Mansa Hairam min siginɛ Taya soe burɔ, Mansa Dawuda diyana-mɔgɛ le wo la nun. Wo ya a lamɔɛn tumɛ min ko Mansa Silamɛni bara ma mansɛ la a fa Dawuda gbɛ rɔ, a ya ala mɔgɔ-ba donu nata Mansa Silamɛni kɔndɔn tinɛ.
San kɛmɛ nani san bi-segin (480) ara tenbi kebi Isirɛla mɔgɛnu bɔra Iyipiti. A san kɛmɛ nani, san bi-segin nyɔgɛ wo karɛ fila nyɔgɛ ma, Mansa Silamɛni ya Bato-Bɔn sɔɛ dabira. Wo ya a taran, Silamɛnina mansayɛ ara san nani bɔ Isirɛla nyamanɛ kun na.
Ale Mansa Silamɛni ya a fɔ tun ko, “Mari ara ala kumɛ wo latɔnbagaya kaka. N bara sigi n fa Dawuda gbɛ rɔ mansayɛ la iko Mari ya lanyiri kiri nya min. Kaka, n bara Bato-Bɔn sɔ Isirɛlata Mari Alla ye.
Lunyɛ do, Mansa Dawuda siginɛ ala bon-kurɛ la, a ya a fɔ Nɛbi Netan ye ko, “Nde siginɛ bon-hakikɛ la min nadannɛ kɔlɔma-kinyanɛ la kɔnɔ Marita tɔn-kenkirɛ siginɛ fani-bɔn le la.”
Mansa Silamɛni fa Mansa Dawuda ara Bato-Bɔn sɔ tinɛ rabɛn nun. Nyɔ ye gbere-koloyɛ le la Yɛbusi do bolo min tɔgɛ Arɔna. Kan tinɛ kɛ ye Muraya kɔnkɛ le kuma Yerusalɛm soe burɔ, ado Mari ya a nyɛrɛ yira Mansa Dawuda la nyɔ le. Mansa Silamɛni ya Bato-Bon-sɔɛ dabira
