2 Mansɛnu 18:4 - ALLALA KUMƐ

⁴ A ya Alla-batobɛlɛnuna bɛsi-kɔ-tina-mayɛlɛnɛnu tinya. A ya anuna kuru-lɛsɛnɛnu takerikeri. Anu ya kɔlɔma minnu lɛsɛ musila muninyɛ la ka a tɔgɔ sa Asura, a ya wonu tatɛgɛtɛgɛ. Hali wo, Musa ya silɛɛ min nadan duguma-fanla muninyɛ la, anu ya wo kele “Nɛhusitan.” Mansa Hɛsakaya ya wo fanan tinya bawo mɔgɛnu bara wo ma anuna bɛsɛ do la ka isɛnti mintan a ye.

2 Mansɛnu 18:4 ပူးပေါင်းရင်းမြစ်များ

1 Mansɛnu 22:43

Mansa Yɛhosafati ya ko-telennɛ kɛ Mari yala iko a fa Mansa Esa ya a ma nya min. Fɔ fɛɛ kelen min taranta a la, a ma bɛsi-kɔ-tinɛnu tinya, ado mɔgɛnu tora sarakɛnu bɔla nyɔ anubɛ ka isɛnti mintan ka anuna bɛsɛnu kɔ.

2 Mansɛnu 10:26

Anu ya anuna bɛsi Beyali gbu labɔ luyi ma ka wo mintan.

2 Mansɛnu 11:18

Nyɔ-nyamanita-mɔgɛ wo damasi wulita ka ta bɔn wo la anu si Beyali kɔ kan min. Anu ya saraka-bɔ-tinɛnu tinya nyɔ ka bɛsɛ wonu tinya. Anu ya bɔn wo tinya fanan. Wo kɔma, anuna bɛsi-kɔlɛ min tɔgɛ Matan, anu ya wo fanan faga saraka-mintan-tinɛnu dafɛ nyɔ. Yɛhoyada ya kandali-kɛlɛ donu to Mari Bato-Bɔn makandan tinɛ nyɔ.

2 Mansɛnu 12:3

Kɔnɔ hali wo, anu ma anuna bɛsi-kɔ-tinɛnu tinya. Mɔgɛnu tora sarakɛ bɔla bɛsɛ wonu ye ka isɛnti mintan kan-tina-mayɛlɛnɛ wonu tɔ.

2 Mansɛnu 14:4

Kɔnɔ hali wo, a ma ban Alla-batobɛlɛnuna bɛsi-kɔ-tinɛnu tinyana. Alla-batobɛlɛ wonu tora sarakɛnu bɔla ka isɛnti mintan kan-tina-mayɛlɛnɛ wonu tɔ.

2 Mansɛnu 15:35

Kɔnɔ hali wo, a ma ban Alla-batobɛlɛnuna bɛsi-kɔ-tinɛnu tinyana. Alla-batobɛlɛ wonu tora sarakɛnu bɔla ka isɛnti mintan kan-tina-mayɛlɛnɛ wonu tɔ. Mansa Yotam le ya Mari Bato-Bɔn kantɔ-waralɛ tenbi-bolɔn ladan.

2 Mansɛnu 15:4

Kɔnɔ hali wo, a ma ban Alla-batobɛlɛnuna bɛsi-kɔ-tinɛnu tinyana. Alla-batobɛlɛ wonu tora sarakɛnu bɔla ka isɛnti mintan kan-tina-mayɛlɛnɛ wonu tɔ.

2 Mansɛnu 16:15

A ya a fɔ Saraka-Masɔla Yuraya ye ko, “Sarakɛ minnu bi mintanna sɔgɔma wo, bu-gbɛngbɛnnɛ minnu bi mintanna wurɛ la wo, mabɛ nna mɔgɛnu bi nala saraka-mintantɛ anubɛ bu-gbɛngbɛnni-sarakɛ minnu na wo, anubɛ mɔgɛnu bi nala minni-sarakɛ minnu na wo, i ni to wonu bɔla nna saraka-mintan-tina-kurɛ kɛ kuma yan. I ni to saraka-mintantɛnu anubɛ sarakɛ doinu yele purupurula saraka-mintan-tina-kurɛ kɛ ma yan. Marita saraka-mintan-tina-kɔrɛ wo si ma nna bolo tafɛlɛn tinɛ la.”

2 Mansɛnu 18:22

Tumado, wo ye a fɔla le ma ye ko wo ye lala le wota Mari Alla la, wa? Mansa Hɛsakaya ya kan-tina-mayɛlɛnɛ minnu tinya wonu na, ale Mari bato tinɛ le ma wonu na, wa? Wo kɔma, a ma a fɔ wole Yuda kɛnu ye ko wonu ni to sarakɛnu bɔla saraka-mintan-tina kelan wo rɔ Yerusalɛm, wa?

2 Mansɛnu 21:3

A fa Mansa Hɛsakaya ya Alla-batobɛlɛnuna kɔ tinɛ minnu tinya, Mansa Manasa ya wonu sɔ a kurɛ la tun. A ya bɛsi-kɔ-tina-mayɛlɛnɛnu nadan anu si Beyali kɔ kan min. A ya kɔlɔma lɛsɛ musila muninyɛ rɔ iko Isirɛla Mansa Ehabu ya a ma nya min nun. Bɛsɛ wo tɔgɛ le Asura. Min sanɛ wo kuma, a ya lolenu fanan bato.

2 Mansɛnu 23:14

Mansa Yosaya ya kuru-lɛsɛnɛ wonu takerikeri. Wo kɔma, anuna bɛsɛ min tɔgɛ Asura, a ya wo fanan takeri. Wo kɔma, a ya kan tinɛ wo yamatogon mɔgɔni-gbu-kolenu na.

2 Mansɛnu 23:4

Saraka-Masɔla-Kun-Tigi-Wɛ Helikaya wo, a tatugunnɛnu wo, saraka-masɔlɛ minnu bi Bato-Bɔn bonda-da-makandanna wo, Mansa Yosaya ya a fɔ wonu ye ko, “Beyali kɔ-fannu wo, Asura kɔ-fannu wo, lolenu-bato-fannu wo, wo ni wonu nabɔ Bato-Bɔn kɛ burɔ.” Wonu ban bɛsi-kɔ-miran wonu nabɔla luyi ma, mansɛ ya miran wonu nabɔ soe kɔma ka anu mintan Kidirɔn lɛɛ telen tɔ. A ya a ma, anu tara wonu gbangban la Bɛtɛli soe burɔ.

2 Ko-Kɔrɔta-Karan 19:3

Kɔnɔ hali wo, ko-nyimɛ donu bi i bolo ma bawo mɔgɛnu bi Asura bɛsɛ minnu kɔla nun, i wara wonu tinya. I wara i karan ka Mari sako kɛ.”

2 Ko-Kɔrɔta-Karan 31:1

Ladɛn wo kanɛ a la, Isirɛla mɔgɛ bɛɛ tara Yuda nyamanɛ soenu tɔ ka bɛsi-kɔ-tinɛnu tinya. Kɔlɔma minnu lɛsɛnɛ bɛsi-musila muninyɛ la, anu ya wonu tatɛgɛtɛgɛ. Bɛsi wo tɔgɛ le ko, “Asura.” Kuri-lɛsɛnɛnu fanan, anu ya wonu tatiitii. Anu tara wo le sufa ma Bɛnyamɛ anubɛ Ifɛrɛm anubɛ Manasa bɔnsɔn-mɔgɛnu barɛnu tɔ. Anu ban bɛsɛ wonu tinyana, bɛɛ sɛgira a warɛ.

2 Ko-Kɔrɔta-Karan 33:3

A fa Mansa Hɛsakaya ya Alla-batobɛlɛnuna kɔ tinɛ minnu tinya, ale Mansa Manasa ya wonu sɔ-kurɛ-kɛ tun. A ya saraka-bɔ-tinɛnu nadan anu si Beyali kɔ kan min. A ya kɔlɔma lɛsɛ bɛsi-musi Asurala muninyɛ la. Min sanɛ wo kuma, a ya lolenu fanan bato.

Yaburi 78:58

Anu ya Alla-lɔnbɛlɛnuna bɛsi-kɔ-tinɛnu ma anuna batoli-kɛ-tinɛnu na min kɛ, Mari kɔrɔtɔra anu ma kan-tina-mayɛlɛnɛ wonuna ko la. Anu ya a ma, a diminyara bɛsɛ wonuna ko la.

Bɔ-Koe-Iyipiti 23:24

Wo kana mɔgɛ wonuna bɛsɛnu kɔ. Wo kana wɔlɛ kɛ anuna bɛsɛnu ye. Wo kana sibole wonu kɛ-nya bi, fɔ anu bi anuna kuri minnu kɔla, wo ni anuna bɛsɛ wonu halaki pɔɔ, ka wonu takerikeri.

Bɔ-Koe-Iyipiti 34:13

Yanni wo ni wo ma, wo ni anuna saraka-mintan-tinɛnu tinya. Anu bi kuri minnu kɔla, wo ni wonu takerikeri. Anu bi anuna bɛsɛ min kelela Asura, wo ni wo tinya.

Aiseya 36:7

Tumado wo ye a fɔla le ma ye ko wo ye lala le wota Mari Alla la? Mansa Hɛsakaya ya kan-tina-mayɛlɛnɛ minnu tinya wonu na, ale Mari bato tinɛ le ma wonu na, wa? Wo kɔma, a ma a fɔ wole Yuda kɛnu ye ko wonu ni to sarakɛnu bɔla saraka-mintan-tina kelan wo rɔ Yerusalɛm, wa?

Saraka-Masɔlɛnuta Tɔnnu 26:30

Wo si wola isɛnti mintan wola bɛsɛnu bi kan min, nde si kan tinɛ wonu tinya ka wo furinu nakɛ wola bɛsi-tinyanɛ wonu kuma. Wo wara-koe si gboya n ye.

Tɔn-Fɔɛ-Fila-Nyɔgɛ 5:5

Wo wati rɔ, n sɔnɛ wole anubɛ Mari tɛma ka a kuman-kan latenbi wole ma bawo wo ye kilanna tɛ la, woletɔ wo ma sɔn ka yɛlɛ kɔnkɛ kuma. “Mari ya a fɔ ko

Tɔn-Fɔɛ-Fila-Nyɔgɛ 7:5

Woletɔ wo ni anuna saraka-mintan-tinɛnu wayan ka anu tanyɛnsɛn. Anu bi kuru-lɛsɛnɛ minnu kɔla, wo si wonu tatii. Anuna kɔlɔma minnu muninyanɛ anuna bɛsi-musumɛ la min tɔgɛ Asura, wo ni wonu tɛgɛ ka anu mintan.

Kɛlɛ-Kurugbɛnu 6:25

Suyi wo nyɛrɛ rɔ, Mari ya a fɔ Kidiyɔn ye ko, “Ta i fala san-wɔrɔnfila-turɛ bi. I ni ta a la i fala bɛsɛnu dafɛ. Wo kɔma, i fa ya bɛsi-kɔ-tinɛ min sɔ Beyali ye, i ni wo tinya. Ala kɔlɔma malɛsɛnɛ min tɔgɛ Asura, i ni ta wo fanan tatɛgɛtɛgɛ.

Kɛlɛ-Kurugbɛnu 6:28

Mɔgɛnu ya anu nasɔ min kɛ sɔgɔma subaga, anu ya anuna bɛsi-kɔ-tinɛ tinyanɛ yen. Anu ya tura-mintan-gbɛ taran saraka-mintan-tinɛ wo kuma.