Aiseya 43:28 - ALLALA KUMƐ

²⁸ Mala mɔgɔ-banu ya a bato tinɛ latinya. Ka a tɛgɛ koe wonu ma, a ya kasarɛ lana male Isirɛla mɔgɛnu kuma. A ya a ma, male ala mɔgɛnu tora yarabiyi rɔ.

Aiseya 43:28 ပူးပေါင်းရင်းမြစ်များ

2 Samuwɛli 1:21

“Alamɛ duri anubɛ bandɛ kana yigi Kilabowa kɔnkɛ kuma. Alamɛ bin kana fɛrɛn nyɔ tun bawo kerintenuna nɛgɛ-walannu sanɛ nyɔ rɔ miliyɛ rɔ. Mansa Sɔlila nɛgɛ-walan ma ti mun tun tuli la min si a lamalan-malan.

1 Ko-Kɔrɔta-Karan 24:5

Bawo kun-tigi siya minnu bi Allala wɔli kɛla, woletɔ anu ya wɔlɛ tala anu na koron-nakɛ fɛ alako lafisayalɛ kana taran anu tɛma.

2 Ko-Kɔrɔta-Karan 36:17

Wo le ya a ma, Mari ya Babilɔn mansɛ latugu anu kan ma. Ala kɛlɛ-dannu tora Yuda kemini-mɛsɛnu fagala hali minnu bi Bato-Bɔn la. Anu ma kinikini mɔgɔ-wo-mɔgɔ ma. Kei wo, musi wo, denni wo, kina wo, a kirayato wo, Alla ya wonu damasi kunyɛ don anu bolo.

Yaburi 79:4

Sibolo-gbɛrɛ minnu bi mala foolɛ rɔ, wonu bi ma mɔɛnna. Anu bi yɛlɛnna ma ma ka ma manyini.

Yaburi 89:39

I wara ila sarama-kan tinya ila wɔli-kɛlɛ wara la. I wara ala mansaya-fulɛ gbesi dugi la gbangban rɔ.

Aiseya 24:6

Woletɔ Alla ara dugi danka ka mɔgɛnu sara anuta ko-yogomɛla ko la. Minnu bara to anu niyi la, donu bi tola bɔla wonu na.

Aiseya 34:5

Mari ara ala faan sagan a lɛɛ rɔ san-kole rɔ. A ye nala Idɔm kundu bɔla, ado a ara kasarɛ wara-koe fɔ mɔgɛ kɛnu ye nun.

Aiseya 47:6

Mari ko ale diminyanɛ male ata Isirɛla mɔgɛnu ma nun. Ma biranɛ a bolo iko ata ma ma la. A ko a ara ma kunyɛ don Babilɔn kɛnu bolo, ado anu ma kinikini ma ma. A ko hali mala kɛmɔgɛnu, anu bi wonu natofi-tafila.

Aiseya 65:15

Wole karagbɛlɛnu tɔgɔ-ratɛgɛ mani de ala wɔli-kɛlɛnu bolo iko mɔɛn, ado ale Mari Alla nyɛrɛ le ye wo fagala. Kɔnɔ ale si ata wɔli-kɛlɛnu kele tɔgɔ-gbɛrɛ la.

Yɛrɛmaya 24:9

A ko a ye kasarɛ min sigila wo ma, wo si a ma, duninya mumɛ bɛɛ ni kilan. Mɔgɛnu si wo mayɛlɛn. Anu si wo ma yɛlɛnma-fan la. Anu si wo tɔgɛ ma dankali-kɛ-fan la.

Yɛrɛmaya 52:27

Anu ke anu na Ribila soe burɔ Hamati nyamanɛ rɔ, Babilɔn mansɛ ya a ma, anu ya Yerusalɛm kɛ wonu gbesi ka anu faga. Kɛlɛ tara Yuda mɔgɛnu na ka le.

Nimisa Koe 2:2

N Tigi Mari ma kinikini so-mɛsɛ fenfen ma Yuda nyamanɛ rɔ. A ara anu bɛɛ halaki pɔ! So-latankanɛ min bɛɛ ye Yuda nyamanɛ lakanan-koe la, a ara wo bɛɛ labui fugbu! A ya nyamanɛ anubɛ a mɔgɔ-banu fɛrɛn dugi la yarabiyi bolo.

Nimisa Koe 4:20

Mari ara mata mansɛ min yabɔ, ma yogenu ya wo bira anuta gbɛrɛ rɔ, ado ma niyi-kunyɛ le wo la. Ma lara wo le la ko a si ma latanka ma yogenu ma.

Isikiyɛli 5:15

“Nde, Mari wa diminya wo ma ka wo tɔrɔ, sibolo-gbɛrɛ minnu bi wola foolɛ rɔ, wonu kun ma si kɔ. Anu si nyima wo rɔ ka wo rasɛ.

Daniyɛli 9:11

Male Isirɛla mɔgɛ bɛɛsi ya ila tɔnnu tinya. Anu ma sɔn ila kumɛ birala mumɛ! Ma ara hakɛ kɛ i la, woletɔ ita wɔli-kɛla Nɛbi Musa ya dankɛ minnu sɛbɛ ata buku rɔ, ile le ya a ma, dankɛ wonu ya ma dama bira.

Daniyɛli 9:12

I ya a fɔ ko i ye nala koe min bɛɛsi mala male anubɛ mala kun-tiginu na, i wara wonu ma ma la serr! I wara Yerusalɛm soe tɔrɔ ka tenbi soe bɛɛ la duninya rɔ.

Daniyɛli 9:14

Ile, mata Mari Alla, i ya i rabɛn ma tɔrɔ kan ma, ado i ya a ma le, yɔ! I ya wo ma bawo i ya ko-wo-ko ma, wo telennɛ le tede! Kɔnɔ hali wo, ma ma ma tole masɔ i la.

Sakaraya 5:3

Wo kɔma, a ya a fɔ n ye ko dankalɛ sɛbɛnɛ a rɔ min si bui nyamanɛ bɛɛ rɔ. Min sɛbɛnɛ a tɔnkɔn doi rɔ ko minnu si kankanyɛ kɛ, wo bɛɛ la si to nyamanɛ rɔ. Min sɛbɛnɛ a tɔnkɔn doi fanan tɔ ko min bɛɛsi ye foninyɛ fɔla gboroli-kɛ-tinɛ, wonu fanan na si to nyamanɛ rɔ dogbe!

Sakaraya 8:13

A ko fɔlɔ nun, sibolo-gbɛrɛnu kɛnɛna anu nyɔgɔn dankala ko, “Alamɛ i kasarata iko Yuda anubɛ Isirɛla nyamanɛ kasaranɛ nya min.” Kɔnɔ a ko ale si wo kisi wo ma. Wo kɔma, ale sibolo-gbɛrɛ kelan wonu si duwa anu nyɔgɔn ye ko, “Alamɛ wo sabatira iko Yuda anubɛ Isirɛla sabatinɛ nya min.” Woletɔ wo ni wo kerinteya. Wo kana kilan.

1 Tɛsalonaika 2:16

Anu bi anu tayala nun ka male lakala alako ma kana kisi-ko-kuma-kawandili bɔ sibolo-gbɛrɛnu ye. Anu bi hakɛ min kɛla tumɛ bɛɛ, wo dan-natenbi le, ado Allala fondo-bɔɛ ara a laban anu kuma!