Aiseya 52:2 - ALLALA KUMƐ

² I lasɔ gbangban rɔ ka i nyɛrɛ magbɔngbɔn. Ile so-birani-kɔrɛ, i lawuli. I mayigi ila mansaya-waganɛ rɔ. I kirinɛ yɔlɔkɛ min na nun, i ni wonu tatɛgɛ i ma.

Aiseya 52:2 ပူးပေါင်းရင်းမြစ်များ

Aiseya 10:27

Mari ko wati wo wa ke, a ko a si wo bɔ Asiriyanu bolo la. Wo ti ma yɔɔnnu na anu kɔrɔ tun.

Aiseya 14:25

A ko a si Asiriyanu nunku ata kɔnkɛnu ma a tontɛ kɔrɔ Isirɛla nyamanɛ rɔ. A si ata mɔgɛnu bɔ kun-gbaran rɔ Asiriyanu bolo. Anu kunyɛ si bɔ dunu madunɛ kɔrɔ.

Aiseya 29:4

Yerusalɛm kɛ si ma iko furi tenbi huma-humana kanbɛ rɔ. A kuman-kan ra ti ban gbɛla.

Aiseya 3:26

Kiti-fɔ-tinɛnu si ma di-kɛ-tinɛnu na. Yerusalɛm soe rakolonyanɛ si to iko anu bara digin musi min ma.

Aiseya 49:21

Nba ile Yerusalɛm, i si a fɔ i nyɛrɛ ma ko, “Yon ya den-siyamɛ kɛ bɛɛ sɔrɔn n ye?” I si a fɔ ko i wara foo ila dan bɛɛ la ko i ti den-gbɛrɛ sɔrɔn tun. I ko anu bara i gben ka i to biralɛ rɔ kɔnɔ yon ya dan kɛ damasi labɔ a rɔ i ye? I si a fɔ tun ko i bolokanɛ tora min kɛ, dan kɛ bɛɛ bɔra mintɔ gbɛ?

Aiseya 51:14

Minnu bi biralɛ rɔ, wonu ti mɛ bolokala tun. Anu si siyi-yan sɔrɔn lafɛrɛ rɔ ka dɔn-fan sɔrɔn duk!

Aiseya 51:23

A ko a si yi-lafɛ wo di wo tɔrɔlɛnu ma, anu denu minnu ya wo boloka belenna lu-kolenu ma, kɔni. Anu denu denu taranta wo ratɛntɛnna iko bore.

Aiseya 60:1

Ile Yerusalɛm, i lasɔ, i silɛɛ ni tii i ma iko tele. Marita gbiliyɛ ye malanna i kuma.

Aiseya 61:1

Ma Tigi Mari Allata Sɛnbɛ ye n tɔ bawo a ara nde, Aiseya yabɔ ka kibara-nyimɛ lake mɔgɔ-tɔrɔnɛnu ma. Minnu yisi tinyanɛ, a ya n sɔ ka wonu manugu-nɛgɛ. Minnu bi biralɛ rɔ nyamani-gbɛrɛkɛ rɔ, a ya n sɔ ka wonu boloka-koe fɔ anu ye. Minnu bi yele la, anu si wonu kunyɛ bɔ gbaran rɔ.

Aiseya 9:4

Mari, i wara dunu-gbilima-wɛ bɔ anu kuma. I wara gbɛn da sawɛ bɔ anu kɔma. Sibolo-gbɛrɛ minnu bi anu yakɔrɔ-mamɔla, i wara wonu nabui anu kɔrɔ. I wara anu nabui iko i ya Midiyan kɛlɛ-dannu nabui nya min nun kɔrɔma la.

Yɛrɛmaya 51:45

Mari ko Isirɛla mɔgɛnu ni bɔ anu burila Babilɔn. Anu ni anu buri Marita fondo-bɔ-wɛ kɛ kɔrɔ.

Yɛrɛmaya 51:50

Mari ya a fɔ ala mɔgɛnu ye Babilɔn nyamanɛ rɔ ko, “Wo ara sayɛ masangba min kɛ, wo kana fenfen makɔni. Wo ta! Hali wo fɛ-yan wo warɛnu na, wo kana nyina nde, Mari ko anubɛ Yerusalɛm soe.

Yɛrɛmaya 51:6

Anu burumatoe ni bɔ Babilɔn nyamanɛ rɔ. Anu ni anu buri alako anu niyi la ni kisi. Anu kana faga, anu tɔgɛ ni to Babilɔn kɛnuna hakɛ la. Mari ko a si a tayili sara anu na iko a bɛnta, a ni a ma nya min.

Isikiyɛli 34:27

Anuna kɔlɔmanu si gbɔ, anuna sɛnɛnu si sabati. Bɛɛ si sigi a halala-dugi rɔ lafɛrɛ rɔ. N ba yɔlɔkɛnu tatɛgɛ nta mɔgɛnu ma tumɛ min ka anu hɔrɔya yɔɔn-tiginu ma, anu bi a lɔnna wo le ma ko Mari le nde la.

Sakaraya 2:6

Wo kɔma, nde, Sakaraya ya Mari kuman-kan latenbi ala mɔgɛnu ma ko, “Mari ko a ara wo ranyɛnsɛn duninya-tonko-nanɛ bɛɛ rɔ kɔnɔ wo ni wo buri bɔla Babilɔn nyamanɛ rɔ ka sɛgi Yerusalɛm soe burɔ.

Luka 21:24

Donu si faga faan la. Donu si ta yɔɔnyɛ rɔ nyamanɛ bɛɛ rɔ. Sibolo-gbɛrɛnu si Yerusalɛm radɔn ha anuta wati ban tumɛ.

Luka 4:18

“Marita Sɛnbɛ ye n tɔ. A ara n yabɔ alako n ni kibara-nyimɛ lake bolo-kolɔnnu ma. Minnu bi biralɛ rɔ, a ya n sɔ ka wonu boloka-koe fɔ anu ye anubɛ ka fiyɔnnu yɛ laka. Nɔɛ sanɛ minnu kuma, n si wonu hɔrɔya.

Lankɛnimayɛ 18:4

Wo kɔma, n ya kuman-kan-gbɛrɛ lamɔɛn bɔla Arinyɛni tɔ. A ye a fɔla ko, “Nna mɔgɛnu, wo bɔ! Wo ni bɔ a fɛ feu! Wo kana kofu a ma ata hakɛ rɔ alako wo kana tɔrɔyɛ sɔrɔn a fɛ!