ni baraka bira Alla ye wati bɛɛ, ado Alla ye nyinina wo le ma. Wo ni to wo mala Kirasiti Yisa rɔ.

1 Timoti 2:1

A fɔlɔtɛ, n bi wo madiyala alako wo ni Alla madiya mɔgɛ bɛɛ ye katarala mansɛnu anubɛ kun-tiginu ma. Wo ni to tarali kɛla ko Alla ni anu dɛnbɛ alako ma ni to sabarɛ anubɛ yisi-kimɛ rɔ anu bolo. Ma ni to Alla gbiliyala ka ma hadama-den-nyɔgɛnu bira a kilɛ fɛ.

1 Timoti 6:12

I ni i se-koe-bɛɛ kɛ ka ta yarɔ dɛnkɛninya-koe rɔ, woletɔ i si habadan-nimayɛ bira i bolo filɛ la i nyɛrɛ ye. Alla ya i kele niyi wo le ma, wo tumɛ i ya sereya-nyimɛ yira dɛnkɛninya-koe rɔ sereya-siyaman yala.

Hiburunu 13:15

Nba, ma ye Alla matɔgɔla tuma-wo-tuma min kɛ, ma wa sɔn ata Mariyɛ ma tumɛ min, wo ye sarakayɛ le la Alla ye Yisa baraka rɔ.

Lankɛnimayɛ 7:12

Anu ko, “Amina! Tantolɛ wo, gbiliyɛ wo, hɛnkili wo, baraka-birɛ wo, bonyɛ wo, sɛnbɛ wo, anubɛ fanka-wɛ le mata Allatɛ la habadan! Amina!”