2 Pita 2:20 - ALLALA KUMƐ

²⁰ Minnu bara ma Mari anubɛ ma Kisilɛ Yisa Kirasiti lɔn ka bɔ duninya ko-tinyanɛnu ma, ni anu sɛgira ko-tinyanɛ wonu ma tun, ha wonu ni anu nɔ, mɔgɛ wonuna ban si yogoya ka tenbi a fɔlɔtɛ la.

2 Pita 2:20 ပူးပေါင်းရင်းမြစ်များ

Isikiyɛli 33:13

Hali n bara mɔgɔ-nyimɛ yili-madiya ko a si to a niyi la kɔnɔ tumado, a ni a miri ko a ara ko-nyimɛ minnu ma kɔrɔma la, wonu bara a ya labɔ. Ni wo tigi donta ko-yogoma-kɛ rɔ, a ara ko-nyimɛ min bɛɛsi ma nun, n ti n miri wo do-wo-do ma tun.

Saraka-Masɔlɛnuta Tɔnnu 13:20

Ni wo ya a mafɛlɛn, a ni a yen sumunɛ wo denkɛ rayiginɛ kibon-kibon, a ni a yen fanan a fɛrɛma-siyi min bi sumunɛ wo dɛ rɔ, wo fanan gbɛnɛ, saraka-masɔlɛ si a fɔ worɔ ko sumunu-tigi sɛninyani ma. Kiraya-yogomɛ le kɛ la min ya a dabira sumunɛ rɔ.

Saraka-Masɔlɛnuta Tɔnnu 13:55

Ni a ya a yen worɔ, findiki wo ara a boloka feufeu, wo kɔma, a si kurɛ wo ku tun. Kurɛ wo si sɛninya iko tɔn ya a fɔ nya min. Kɔnɔ anu ya kuyi min kɛ, ni a ya a yen, findiki wo ma a boloka, a si kurɛ wo sa kan tinɛ do rɔ ha tele wɔrɔnfila kɔrɔ. Wati wo wa ban, a si a mafɛlɛn tun. Ni a ya a yen, a findikinɛ ma siyaya a rɔ, ado a findikinɛ wo su ma yɛlɛma, hali wo, a ma sɛninya. Hali findiki wo ye kurɛ a ya-bɛrɛ ma, ni wo ma, a ya-yoge le ma, fɔ ka kurɛ wo mintan gburr! Ni a ya a yen, a findikini-su wo ara yɛlɛma, a ni ma iko a ye gbɛla, a si a kan-tina-findikinɛ wo fara a kɛndɛ la. Wo kɔma, do farata min na, ni wo findikira tun, a tigi si a toe wo mintan gburr, bawo findikiyi wo ara siyaya kurɛ ma tun.

Saraka-Masɔlɛnuta Tɔnnu 14:43

“Anu ba ban kɛ ladanna a gbɛ rɔ tumɛ min, saraka-masɔlɛ si na a mafɛlɛn tun.

Yilan-Yilan Koe 24:20

Mari ya ko-rayirɛ kɛ Nɛbi Belam ye Amalɛki mɔgɛnuna ko la. A ya wɔlɔyiya-kumɛ doni fɔ anuna ko la. “Fanka-tigi le Amalɛki mɔgɛnu na ka tenbi mɔgɛ kɛnu na kɔnɔ hali wo, ala ban anu si kasara pɔ!”

Tɔn-Fɔɛ-Fila-Nyɔgɛ 32:29

Wo ma ke a lɔnna wo yogenu ya wo nɔ nya min. Wo ma a lɔn min mara wo la.

Filipai 3:19

Wonuna ban le nyahanama la bawo anuta Alla le anu bagbuyi-natanu na. A bɛnnɛ, anu ni miliya koe minnu na, anu wasinɛ wonu tɔ. Anu bi anu mirila duninyata-fannu denu dɔrɔn ma.

2 Timoti 2:4

Kɛlɛ-den-nyimɛ ye a fɛ ka ala kun-tigi hɛnɛ min kɛ, woletɔ kɛlɛ-den ma minnu na, a ti basan wonuna koe la.

Yemesi 1:27

Ma Fa Alla si sɔn dina min ma, wo le kɛ la. Wo tigi ni kelennɛnu anubɛ kɛɛ-musinu dɛnbɛ anuna tɔrɔyɛ rɔ. A ni a nyɛrɛ sɛninyanɛ mara duninya-ko-yogomɛ-bɛɛ ma. Dina kɛ, fɛɛ-wo-fɛɛ sa a la, ado dina-latinyani ma.

2 Pita 1:11

Ni wo ya wo ma, wo wa don habadan-mansayɛ rɔ, ma Mari anubɛ ma kisilɛ Yisa Kirasiti ye kan min, anu si wo labɛn sewɛ la.

2 Pita 1:2

Alamɛ Alla hinara wo la ka yisi-kimɛ di wo ma duk! Alamɛ wola lɔnnɛ kuma-sara Alla anubɛ ma Mari Yisa wara-koe rɔ.

2 Pita 1:3

Alla ye a fɛ, ma ni ata gbiliyɛ anubɛ ata nyimayɛ sɔrɔn a fɛ bawo ma ya a lɔn min ya ma kele. Lɔnnɛ wo baraka rɔ, ma makoe ye fan min bɛɛ la ka Alla diyana-koe kɛ, wo bɛɛ dinɛ ma ma.

2 Pita 1:4

Woletɔ a ya lanyiri-kinama-wɛ anubɛ lanyiri-kɛndɛ-kɛndɛnu kiri ma ye. Ka a tɛgɛ kɔ-fan kɛnu ma, ma ni ata kɛ-nya fanan sɔrɔn. Wo kɔma, ma si na kisi duninya-natanu ma minnu bi mɔgɛnu tinyana.

2 Pita 1:8

Wo makoe ye kɛ-nya-sifa kɛnu denu na. Ni wonu bi wo bolo ka wara, wo ara min lɔn ma Mari Yisa, Allata-Mɔgɔ-Yabɔnɛ wara-koe rɔ, wo si a ma, wo ni wola wɔlɛ kɛ a kin na ka ko-nyinya Allata mɔgɛnu ma.

2 Pita 2:18

Anu bi anu nyɛrɛ matɔgɔla gbɛ ko-fuyinu tɔ. Anu bi nata-yogomɛnu kɛla alako ka wonu bira minnu kisi-san ka bɔ mɔgɔ-samanɛnu tɛma.

2 Pita 3:18

Kɔnɔ wo ni to koloyala ma Mari anubɛ ma Kisilɛ Yisa Kirasitita hinɛ anubɛ a lɔn-koe rɔ. Gbiliyɛ ni di ale ma habadan! Amina.