2 Timoti 4:3 - ALLALA KUMƐ

³ bawo wati ye nala, mɔgɛnu ti anu tole masɔ tonyɛ la tun. Anu si bila anu nyɛrɛ-natanu fɛ. Anu si to karan-mɔgɛnu nadɛnna anu nyɛrɛ ye, minnu si anu toleta diyana-koenu fɔ anu ye.

2 Timoti 4:3 ပူးပေါင်းရင်းမြစ်များ

1 Mansɛnu 18:22

Nɛbi Ilaya ya a fɔ Isirɛla mɔgɛnu ye ko, “Nde le kelen pe ara to Marita nɛbiyɛ la gbɛ! Kɔnɔ Beyalita nɛbi mɔgɔ kɛmɛ nani mɔgɔ bi-loli ye yan kaka.

1 Mansɛnu 22:18

Mansa Ehabu ya a fɔ Mansa Yɛhosafati ye ko, “N ma a fɔ i ye nun? Kumɛ min ma di n tole la, kɛ si wonu denu fɔ n ye?”

1 Mansɛnu 22:8

Mansa Ehabu ya a fɔ a ye ko, “Mɔgɔ kelen bi yan, Imilala den Nɛbi Mɛkaya, kɔni. Kɔnɔ wo ma di n ye mumɛ bawo a ti wɔlɔyiya-kuma-wo-kuma fɔ n ye min di n tole la fɔ a yogomɛ gbansan!” Mansa Yɛhosafati ya Mansa Ehabu makawandi ko, “A ma bɛn, i ni kuma-sufa kɛ fɔ muk!”

Bɔ-Koe-Iyipiti 32:33

Mari ya a fɔ Musa ye ko, “Ni mɔgɔ-wo-mɔgɔ ya hakɛ kɛ ka bila nde la, n si wo tɔgɛ firan nta buku rɔ.

Aiseya 28:12

Mari ye lafɛrɛ anubɛ ko-nyimɛ dila wo ma nun kɔnɔ wo ya wo ban wo la a bolo.

Aiseya 30:10

Anu bi a fɔla nɛbinu ma ko, “Wo ni sigi-a-la don!” Anu bi a fɔla fanan ko, “Ma tole diyana-koenu denu fɔ ma ye. Ma sa nyinina ko-telenni ma fɔ ko-nyima-rayirɛ dɔrɔn.

Yɛrɛmaya 18:18

Nde, Yɛrɛmaya ban kɛ fɔla, wole ko, “Wo na, ma ni ko-rabɛn-kɛ Yɛrɛmaya kan ma. Saraka-masɔlɛ donu si taran a gbɛ rɔ ka ma labila. Hɛnkilimɛ donu si to ma hɛnkili kɔla. Nɛbinu si to Marita kumɛ dila ma ma. Ma mako sa Yɛrɛmaya kɛ la tun. Ma ni ta a la mɔgɔ-banu yakɔrɔ. Ni a ya fenfen fɔ, ma kana ma tole masɔ wo la.”

Yɛrɛmaya 27:9

N ya a fɔ kilayɛ wonu ye ko anu ni n kan natenbi ko anuna mansɛnu kana anu tole sigi foninya-nɛbinu anubɛ bolo-tafɛlɛnnɛnu kan kɔrɔ minnu bi a fɔla ko anu ni anu ban Babilɔn mansɛ la. Ni kiyo-rakarannɛnu kumara anu ye yarɔ-koenu fɔ-tinɛ, ni wo ma, ka yarɔ-koenu fɔ iko furinu denu ya a fɔ anu ye, ni wo ma, ka yarɔ-kumɛnu fɔ kofo-denyɛ rɔ, anu kana anu tole masɔ wo do-wo-do la.

Yɛrɛmaya 29:8

Mari Sɛnbɛ-Bɛɛ-Tigi, Isirɛlata Alla ko wola foninya-nɛbinu anubɛ wola bolo-tafɛlɛnnɛnu kana wo bolo labira. Wo kana wo tole masɔ anuna kiyo-kannu na.

Yɛrɛmaya 5:31

Nɛbinu sa fenfen fɔla foninyɛ kɔma. Saraka-masɔlɛnu bi anu nyɛrɛta fanka le lawɔlila, ado wole, Mari nyɛrɛta mɔgɛnu diyana-koe le wo la. Kɔnɔ kɛ damasi laban si ma wo bolo nfen na?

Maika 2:11

“Mari ko wole kensuntenu bi nyinina foninya-nɛbinu ma minnu si wo mayuwaya. Wonu si belenna a fɔla wo ye ko, ‘Baan-feremɛnu bi wola ko la duk!’

Luka 20:19

Tɔn-karan-mɔgɛnu anubɛ saraka-masɔla-wɛnu ya anu taya wo wati rɔ ko anu ni Yisa bira bawo anu ya a lɔn ko a ya tili kɛ tɛgɛ anu denu denuna ko la. Kɔnɔ anu kilanta mɔgɛnu na.

Luka 6:26

Mɔgɛnu ba wo tɔgɔ-nyimɛ fɔ tumɛ min, gbalo ye wo kuma bawo wo benbanu ya a fɔ wo nya na le foninya-nɛbinu ma.

Yɔni 8:45

Kɔnɔ wo ma la n na bawo n bi tonyɛ fɔla wo ye.

Kɛwɔlɛnu 17:21

Ado nfan, Atɛn mɔgɛ bɛɛ anubɛ sundan minnu siginɛ nyɔ, a di wonu ye ka to ko-kurɛnu fɛsɛfɛsɛla anubɛ ka wonu wara-koe lamɔɛn.)

1 Kɔrɛnti 2:1

N na-kelen-nyɔgɛnu, n nara wo wara tumɛ min ka Allata gbundu-koe lagbɛ wo ye, n ma nna karan-bɛ anubɛ nna lɔnni-wɛ yira wo la.

1 Kɔrɛnti 2:4

N ma wo makawandi halliya-kumɛnu anubɛ hadama-den-hɛnkilimayɛ fɛ. N ya wo ma Allala Ni-Sɛnimɛ sɛnbɛ-mayirɛ dɔrɔn de fɛ.

Kalesiya 4:16

N bara ma wo yoge la bawo n bi tonyɛ fɔla wo ye, wa?

1 Timoti 1:10

yɛlannu wo, kei-maki-keinu wo, yɔɔn-mayiralɛnu wo, foninya-fɔlɛnu wo, foninya-sereya-bɔlɛnu wo, anubɛ ko-wo-ko min si tonya-karan masɔsɔ, tɔn kɛ sɛbɛnɛ wonu denu ye.

2 Timoti 1:13

N ya i karan kuma-kɛndɛ minnu na, wonu bira gben! Wonu ni ma misalɛ la ile ye ko i ni wo nyɔgɔn kɛ. Dɛnkɛninyɛ anubɛ keninteyɛ minnu bi ma bolo Yisa Kirasiti baraka rɔ, i ni to wonu tɔ.

Yude 1:18

Anu ya a fɔ wo ye ko, “Tele-laban-lunyɛ wa ke tumɛ min, wo mayɛlɛnnɛnu si na. Anu bilanɛ anu nyɛrɛ nata-yogomɛnu denu fɛ tolon!”