Aiseya 57:11 - ALLALA KUMƐ

¹¹ Mari ko wo ye kilanna bɛsɛ nyamintan na min bi a mala, wo ye foninyɛ fɔla a ye? A ko wo ma wo miri a ma doni bɛrɛn fɔ wo ya wo kan-kɔ-sɔɛ min kɛ a la. A ko a madenɛ ara mɛ min kɛ, woletɔ wo sa kilanna a la tun, ba?

Aiseya 57:11 ပူးပေါင်းရင်းမြစ်များ

Yaburi 50:21

Wo ara kɛ damasi ma nun kɔnɔ n ma fenfen fɔ. Wole mirinɛ ko nde le iko wole. Kɔnɔ kaka, n bi nala bɔla gbɛ rɔ wo ye ka wo makuma.

Yaburi 78:36

Kɔnɔ anuna kumɛ bɛɛsi foninya. Fenfen sa anu da rɔ fɔ kuma-teleka-teleka-fɔɛ.

Hɛnkilimaya-Kumɛnu 29:25

Mɔgɛ min bi kilanna mɔgɛ dɔrɔn na, wo si ma gbɛrɛ la a ye kɔnɔ ni a lara Mari la, wo si a latanka.

Makawandili Kumɛnu 8:11

Mɔgɛnu bi tola karagbɛlɛyɛ kɛla bawo anu sa anuna tɔrɔyɛ sɔrɔnna yona.

Aiseya 26:10

Hali i ye ko-nyimɛ kɛla karagbɛlɛnu ye, anu ti anu degen ko-telenni-kɛ ma. Hali mɔgɔ-telennɛnu taranta nyamanɛ kɛ rɔ, anu bi karagbɛlɛyɛ kɛla. Anu ma ila kabana-koe lɔn fenfen na.

Aiseya 30:9

Foninya-fɔɛ wo, murutiyɛ wo, ka anu ban Marita kuma-birɛ ma wo, anu bi wonu kun na le tolon!

Aiseya 42:14

Alla ko bi ko ma, a radeni de! A ma fenfen fɔ. A biranɛ-a-rɔ. Kɔnɔ ala ko-ladan-tumɛ ara ke! A ye worondola iko nyaganɛ buyi wa a lamaga.

Aiseya 44:20

Hɛnkilimaya-sufa kɛ mani de iko mɔgɛ tenbi ta-gbangban muganna. Ala kun-takolon-miriya wo mani de iko mɔgɛ tenbi donna gbofɛ la. Dɛnbɛni-wo-dɛnbɛni sa a bolo tun. A ti ke a fɔla ko bɛsɛ min bi a bolo kɛ la, Alla ma.

Aiseya 47:7

Ile Babilɔn miri ko i ye tola musu-mansayɛ le la tolon, ado i miri ma ke ko su kɛnu ma nun. I miri ma ke ko a si a laban i bolo ka.

Yɛrɛmaya 2:32

Sunkurɔn ti nyina a makiri-fan ko. Kɔɛn-kurɛ ti nyina ala kɔnyɔ-masɔ-kurɛnu ko. Kɔnɔ Mari ko ata mɔgɛnu nyinara a ko bi-ko-ma,

Yɛrɛmaya 3:21

Mɔgɛnu si wo di-kɛ-kan lamɔɛn kɔnkɛnu kun tɛma. Wole Isirɛla mɔgɛnu bi wo dɛ sala-a-rɔ madiyali-kɛ-tinɛ. Wo sɔn ara yogoya ka a dan-natenbi. Wo ara nyina wota Mari Alla ko.

Yɛrɛmaya 38:19

Kɔnɔ mansɛ ya a fɔ n ye ko a ye kilanna ala nyamanita-mɔgɛnu denu na minnu bara kofu Babilɔn kɛnu ma. A ko Babilɔn kɛnu si a don ala mɔgɛ wonu bolo. Wonu si a bira boloko-yogomɛ-kɛ.

Yɛrɛmaya 42:20

wo ara wo nyɛrɛ baya min si a ma, wo kunyɛ si to-a-rɔ. Wo ya n manyinika ko n ni mata Mari Alla madiya wo ye, ado wo ko a miriya ye ko-wo-ko ma, wo ye wonu denu kɛla.

Isikiyɛli 13:22

“Anu bi mɔgɔ-telennɛnu yisi tɔntɔnna a rɔ anuna foninya-kumɛnu na, ado a ma di n ye, mɔgɔ-telennɛ kɛnu yisi ma ni gboya. Anu bi mɔgɛnu manugu-nɛgɛla alako wonu kana na bɔ anu sɔn-yogomɛnu da kɔrɔ bawo ni wonu bɔra anu sɔn-yogomɛ da kɔrɔ, anu si kisi.

Hoseya 11:12

Mari ko, “Wole Isirɛla mɔgɛnu bara n nafoo foninyɛ anubɛ yanfanteyɛ la. Ha bi, Yuda mɔgɛnu murutiyanɛ nde, Alla-sɛninyanɛ ma, lanaya-tigi, kɔni.

Matiyu 25:25

N kilanta, woletɔ n tara ka ila sɛnɛ dogon dugi rɔ. Wo le kɛ la! Itɛ le. A bira.’

Kɛwɔlɛnu 5:3

Pita ya a fɔ a ye ko, “Ananayasi, nfenna i wara sɔn ko Setanɛ ni don i yisi rɔ? I ya ila dugi feri min nyɔgɔn na, i ya do bɔ wodi wo la ka a lamara i nyɛrɛ ye, ado i ye foninyɛ le fɔ tinɛ Allala Ni-Sɛnimɛ ye wo la.

2 Tɛsalonaika 2:9

“Kirasiti-yogo-finma-wɛ” wo si na Setanɛta sɛnbɛ rɔ ka foninya-tamaserenu anubɛ foninya-kabana-ko-su-bɛɛ kɛ.

1 Timoti 4:2

Yanfantenu si foninya-karan wo nyɛnsɛn. Anu sɔndɔmɛ faganɛ iko fɛrɛ min bara mintan kɔrɔma la nɛgɛ-kalamɛ bolo. Woletɔ anu ti ko-nyimɛ anubɛ ko-yogomɛ dan-nafarɛ lɔn.

Lankɛnimayɛ 21:8

Kɔnɔ a kilandɔgɔ wo, a lanayabɛlɛ wo, a haramu-ko-kɛla wo, a mɔgɔ-fagala wo, a yɛlan wo, minnu bi duriyɛ kɛla wo, minnu bi bɛsɛnu kɔla wo, anubɛ foninya-fɔlɛ bɛɛ, wonu barɛ le ta-dalɛ wo la. Dalɛ wo ye mintanna tɛ anubɛ munku-gbɛ le la. Sayɛ fila nyɔgɛ le wo la.”

Lankɛnimayɛ 22:15

Kɔnɔ haramu-ko-kɛla bɛɛ, a duru wo, a yɛlɛn wo, a mɔgɔ-fagala wo, a bɛsi-kɔla wo, minnu bara foninya-fɔɛ keni wo, wonu bi soe kɔma.