Aiseya 55:6 - ALLALA KUMƐ

⁶ Mari-nyini-tumɛ le kɛ la yanni tele ni ta wo ma, ado a rakele-tumɛ le kɛ la bawo a gbɛrɛnnɛ wo ma.

Aiseya 55:6 ပူးပေါင်းရင်းမြစ်များ

1 Ko-Kɔrɔta-Karan 28:9

A ya a tintan ala den Silamɛni na ka a fɔ a ye ko, “Nna den, i ni nta Alla wara-koe lɔn ka ata wɔlɛ kɛ i yisi bɛɛ la. Alla ya ma miriya anubɛ mala natanu lɔn. Ni i ya i gbɛrɛn a ma, a si i rabira. Kɔnɔ ni i ya i kan-kɔ sɔ a la, a si a ban i la feufeu!

2 Ko-Kɔrɔta-Karan 19:3

Kɔnɔ hali wo, ko-nyimɛ donu bi i bolo ma bawo mɔgɛnu bi Asura bɛsɛ minnu kɔla nun, i wara wonu tinya. I wara i karan ka Mari sako kɛ.”

Ɛsira 10:2

Wo kɔma, Yehiyɛlila den Sɛkanaya min bɔra Ilam kebilɛ rɔ, wo ya a fɔ nde, Ɛsira ye ko, “Lanayɛ min bi male Isirɛla mɔgɛnubɛ Alla tɛma, ma ara wo tinya bawo furu-nyɔgɔnyɛ ara don mabɛ sibolo-gbɛrɛnu tɛma. Kɔnɔ hali wo, fɛrɛ ye ma bolo fɔlɔn.

Yobu 8:5

Nba, min fisa, i ya-lamunun Alla Sɛnbɛ-Bɛɛ-Tigi la. I ni a madiya.

Yaburi 14:2

Mari si a kolan layigi hadama-dan ma ka a lɔn ni hɛnkilimɛ ye anu tɛma min bi ale Mari nyinina.

Yaburi 145:18

Minnu bi a rakelela, a gbɛrɛnnɛ wonu denu ma, minnu bi a rakelela tonyɛ la, kɔni.

Yaburi 148:14

A ara ata mɔgɛnu tagbɛlɛya gbon! Woletɔ anu bi a tantola, ado ala Isirɛla mɔgɛnu di a ye kati! Bɛɛ ni Mari tanto!

Yaburi 27:8

Mari, i ya a fɔ n ma wati min ko n ni i bato, n ma n kun tadu. N nara le.

Yaburi 32:6

Ila mɔgɔ-sɛnimɛnu si ke tubila wati min, anu si i madiya wati wo le tɔ. Woletɔ tɔrɔya-belebele wa na, a ti anu masɔrɔn.

Yaburi 34:19

Mɔgɔ-nyimɛ si tɔrɔya-siyamɛ sɔrɔn kɔnɔ hali wo, Mari si a kisi tɔrɔyɛ wo bɛɛsi ma.

Yaburi 75:1

Mata Alla, ma si baraka bira i ye bui! I makawanɛ ye nya min, a di ma ye ka wo fɔ. I wara kabana-koe minnu kɛ, ma si wonu fanan takaran mɔgɛnu ye.

Yaburi 95:7

Ale le mata Alla la. Wo mɔgɛ le ma la minnu fɛ-biranɛ a bolo. Ala sagɛ le male la a ye minnu de-nyinina. Wo ni wo tole masɔ a kan la bi.

Hɛnkilimaya-Kumɛnu 8:17

Ni min ya n keni, wo tigi si diya n ye. Ni min ya n nyini, wo tigi si n yen.

Aiseya 12:6

Wole minnu siginɛ Yerusalɛm, wo ni wo kan mayɛlɛ bɛti bɔ tinɛ. Isirɛlata Alla makawara. A ye a mayigila ata mɔgɛnu tɛma.”

Aiseya 26:9

A la wa fin, i sɔgɛ si n tabɔ dɔgɔma-ma-de! Banda wa ka, a ni ma iko ma ni taran ma nyɔgɔn fɛ. Ni ile ya duninya-mɔgɛ bɛɛ kiti, anu si a lɔn telenbagayɛ ye nya min.

Aiseya 45:19

A ko a sa kumala dogɔn rɔ. A ma ala ko-ladan-nya to pinpi rɔ. A ko a ma a fɔ male Isirɛla mɔgɛnu ye ko ma ni a nyini kan-tina-rakolɔn tɔ. A ko Mari le ale la min si tonyɛ fɔ ma ye. A ye ko-telennɛnu sala gbɛ ma ma ye.

Aiseya 45:22

A ko wole duninyarɔ-mɔgɛnu, wo ni wo ya-lamunun a la, a ni wo kisi. A ko ale kelen pe le ye Allayɛ la.

Aiseya 46:13

A ko a ti mɛ tun a si ko-telennɛ labɔ gbɛ ma. A ti mɛ tun a si Yerusalɛm nakanan alako Isirɛla mɔgɛnu ni gbiliyɛ sɔrɔn nyɔ.

Aiseya 49:8

Mari ara a fɔ ala mɔgɛnu ye ko anu kisi-wati wa ke tumɛ min, a si ala duwɛ layigi anu kuma. A si anu dɛnbɛ iko anu ya a rakele nya min. A ko a si anu kandan ka anu natanka. Wo si ma sarama-kan misalɛ la Yerusalɛm kɛnu anubɛ mɔgɛ bɛɛ tɛma. A ko a si a ma, anu ni anu sigi nyamani-tinyani-kɔrɛ wo rɔ tun.

Aiseya 58:9

Ni wo ya Mari rakele wo wati rɔ, a si wo denkun. Ni wo dira ale Mari dala, a si a fɔ ko, “N bi yan.” Wo ni wo fara dunɛ sala wo ta-nyɔgɛnu kuma. Wo ni wo fara mɔgɔ-rafɔɛ anubɛ mɔgɔ-rakaran la.

Aiseya 65:10

Wo kɔma, a ko Sarɔn lɛɛ si ma sagɛnu de-nyini tinɛ la. Ekan lɛɛ si ma ninkinu daga makɛ tinɛ la. Mɔgɛ minnu bi bilala ale Mari fɛ, ninki wonu si ma wonu halalɛ la.

Aiseya 65:24

Yanni anu ni anu miri min ma, Mari ara wo di anu ma. Anu tenbi ale Mari manyinikala anu dɛnbɛn-koe rɔ, yaga, wo ye anu dɛnban kun na.

Yɛrɛmaya 25:5

Anu ko wo ni fara wola ko-yogomɛnu na. Wo ni tɔn sigi wola karagbɛlɛyɛnu na alako wo siginɛ ni to wo halala-nyamanɛ rɔ Mari ya min di wobɛ wo benbanu ma.

Yɛrɛmaya 33:3

ni n ya a rakele, a si n denkun. A si kabana-koe donu takaran n ye, n ma min lɔn kɔrɔma la.

Isikiyɛli 14:6

“Woletɔ nde, wo Tigi Mari ye min fɔla i ye, i ni wo latenbi Isirɛla mɔgɛ wonu ma. Anu ni anu nyɛrɛ yiliki ka anu kan-kɔ sɔ anuna kisimiriya-bɛsɛnu na ka sɛgi n ma.

Isikiyɛli 33:11

A fɔ anu ye ko nde, anu Tigi Mari min bi n niyi la, n bara n keli n nyɛrɛ rɔ ko n ti sewa hakɛ-tigila fagɛ la. Yanni wo ni ma, a ni fara ala hakɛ-kɛ la ka to a niyi la. Wole Isirɛla mɔgɛnu, wo ni wo fara ko-yogomɛnu na wo ye minnu da kun tɔ. Nfenna fagali-sɔgɛ ye wo la?

Isikiyɛli 8:6

Alla ya a fɔ n ye ko, “Ile hadama-dan, i wara a yen min bi mala? I wara a yen Isirɛla bɔnsɔn-mɔgɛnu bi ko-kɔsɔni-sufa min nadanna? Ko-sufa kɛnu denu bi a mala, n ni n bɔ nta kan-tina-sɛnimɛ kɛ rɔ feufeu! Nba, i si ko-yogomɛ yen anu bolo kɛ rɔ min tenbira kɛ la.”

Daniyɛli 4:27

“Ale Daniyɛli ya a fɔ n ye tun ko n ni aleta kawandili-kan bira. A ko n ni fara ko-yogoma-kɛ la. N ni ko-nyimɛ-kɛ dabira. A ko n ni kinikini bolo-kolɔnnu ma. Wo kɔma, a ko tumado, n si taran n diya.

Hoseya 10:12

Wo ni dugu-kurɛ rasin wo nyɛrɛ ye ka telenbagayɛ ki a rɔ. Tɔ-a-la, wo si duwɛ tɛgɛ a rɔ iko wo ye tɔnɛ min sɔrɔnna wo nyɛrɛ latenbi rɔ nde, Mari ma. Wo ya-lamunun-wati ara ke nde, wota Mari la. Wo kɔma, n ni to nna duwɛ labɔnna wo ma.

Emɔsi 5:6

Yanni wo ni wo damasi ma, wo ni wo gbɛrɛn Mari ma. A si wo kisi. Ni wo ma sɛgi Mari ma, a si yigi wo kuma iko tɛ. Tɛ wo si Bɛtɛli mintan. Mɔgɔ-wo-mɔgɔ ti ke tɛ wo ladufenna.

Yona 3:8

Mɔgɛ bɛɛsi ni kasa-kurɛ kɛ a kan ma ka donu kiri anuna kolo-fannu na. Mɔgɛ bɛɛ ni anu sɔn-yogomɛnu boloka ka fara ko-yogomɛnu na. Ma ni Alla matara sɛnbɛ la.

Matiyu 5:25

“Ni i bilara mɔgɛ do la, yanni a ni ta i lakiti, i ni a madiya. Ni i ma wo ma, a si ta i la ka i don kiti-tɛgɛlɛnu bolo. Wonu si i don i maralɛnu bolo. Wonu fanan si i sa yele la.

Luka 13:25

Bon-tigi wa a lasɔ ka dɛ rasɔgɔ, wo sɔnɛ si to kɔma dɛ matugula ka a fɔ ko, ‘N fa, dɛ laka ma ye!’ Kɔnɔ a si wo yabi ko, ‘N ma wole lɔn. N ma wo bɔ tinɛ lɔn!’

Yɔni 8:21

Yisa ya a fɔ Farisinu ye tun ko, “N ba ta, wo si n nyini kɔnɔ wole si faga wola hakɛnu tɔ. N bi tala kan min, wo ti ke tala nyɔ.”

Ɛfɛsa 3:13

Woletɔ n bi wo madiyala ko n bi tɔrɔyɛ min kɛla wola ko la, wo kana a ma, wo yisi ni tinya bawo wota tɔnɛ le tɔrɔyɛ wo bɛɛ la.

Tɔn-Fɔɛ-Fila-Nyɔgɛ 4:29

Wo wati rɔ, ni wo tora wo yɛ lakalanna wota Mari Alla ma ka a nyini wo yisi bɛɛ la, wo si a yen yati!

Tɔn-Fɔɛ-Fila-Nyɔgɛ 4:7

Musa ya a fɔ kɛ kɔma tun ko, “Hali sibolo-gbɛrɛkɛ-mɔgɛnu siya ka tenbi ma la, anuta bɛsɛnu sa anu dɛnbɛna iko mata Mari Alla ye ma fɛ nya min ka ma dɛnbɛ ni ma ya a tɔgɛ rakele wati min.

Hiburunu 2:3

Min tenbira wo la, ma Mari Yisa nyɛrɛ fɔlɔn ya kisi-koe min nabɔ gbɛ rɔ ma ye, ni ma ma ma tole masɔ kisi-ko-wɛ wo la, ma kunyɛ si bɔ a rɔ kama? Minnu ya a lamɔɛn, wonu ya a yira ma la ko tonyɛ le.

Hiburunu 3:13

Fananta ma ye a fɔla bi ma ko, “Bi,” wo ni to wo nyɔgɔn dɛnbɛna tele-wo-tele alako wo fenfen kana yanfa hakɛ bolo. Wo kana ma sɔndɔma-gbɛlɛ-tiginu na.