Aiseya 30:16 - ALLALA KUMƐ

¹⁶ Yanni wo ni wo ma, wo miriya bɛnnɛ ma fenfen ma fɔ ka wo sigi wola so-latirimɛnu na, ado wo ma foni. A ye nala a labanna wo le ma gben! Wola soee wonu ya anu buri nya-wo-nya, wo gbennɛnu bi anu burila wonu ko.

Aiseya 30:16 ပူးပေါင်းရင်းမြစ်များ

2 Mansɛnu 25:5

Kɔnɔ hali wo, Babilɔn kɛlɛ-dannu ya anubɛ anuna mansɛ sagaran. Anu ya Mansa Sɛdɛkaya bira gbɛkole do ma Yɛrikɔ soe dafɛ. Ala kɛlɛ-dannu ya a boloka ka a to a yogenu bolo la.

Yobu 39:11

Ile si ke i yigi sala sigi wo sɛnbɛ-wɛ kuma alako a ni ila wɔli-gbɛlɛmɛnu kɛ i ye?

Yaburi 147:10

Ale Mari kolan ti bɔ soeenu na minnu tagbɛlɛ. A mako sa kɛlɛ-kurugbɛnu na.

Yaburi 33:17

Kɛlɛ-dannuna soeenu dɔrɔn ti a ma, anu ni kɛlɛ nɔ. Anuna soeenu sɛnbɛ dɔrɔn ti a ma, anu ni kisi.

Aiseya 2:7

Ila mɔgɛnuna nyamanɛ lafanɛ sɛnɛ anubɛ wodi-gbɛ la, ado fen-kolomɛnu ti ban anu bolo. Soeenubɛ kirindinu fanan ti ban anu bolo.

Aiseya 31:1

Minnu bi tala Iyipiti anu dɛnbɛn-koe rɔ, gbalo ye wonu kuma. Anu lanɛ Iyipiti kɛnuna soeenu anubɛ anuna kirindinu anubɛ anuna kɛlɛ-kɛ-dannu na dɔgɔma-ma-de! Kɔnɔ Isirɛlata Mari Alla-sɛnimɛ, anu ma la ale la. Anu ti a manyinika anu dɛnbɛn-koe la.

Aiseya 31:3

Hadama-dan le Iyipiti kɛnu na dɔrɔn. Alla ma anu na. Soee dɔrɔn de anuna soeenu na. Mari wa ata sɛnbɛ lawɔli, nyamani-sɛnbɛmɛnu si tii mɛmɛ! Nyamani-nɛ minnu dunnɛ nyamani-wɛnu na anu dɛnbɛn-koe la, wonu fanan si tii nya-kun-kelen tɔ.

Yɛrɛmaya 39:4

A lɔn Mansa Sɛdɛkaya anubɛ ala kɛlɛ-dannu bolo ko anu nɔ-ko sa kɛlɛ rɔ, anu ya anu taya ka tunu suyi rɔ. Anu bɔra mansɛla nakorɔ-kilɛ la. Anu tenbira tarɛ kun-da filɛ latugun-tinɛ don-dɛ la. Anu tara anu burila Yorodan-ba-lɛɛ telen tɔ.

Yɛrɛmaya 4:13

Ma yogenu bi nala iko banda-finyɛ. Anuna kɛlɛ-kɛ-kirindinu bi nala anu burila iko tɔnkɔlɔn. Anuna soeenu bi anu burila iko kokɛ. A si gbɛlɛya ma kuma bawo wo ye nala kasarala le kɛ la.

Yɛrɛmaya 46:6

Hali a buri-kɛla-wɛnu, anu kunyɛ ti bɔ a rɔ. Anuna kɛlɛ-dannu kunyɛ ti bɔ a rɔ. Anu bi anu kian latugula kantɔ-wara la Yufereti bɛ dafɛ ka ta bui fugbu!

Nimisa Koe 4:19

Ma yogenu yigira ma kan ma iko tanbakɔrɔmanɛ si bɔ san ma nya na fii! Anu ya ma sagaran kɔnkɛnu tɛma. Anu ya ma latɛrɛna wulɛ rɔ ka ma bira.

Emɔsi 9:1

N ya Mari yen, a ya a lakɔɛnma saraka-bɔ-tinɛ dafɛ. A ko, “I ni Bato-Bɔn sɛnbɛrɛn-kɔn-kumɛnu gbesi alako dandan-kɔrɛ ra ni maga. Anu kumɛ ni bui mɔgɛnu kunyɛ ma.” A ko a mɔgɛ toe si faga kɛlɛ rɔ. Mɔgɔ-wo-mɔgɔ ti ke a burila. Bɛɛ si faga tɛrr!

Maika 1:13

“Lesi soe wo tɔgɔ-kɔrɛ mani de iko ‘so-kurɔn min si kirindi sagan.’ Wole Lesi mɔgɛnu, wo ni wola soeenu kiri wola kirindinu na alako wo buri-koela ko la. Wo ya wo sanka Isirɛla nyamanita-mɔgɛnu ma hakɛ-kɛ-koe rɔ ka na wo la Yuda nyamanɛ rɔ. Wo ara a ma, Yerusalɛm mɔgɛnu bara anu sanka wole fanan ma hakɛ-kɛ-koe rɔ.

Habakuku 1:8

“Anuna soeenu bi anu burila ka tenbi kuli la. Soee wonu makilannɛ ka tenbi suluku-kɔnkɔtoe la. Anuna so-laburilɛnu nara le ka bɔ wula-yan la pon! Soee wonu bi anu matɛnna buri-kɛ-koe la. So-laburilɛnu anubɛ anuna soee wonu si yigi anu yogenu kan ma fii iko tanbakɔrɔmanɛ si yigi sisi-dan kan ma nya min!

Tɔn-Fɔɛ-Fila-Nyɔgɛ 28:25

“Mari si a ma, wo yogenu si wo nɔ. Wo wa ta wo yogenu kɛlɛ tinɛ tumɛ min, wo si ta kila kelen fɛ kɔnɔ wonu si wo ranyɛnsɛn. Wole si belenna wo burila anu kɔrɔ kila-siyamɛnu fɛ. Ni mɔgɔ-gbɛrɛkɛnu ya wo tɔrɔya-nya yen, anu si kilan kati!

Tɔn-Fɔɛ-Fila-Nyɔgɛ 28:49

“Mari si a ma, sibolo-gbɛrɛkɛ-mɔgɛnu si na wo tɛma ka bɔ wula-yan la pon, wo ti minnu kuman-kan lamɔɛn hali! Wonu si na kɛ wo ma iko bibinu.