Emɔsi 7:17 - ALLALA KUMƐ

¹⁷ Nba, ile Saraka-Masɔla-Kun-Tigi-Wɛ Hamasa, i ni i tole masɔ Mari ye nala min fɔla i wara-koe rɔ. Mari ko ila musi si ma yɛlan la ka to yilan-yilanna keinu kuma. Ila dannu si to kɛlɛ rɔ. Wo yogenu si na wola nyamanɛ kɛ bi wo bolo ka a tala anu nyɔgɔn na. Anu si ta Isirɛla mɔgɛnu na ka anu ma yɔɔnnu na nyamani-gbɛrɛ rɔ. Ile Hamasa nyɛrɛ-nyɛrɛ si faga nyamani-gbɛrɛ rɔ.”

Emɔsi 7:17 ပူးပေါင်းရင်းမြစ်များ

2 Mansɛnu 17:6

Kɔnɔ Hoseyala mansayɛ san kɔnɔntɔ nyɔgɛ ma, Asiriya mansɛ wo ya Isirɛla mɔgɛnu nɔ ka ta anu na birɛ rɔ. A ke anu na, a ya anu tatala. A ya donu nata Hela sigisɔn rɔ. A tara donu na Koson sigisɔn rɔ min bi Hebɔ bɛ dafɛ. A tara donu na Midinuna soenu tɔ.

Yaburi 78:55

Iko ala mɔgɛnu bi tala nya min, a tora nyɔ-sigila-kɔrɛnu gbenna wo nya na le. A ya nyamanɛ ratala Isirɛla bɔnsɔnnu na. A ya anu yogenuna bɔnnu natenbi anu ma.

Aiseya 13:16

Mari ko anu si to anuna dannu tapɔsikɛnna anu ya la. Anu si anu wasakara maka anuna bɔnnu na. Anu si digin anuna musinu ma anu ya la.

Aiseya 22:18

A si i lamondo ka i lakɛ-a-rɔ nyamani-wɛ do rɔ iko bɔli. I yɛ bɔnɛ kirindi min bɛɛ la, i si faga wonu dafɛ. I wara yarabiyi ladon i tigi warɛ bɔn la.

Yɛrɛmaya 14:16

A ko nɛbi wonu bi kumala minnu ye, wonu furinu na si kɛ a rɔ Yerusalɛm kila-kunyɛnu na. Anu tɔgɔ si to kɔnkɛ anubɛ anu yogenuna faan la. Anuna musu wo, anuna den wo, anu togonna-wo-togonna ti taran. A ko a si anu tɔrɔ feu, iko a bɛnta, anu ni tɔrɔ nya min.

Yɛrɛmaya 20:6

A ko wo yogenu si ta ale Pasura, anubɛ ala bonna-mɔgɛnu na anu bolo fɔɔ Babilɔn. Anu si anu bira fɔrɔsɛ la ka ta anu natoron-toronna. Anu bi anu togonna nyɔ le. Ale Pasura ya wɔlɔyiya-foninya-kumɛ fɔ a diyana-mɔgɛ minnu ye, wonu dama fanan si faga nyɔ ka togon nyɔ.

Yɛrɛmaya 28:12

A ma mɛ wo kɔma, Mari ya a fɔ nde, Yɛrɛmaya ye ko

Yɛrɛmaya 28:16

Woletɔ Mari ko a ti mɛ tun, a si i firan duninya ma. A ko bawo i wara a ma, mɔgɛnu bara anu kan-kɔ sɔ Mari la min kɛ, i si faga nyina san kɛ la.”

Yɛrɛmaya 29:21

Mari Sɛnbɛ-Bɛɛ-Tigi, Isirɛlata Alla, kɔni, wo kumara mɔgɔ fila wara-koe rɔ, Kolayala den Ehabu anubɛ Meyaseyala den Sɛdɛkaya. A ko mɔgɔ filɛ kɛnu bara nɛbiya-kumɛnu fɔ wo ye foninyɛ rɔ. Anu bi a fɔla ko Mari le ya sarakanɛ wonu di anu ma. Mari ko a si foninya-nɛbi filɛ kɛnu don Babilɔn Mansa Nɛbukanasa bolo. Ale mansɛ si anu faga wo dama yala.

Nimisa Koe 5:11

Anu diginta mala musinu ma hali Yerusalɛm kɔnkɔ-sɛnimɛ kuma. Anu diginta mala sunkurun-nasɔlɔnɛnu ma Yuda nyamanɛ soe bɛɛ rɔ.

Isikiyɛli 4:13

Tamasere le kɛ la ko Isirɛla mɔgɛnu tenbi biralɛ rɔ nyamani-gbɛrɛnu tɔ, anu bi dɔn-fen-kɔsɔnɛnu dɔnna ka le.”

Hoseya 9:3

Wole Isirɛla mɔgɛnu ti to sigini Marita dugi kɛ rɔ tun fɔ anu ni ta wo la yɔɔnyɛ rɔ iko wo taranta Iyipiti rɔ nya min nun. Anu si ta wo la Asiriya nyamanɛ rɔ. Wo si to fan dɔnna nyɔ minnu ma sɛninya iko tɔn ya a fɔ nya min.

Emɔsi 6:7

Wole mɔgɔ-yogomɛnu, wole fɔlɔn si don yɔɔnyɛ rɔ wo yogenu bolo. Wola saramayɛ anubɛ wola nyɛrɛ-ladiyɛ damasi si ban.

Emɔsi 7:11

A ye belenna a fɔla ko ile mansɛ ye tola kɛlɛ rɔ. A ye a fɔla fanan ko kɛlɛ si Isirɛla mɔgɛnu bira ka anu ma yɔɔnnu na.”

Emɔsi 8:1

Allatala ya ko-rayirɛ min yira n na, wo le kɛ la. N ya sende-lafanɛ yen kɔn-gbɔ-mɔɛ la.

Emɔsi 9:1

N ya Mari yen, a ya a lakɔɛnma saraka-bɔ-tinɛ dafɛ. A ko, “I ni Bato-Bɔn sɛnbɛrɛn-kɔn-kumɛnu gbesi alako dandan-kɔrɛ ra ni maga. Anu kumɛ ni bui mɔgɛnu kunyɛ ma.” A ko a mɔgɛ toe si faga kɛlɛ rɔ. Mɔgɔ-wo-mɔgɔ ti ke a burila. Bɛɛ si faga tɛrr!

Emɔsi 9:8

A ko a kolan ye wole, hakɛ-tiginu na tolon! A si wo firan dugu-kole kɛ kuma. Kɔnɔ a ko a ti Yakoba kegeyɛ bɛɛ lato de!

Maika 1:16

“Wole Yerusalɛm so-burɔ-mɔgɛnu, wo ni wo kunyɛ gbana di-kɛ-tinɛ iko dogɛ ka a tɛgɛ wola dannuna ko ma, kɛlɛ ye tala minnu na.”

Sakaraya 14:2

Mari ko a si sibole bɛɛ kundɛn kan-tina-kelen ka Yerusalɛm kɛlɛ. Anu si wola soe bi wo bolo ka wola bɔnnu nakolonya ka digin wola musinu ma. Kɛlɛ si ta nyama tɔnkɔn la. A toenu si to wola so-tinyanɛ burɔ nyɔ.