Kɛwɔlɛnu 9:31 - ALLALA KUMƐ

³¹ Nba, Allata mɔgɛ min bɛɛ ye Yudiya anubɛ Kalili sigisɔnnu tɔ anubɛ Samariya nyamanɛ rɔ, wo bɛɛ ya yisi-kimɛ sɔrɔn wo wati le tɔ. Anu tora Mari batola min kɛ, Allata Ni-Sɛnimɛ ya anu dɛnbɛ alako anu ni siyaya nya min ka sabati.

Kɛwɔlɛnu 9:31 ပူးပေါင်းရင်းမြစ်များ

1 Ko-Kɔrɔta-Karan 22:18

A ya a fɔ mɔgɔ-ba wonu ye ko, “Wota Mari Alla ye wo fɛ nun, ado a ya a ma, wola nyamanɛ kan tinɛ bɛɛ tora yisi-kimɛ rɔ. Ale ya fɛrɛ di n ma ka nɔ-ko sɔrɔn mɔgɛnu ma minnu siginɛ yan nun. Hali kaka, anu bi wole anubɛ Mari kɔrɔ.

1 Ko-Kɔrɔta-Karan 22:9

Kɔnɔ hali wo, a ya lanyiri kiri n ye. A ko a si dan di n ma min si mansayɛ kɛ ka nyamanɛ kɛ mara yisi-kimɛ rɔ. A ko yisi-kimɛ si taran dan wonubɛ a yogenu tɛma. A ko n si dan wo kele Silamɛni bawo a ko nyamanɛ kɛ si to yisi-kimɛ rɔ ata wati rɔ.

Nihɛmaya 5:15

Kun-tigi minnu bi yan nun kɔrɔma la, wonu taranta a lagbɛlɛyala mɔgɛnu kuma. Tele-wo-tele, mɔgɛnu bi wodi-gbɛ-gbu bi-nani bɔla ka wo sa kun-tigila dɔn-fen anubɛ minni-fen kuma. Hali anuna wɔli-kɛlɛnu, wonu bi mɔgɛnu tɔrɔla. Kɔnɔ bawo nde ye Alla gbiliyala, n ma a ma iko kun-tigi wonu.

Nihɛmaya 5:9

Wo kɔma, n ya a fɔ anu ye ko, “Wo ye min kun na, wo ma telen. Wo ni Alla sako kɛ ka ko-telennɛ ma. Wo si a ma, sibolo-gbɛrɛnu ti ma mayɛlɛn-kunya sɔrɔn.

Yobu 28:28

Alla ya a fɔ hadama-dan ye ko, “Ni mɔgɛ ko a ni hɛnkilimayɛ sɔrɔn, fɔ a ni nde a tigi fɔlɔn gbiliya. Ni a sɔgɛ ye a la ka ko-kɔrɛ lɔn, fɔ a ni fara ko-yogoma-kɛ la.”

Yaburi 111:10

Hɛnkilimayɛ dabirɛ le Mari gbiliyɛ la. Min bɛɛsi ye Marita sereyanu birala, a si ko-kɔrɔ-lɔn di wonu ma. Ma ni to a matɔgɔla burubukai!

Yaburi 86:11

Mari, a sɔgɛ ye i la, n ni min ma, n karan wo la. Wo kɔma, n si a bira lanayɛ rɔ. N si ila wɔlɛ kɛ n yisi bɛɛ la nya min, i ni n nabila wo la.

Yaburi 94:13

I si a ma, wo ni a sulen tɔrɔyɛ ma ha denkɛ ni sin karagbɛlɛ wonu ye.

Hɛnkilimaya-Kumɛnu 1:7

Hɛnkilimayɛ dabira fɔlɔtɛ, wo le ka kilan Mari la. Hɛnkilibɔnɛnu si tɛgɛ hɛnkilimayɛ rɔ ka anu ban ata kuma-bira-koe ma.

Hɛnkilimaya-Kumɛnu 23:17

Keliyɛ kana i bira hakɛ-tiginu wara-koe ma. Marita gbiliyɛ min bi ile rɔ, wo le ni sɛnbɛ sɔrɔn i yisi rɔ yati!

Hɛnkilimaya-Kumɛnu 8:13

Ni i ko i ni Mari gbiliya, fɔ i ni i ban ko-yogomɛ la. Wasinteyɛ anubɛ foninya-fɔɛ anubɛ ko-yogoma-kɛ, wonu ma di nde ye.

Aiseya 11:10

Wati ye nala, mansa-kurɛ do si bɔ Dawuda bɔnsɔn rɔ, wo si ma tamasere la duninya bɛɛ ye. Sibolenu na si dɛn ata mansaya-soe burɔ ka nyɔ gbiliya.

Aiseya 33:6

A si a ma, Yerusalɛm ni sigi yiri! A si wole, ala mɔgɛnu kumafunfan. A si hɛnkili anubɛ ko-kɔrɔ-lɔn di wo ma. Min di wo ye wo dama ko, wo le Allata gbiliyɛ la.

Sakaraya 8:20

Ale Mari Sɛnbɛ-Bɛɛ-Tigi ko wati ye nala, mɔgɔ-siyaman si na Yerusalɛm soe burɔ ka bɔ so-siyaman tɔ.

Kɛwɔlɛnu 12:24

Wo bɛɛ rɔ, Allala kumɛ tora nyɛnsɛnna ka wara.

Kɛwɔlɛnu 16:5

Woletɔ dɛnkɛninya-mɔgɛnu sɛbɛ donta dɛnkɛninyɛ rɔ. Anu yatɛ tora siyayala tele-wo-tele.

Kɛwɔlɛnu 2:47

Wo bɛɛ rɔ, anu bi Alla tantola. Anu diyara mɔgɛ bɛɛ ye. Minnu bara kisi, Mari tora wonu makofula tele-wo-tele.

Kɛwɔlɛnu 20:32

“Nba kaka, n bara wo dantɛgɛ Alla ma. Wo yili ni to ala hina-kumɛ ko min si ke wo sɛnbɛ donna ka ata duwɛ di wo ma, ado a ara duwɛ wo lamara ala mɔgɛ bɛɛ ye.

Kɛwɔlɛnu 5:11

Allata chɔchi anubɛ min bɛɛ ya kɛ lamɔɛn, wonu kilanta ha ka a dan natenbi.

Kɛwɔlɛnu 6:7

Woletɔ Allala kumɛ tora nyɛnsɛnna. Karan-dannu yatɛ siyayara Yerusalɛm ha ka siyaya. Hali saraka-masɔlɛ siyaman dɛnkɛninyara.

Kɛwɔlɛnu 8:1

Sɔli sɔnta Sitifen faga-koe ma. Marita mɔgɛ donu ya Sitifen togon ka di ala ko la bɛrɛkɛ! Tɔrɔya-ba wulita Allata mɔgɛnu kan ma Yerusalɛm soe burɔ wulɔn tele. Dɛnkɛninya-mɔgɛ bɛɛ nyɛnsɛnta Yudiya anubɛ Samariya nyamanɛ bɛɛ rɔ fɔ Marita kilayɛnu.

Romu 14:17

Allala mansayɛ ma dɔn-fan anubɛ minni-fan la fɔ telenbagayɛ anubɛ yisi-kimɛ anubɛ sewɛ, Allata Ni-Sɛnimɛ ye min su dila, kɔni.

Romu 14:19

Nba, koe minnu si yisi-kimɛ lana anubɛ minnu si ma nyɔgɔn sɛnbɛ don, fɔ ma ni to wonu mala tuma-wo-tuma.

Romu 15:13

Ma yigi siginɛ Alla min tɔ, alamɛ wo ya wo lafa sewɛ anubɛ yisi-kimɛ la wola dɛnkɛninyɛ fɛ. Wola yigi min bi Yisa rɔ, wo ni to warala Allata Ni-Sɛnimɛ baraka rɔ.

Romu 5:5

ado yigi kɛ ti ma baya mumɛ! A ti ma baya bawo Alla ara ala keninteyɛ kɛ ma yisi rɔ. A ya ata Ni-Sɛnimɛ min di ma ma, wo le ye ma yisi lafala keninteyɛ la.

1 Kɔrɛnti 14:12

Nba, wole fanan bi wo nya na le. Wo hɔnnɛ Allata Ni-Sɛnimɛta fandɛ fanan na min kɛ, a fisa, wo ni wo raya ka wonu sɔrɔn min si chɔchi dɛnbɛ.

1 Kɔrɛnti 14:26

N na-kelen-nyɔgɛnu, n bi nfen ma kɛ la? Wo wa wo ladɛn Alla bato tinɛ, a fɛrɛ sa fɔ koe bɛɛ ni ma chɔchi-dɛnbɛn-koe la. Bɛti do ye mɔgɔ kelen bolo, mɔgɛ do ye karan kɛla, dogbɛrɛ ye ko-rayirɛ kɛla ka bɔ Alla bolo, dogbɛrɛ ye kumala kan-gbɛrɛ rɔ, mɔgɔ-gbɛrɛ ye a kan latenbila ka a kɔrɛ fɔ.

2 Kɔrɛnti 10:8

Mari ya sɛnbɛ min di ma ma, n wasinɛ sɛnbɛ wo le la bɛrɛkɛ, ado n ti miliya wo la bawo sɛnbɛ wo sa n bolo ka wo lasɛgi kɔma fɔ ka wo lasabati.

2 Kɔrɛnti 12:19

Tumado, wo ye wo mirila ko ma ye ma rayala wati bɛɛ ka ma nyɛrɛ fɛka wo ye. Ade! Ma ye kumala iko Kirasiti ye a fɛ, ma ni kuma nya min Alla yala. Ma diyana-mɔgɛ le wole la. Ma ye koe min bɛɛ mala, ma ye wo kɛla wo dɛnbɛn-koe le la.

2 Kɔrɛnti 13:10

Yanni n ni ke nyɔ, n bi koe kɛnu sɛbɛla wo ma. Woletɔ n ba ke nyɔ tumɛ min, n kana a lagbɛlɛya wo kuma. Mari ya sɛnbɛ min di n ma, n bi wo lawɔlila ka wo lasabati kɔnɔ wo labui ko ma de!

2 Kɔrɛnti 7:1

N diyana-mɔgɛnu, lanyiri kɛ bɛɛ kirinɛ male le ye! Woletɔ koe min bɛɛ si fɛrɛ-bɔnkɛ anubɛ niyi latinya, ma ni ma nyɛrɛ sɛninya wonu ma. Ma ni ko-sɛnimɛ nyini ka to kilanna Alla la.

Ɛfɛsa 4:12

A ya kɔ-fan kɛnu di le alako Allala mɔgɛnu-tabɛnnɛ ni taran Allata wɔlɛla ko la. A ya wo ma le alako Kirasitita chɔchi ni sabati.

Ɛfɛsa 4:16

Ma bagbuyi bɛɛ latugunnɛ anu nyɔgɔn na iko a bɛnta, a ni ma nya min ale bolo. A sɔlɔmɔnya kelen-kelennamɛ-bɛɛ ye wɔlila iko a bɛnnɛ a ni wɔli nya min. Woletɔ a ye koloyala le ka a nyɛrɛ lasabati keninteyɛ rɔ.

Ɛfɛsa 4:29

Wo kana kuma-dumanɛnu fɔ kuma tinɛ, fɔ mɔgɔ-dɛnbɛn-kumɛnu dɔrɔn! Wo si ko nyinya mɔgɛnu ma ka duwɛ lana wonu ma minnu bi anu tole masɔla wo kan la.

Ɛfɛsa 5:21

Wo ni sɔnnaya wo nyɔgɔn ye Kirasitita gbiliyɛla ko la.

Tɔn-Fɔɛ-Fila-Nyɔgɛ 12:10

Wo wa Yorodan bɛ kɛ tɛgɛ wati min, wota Mari Alla si a ma, wo si lanyiri-nyamanɛ wo bi wo si sigi kan min. A si wo tanka wo yogenu ma. Wo si sigi lafɛrɛ rɔ.

Filipai 2:1

Ka a fɔ ko Kirasiti siginɛ wo yisi rɔ, kumɛ wo ti wo sɛnbɛ don, ba? Ala keninteyɛ ti wo yisi-kimɛ, wa? Wo ye ta-nyɔgɔnyɛ kɛla ata Ni-Sɛnimɛ baraka rɔ, a sa wo nya? Wo sa kinikinɛ anubɛ nyɔgɔn-keni kɛla, wa?

Kɔlɔsi 1:10

Ni wo mara, wo si ke ko ladanna iko Mari ye a fɛ, wo ni ko ladan nya min. Wo si a hɛnɛ koe bɛɛ rɔ tumɛ bɛɛ. Wo kɔma, wo si to ko-nyimɛ kɛla mɔgɛnu ye. Wo bɛɛ rɔ, wo si to koloyala Alla-lɔn-koe rɔ.

1 Tɛsalonaika 5:11

Woletɔ wo ni wo nyɔgɔn sɛnbɛ don ka wo nyɔgɔn madɛnbɛ iko wo ye a kɛla nya min kaka.

1 Timoti 1:4

Anu ni fara benba-namu anubɛ benba-tɔgɔ-siyaman-ratɛgɛ-koe la bawo wonu si sɔsɔlɛ dɔrɔn nawuli mɔgɛnu tɛma. Mɔgɛ si kisi nya min, wonu ta ti gbɛ mɔgɛ ye wonu fɛ, ado mɔgɛnu ti kisi dɛnkɛninyɛ kɔma.

Hiburunu 4:9

Kɛ si a yira ma la ko Allala mɔgɛnu si ke anu sulenna iko Alla ya a sulen a tele wɔrɔnfila nyɔgɛ ma nya min.

Yasowa 21:44

Mari ya yisi-kimɛ di anu ma iko a ya lanyiri kiri anu benbanu ye nya min fɔlɔn. Hali sibolo-kelen-bɛrɛn ma nɔ-ko sɔrɔn anu ma bawo Mari ya sɛnbɛ di Isirɛla mɔgɛnu ma anu yogenu kuma kɛlɛ-kɛ-tinɛ.

Yude 1:20

Kɔnɔ wole, n diyana-mɔgɛnu, wo ni to sabatila wola dɛnkɛninya-sɛnimɛ rɔ. Wo ni madiyali kɛ Allata Ni-Sɛnimɛ baraka rɔ.

Kɛlɛ-Kurugbɛnu 3:30

Isirɛla mɔgɛnu ya Mohabunu nɔ. Wo kɔma, san bi-segin, Isirɛla mɔgɛnu yisi kimanɛ tora.