Aiseya 32:6 - ALLALA KUMƐ

⁶ Kun-takolɔn si kuntanya-kumɛ le fɔ ka a miri ko-yogomɛnu ma. A kɛ-nya anubɛ a darɔ-kan, wo bɛɛ manɛ Alla manyini-fan le la. Mɔgɛ wo ti dɔgɔma di kɔnkɔtoe ma. A ti yi di kan-nagbalatoe ma.

Aiseya 32:6 ပူးပေါင်းရင်းမြစ်များ

Yaburi 141:4

N miriya bɔ ko-yogomɛ ma. Doinu tenbi ko-yogomɛ mala, n kana kofu anu ma. N kana na anuna bɛsi-kɔ-fannu dɔn.

Hɛnkilimaya-Kumɛnu 19:3

Mɔgɛ si a nyɛrɛ tinya ala kuntanyɛ la kɔnɔ hali wo, a si a tɛgɛ sigi Mari ma.

Hɛnkilimaya-Kumɛnu 24:7

Hɛnkilimɛla kuma-kɔrɛ lɔn-koe gbɛlɛ kun-takolɔn bolo. Ni hɛnkilimɛnu siginɛ, anu bi kumala, a fisa, ile kun-takolɔn ni i dɛ madon i la.

Aiseya 10:2

Wo kɛ-nya le wo la alako bolo-kolɔnnu kana na yo sɔrɔn, ado wo ye kɛɛ-musinu anubɛ kelennɛnu kankanna wo nya na le.

Aiseya 10:6

A ko a ara wo latugu Alla-lɔnbɛlɛ donu kan ma bawo anu bara a ladiminya. A ara wo lata bumalɛ anubɛ kankanyɛ anubɛ Yuda kɛnu tatɛntɛn tinɛ ka anu ma iko gbangban.

Aiseya 26:10

Hali i ye ko-nyimɛ kɛla karagbɛlɛnu ye, anu ti anu degen ko-telenni-kɛ ma. Hali mɔgɔ-telennɛnu taranta nyamanɛ kɛ rɔ, anu bi karagbɛlɛyɛ kɛla. Anu ma ila kabana-koe lɔn fenfen na.

Aiseya 3:15

Sereya sa wo bolo ka bui nna mɔgɛnu ma ka bolo-kolɔnnuna bolo-fannu bi anu bolo.” Ale wo Tigi Mari Sɛnbɛ-Bɛɛ-Tigi kan le kɛ la.

Aiseya 31:2

Mari wa kasarɛ lana tumɛ min, a ya a lɔn a ye min mala. Alla wa mɔgɔ-yogomɛnu anubɛ anu kumafunfannɛnu niyi-ragbɛrɛn-koe fɔ tuma-wo-tuma, a si a kan wo latɔnbagaya.

Aiseya 59:13

Ma ara hakɛ kɛ ka bila Mari la. Ma ara ma kan-kɔ sɔ a la. Ma ya ma rabɛn mɔgɛnu tanban-koe la alako ma si Alla sɔsɔ nya min. Yanfanteyɛ anubɛ foninya-fɔɛ ye bɔla ma yisi le tɔ.

Aiseya 59:7

Anu si anu buri tala ko-yogoma-kɛ-tinɛ tiriya! Anu natiri hakɛbɔnɛnu fagala. Anu miri bɛnnɛ ma fenfen ma fɔ wunduyogoyɛ. Anu ya anu kun telen kan-bo-kan na, fenfen ti taran nyɔ fɔ kasarɛ anubɛ halakiyi.

Aiseya 9:17

Woletɔ Mari ti sɔn kemini-mɛsɛ wo fenfen kunyɛ ni bɔ a rɔ muk! Hali kelennɛnu anubɛ kɛɛ-nyaganɛnu, a ti kinikini wonu ma bawo Alla-lɔnbɛlɛ anubɛ karagbɛlɛ le mɔgɛ damasi la. Anu darɔ-kan bɛɛ yogo. Kɔnɔ hali wo, wo ti a ma, Marita fondo-bɔɛ ni ban. Ha bi, Mari kɔɛn kɔrɔbinɛ anu tɔrɔ-koe la.

Yɛrɛmaya 13:23

Mɔgɔ ti ke a fɛrɛ yɛlɛmana. Kuli fanan ti ke a manyɛgannɛ bɔla a ma. Wole Yerusalɛm kɛnu fanan bi wo nya le. Wo ti ke yɛlɛmana tun ka ko-nyimɛ kɛ. Wo ye karagbɛlɛyɛ le la tolon!

Isikiyɛli 34:18

Sagɛ donu bi anu tɔ, wonu ti wasa bin-nɔrɔnni-dɔn la fɔ ka binyɛ toe wo tinya anu kian la. Anu ba ban yi minna, anu si yi wo dundunɛ to.

Daniyɛli 12:10

Hɛnkili ye minnu na, wonu si anu kɛ-nya latelen kɔnɔ mɔgɔ-karagbɛlɛnu ti ko-wo-ko nya-yen kɛ rɔ fɔ ka to anuna karagbɛlɛyɛ kun na tolon!

Emɔsi 8:6

Ma si dɔn-fen-tinyanɛnu dɛ lagbɛlɛya mɔgɛnu kuma. Fɛlɛtenɛ minnu ti ke sanbara-sɔnkɛ sɔrɔnna, ma si wonu nyini ka anu dɔndɔ alako ma si anu ma yɔɔnnu na nya min ka anu mayira bawo anu ti ke yili-sarɛ wonu sɔrɔnna.”

Matiyu 15:19

Ado nfan, miriya-yogomɛnu bi bɔla mɔgɔ-yisi le tɔ min si a sɔ mɔgɔ-faga-koe la anubɛ yɛlɛnyɛ anubɛ milibɛlitaya-koenu na, hali kankanyɛ anubɛ foninya-fɔɛ anubɛ mɔgɔ-rafɔɛ.

Matiyu 23:13

“Gbalo-belebele ye wole tɔn-karan-mɔgɛnu anubɛ Farisinu kuma! Wole nyɛrɛ-mayiralɛnu, Alla min bi Arinyɛni tɔ, wo ara ata mansayɛ don-dɛ sɔgɔ mɔgɛnu yarɔ. Kɔnɔ wole fanan ti don, ado mɔgɛ minnu bi anu tayala don-koe ma, wo ti sɔn wonu ni don. [

Yemesi 1:27

Ma Fa Alla si sɔn dina min ma, wo le kɛ la. Wo tigi ni kelennɛnu anubɛ kɛɛ-musinu dɛnbɛ anuna tɔrɔyɛ rɔ. A ni a nyɛrɛ sɛninyanɛ mara duninya-ko-yogomɛ-bɛɛ ma. Dina kɛ, fɛɛ-wo-fɛɛ sa a la, ado dina-latinyani ma.

1 Samuwɛli 24:13

Anu bi sarandɛ min fɔla ko, ‘Ko-yogoma-kɛlɛ le si ko-yogomɛ ma,’ ile ya wo lɔn serr! Woletɔ nde ti ko-yogoma ma i la.