Aiseya 58:12 - ALLALA KUMƐ

¹² Wola soe minnu kasaranɛ kɛ la, a ko wola mɔgɛnu si wonu sɔ tun a kurɛ la. Wola soe minnu bara ma tonbɔn la nun, wo si wonu kurukɛ tun. Wo ye tarɛ labɛtɛrɛ min kɛla kɛ la, wo mankan wo si ta wuu! Bɛɛ si wo lɔn bon-nadannɛ anubɛ kila-ladannɛ la.

Aiseya 58:12 ပူးပေါင်းရင်းမြစ်များ

Nihɛmaya 2:17

Wo banda kɛ, n ya a fɔ anu ye ko, “Wo ara a yen, ma ye kɔndɔfili-su min tɔ bawo Yerusalɛm soe anubɛ a tarɛ-don-dɛnu mintannɛ. Ma ni mala soe tarɛ sɔ-kura-kɛ tun alako wo miliyɛ ni bɔ ma kuma.”

Nihɛmaya 2:5

N ban wo la, n ya a fɔ mansɛ ye ko, “Ni n bara-koe ara i hɛnɛ, ado ni i si sɔn, i kɔɛn bɔ n tɔ, n ni ta n benba togon tinɛ Yuda nyamanɛ rɔ alako n ni nyɔ sɔ a kurɛ la tun.”

Nihɛmaya 6:1

Sanbalati wo, Tobaya wo, Kesɛm wo, anubɛ ma yogo-toenu ya a lamɔɛn ko tarɛ la ara bila a nyɔgɔn ma, ado a la ara ban, fɔ a don-dɛ minnu na ma ban togonna wɛ.

Yobu 3:14

Ni n fagara le nun, n si taran n fanbolo mansɛ anubɛ mɔgɔ-banu fɛ lakira minnu ya bon-hakikɛnu sɔ duninya rɔ nun. Ado nfan, anuna mansaya-bɔn wonu bara tenbi, bi ma!

Aiseya 30:13

A ko a ara wo yiliki. A ko wo manɛ iko dandan min tafaranɛ. A ti mɛ lefan, wo ara bui.

Aiseya 44:28

A ko a si a fɔ Babilɔn Mansa Sairasi ye ko a ni ma mansɛ la ale ye, wo ni a sako bɛɛ kɛ. A ko Yerusalɛm soe ni sɔ a kurɛ la tun. A ko fanan, Bato-Bɔn kuru ni kɛ tun.

Aiseya 49:8

Mari ara a fɔ ala mɔgɛnu ye ko anu kisi-wati wa ke tumɛ min, a si ala duwɛ layigi anu kuma. A si anu dɛnbɛ iko anu ya a rakele nya min. A ko a si anu kandan ka anu natanka. Wo si ma sarama-kan misalɛ la Yerusalɛm kɛnu anubɛ mɔgɛ bɛɛ tɛma. A ko a si a ma, anu ni anu sigi nyamani-tinyani-kɔrɛ wo rɔ tun.

Aiseya 51:3

Mari ko a si kinikini Yerusalɛm soe ma, min bi tonbonyɛ la nun, kɔni. Hali ala dugi mara kɛnkɛn-dugi la, a ko a si nyɔ ma dugu-lamonɛ la a ye. Sewɛ anubɛ kɔntɔdiyɛ si taran nyɔ kati! Mɔgɛnu si baraka-bira-siginu sa ka a tanto tolon!

Aiseya 52:9

Ile Yerusalɛm so-makeri-kerinɛ, i ni a lasɔnkɔ sewɛ bolo. Mari si Yerusalɛm kunyɛ bɔ gbaran rɔ, a nyɛrɛta soe, kɔni ka ala mɔgɛnu to lafɛrɛ rɔ.

Aiseya 61:4

Wo si soenu sɔ tun minnu bara kasara nun kɔrɔma la. Wo si tonbon-kɔrɛnu sɔ tun a kurɛ la.

Yɛrɛmaya 31:38

Mari ko wati ye nala, ka a bi Hananɛli kan-tina-layan-bɛ ma ka ta ke don-dɛ ma min tɔgɛ “Tonke,” nyɔ mumɛ bɛɛ si sɔ tun ka ma ale Marita so-kunbɛ la, Yerusalɛm soe, kɔni.

Isikiyɛli 13:5

Iko fira-wuli wonu, anuna foninya-wɔlɔyiya-kuma-fɔlɛnu sa tara-kerinɛ kandanna. Ni anu sa tarɛ wo sɔla tun alako nde, Mari si anu yogenu natugu anu kan ma tele min ma, soe wo ti kanan.

Isikiyɛli 36:33

“Nde, anu Tigi Mari ko n ba ban anu sɛninyala ka anu bɔ anu hakɛ rɔ, n si sɔn worɔ ko anu ni sigi anuna soenu tɔ tun ka anuna tonbɔnnu sɔ a kurɛ la tun.

Isikiyɛli 36:4

Kɔnkɛnu anubɛ gburukulinu wo, folenu anubɛ lɛɛnu wo, kan-tina-tinyanɛnu wo, tonbɔn minnu nafɛyanɛ sibolo-gbɛrɛnu bolo wo, anu ni anu tole masɔ nde, anu Tigi Mari ye nala min fɔla anu ye.

Daniyɛli 9:25

I tole masɔ bɛrɛkɛ! Ka a bi anu ya Yerusalɛm sɔ-koe fɔ a kurɛ la tumɛ min ha Allata-Mɔgɔ-Yabɔnɛ ni na, fɔ san wɔrɔnfila sigi tina wɔrɔnfila (49) wa tenbi. Anu si soe wo tarɛ kɔmɛ lafoo denka-rayan-bɛ la ka so-burɔ-luyinu tabɛn a kilɛ fɛ. A si san bi-wɔrɔ san fila sigi tina wɔrɔnfila (434) bɔ, soe wo sɔnɛ si to. Kɔnɔ wati wo bɛɛ si ma anu bolo tɔrɔyɛ la.

Emɔsi 9:11

Mari ko tele wo ye nala, Mansa Dawudata bɔn min manɛ tonbɔn la, a si wo sɔ a kurɛ la. A si ala dandannu sɔ tun ka wo bɛɛ rabɛn iko a ye nya min fɔlɔ nun.

Emɔsi 9:14

Mari ko a si ala mɔgɛnu nasɛgi anu halala-dugi ma. Anu si anuna so-tinyanɛ sɔ tun ka anu sigi nyɔ. Anu si kɔlɔmanu ki ka anu gbɔɛ dɔn. Anu si ki-fannu ki ka wo fanan dɔn.

Maika 7:11

Wo wati wa ke, wole Yerusalɛm kɛnu, wo si wola so-tarɛ sɔ a gbɛ rɔ tun. Nyamanɛ do si sa wola nyamanɛ kuma ka koloya.