1 Pita 4:7 - ALLALA KUMƐ

⁷ Koe bɛɛ ban-tumɛ ara gbɛrɛn. Wo ni wo nyɛrɛ mara ka wo yɛ lakalan, woletɔ wo si ke ka Alla matara a kilɛ fɛ.

1 Pita 4:7 ပူးပေါင်းရင်းမြစ်များ

Ko-Dabirɛnu 19:35

Dunmusu-dɔgɔmɛ ya a ma a fa la iko a kɔrɔ ya a ma nya min suyi wo fanan tɔ. Lɔti ya a sa wo fanan fɛ kɔnɔ a ma a sa-tuma lɔn, a ma a lasɔ-tuma lɔn.

Ko-Dabirɛnu 6:13

Alla ya a fɔ Nowa ye ko, “Mɔgɛ bɛɛ lato-wati ara ke kamasɔrɔn duninya bɛɛ fanɛ karagbɛlɛyɛ la. N si mɔgɛ bɛɛ halaki duninya rɔ anubɛ fan min bɛɛsi ye dugu-kole kuma.”

Makawandili Kumɛnu 7:2

Yanni mɔgɛ ni ta ladiya-bɔn la, a fisa, a ni ta saya-bɔn la bawo bɛɛ si a miri sayɛ ma nyɔ le, ado bɛɛla ban le sayɛ la.

Yɛrɛmaya 5:31

Nɛbinu sa fenfen fɔla foninyɛ kɔma. Saraka-masɔlɛnu bi anu nyɛrɛta fanka le lawɔlila, ado wole, Mari nyɛrɛta mɔgɛnu diyana-koe le wo la. Kɔnɔ kɛ damasi laban si ma wo bolo nfen na?

Isikiyɛli 7:6

A ara ban. Woletɛ ara ban. Kuma sa wole ma tun.

Matiyu 24:42

“Wo rabɛnnɛ ni to bawo wo ma nde, Mari na-tele lɔn.

Matiyu 25:13

Yisa ko, “Nba, wo ni wo yɛ lakalan bawo wo ma n na-tele anubɛ a wati lɔn.

Luka 21:34

“Wo ni a ma wo fɛrɛma wo nyɛrɛla ko la! Wo kana wo nyɛrɛ ma nugulamɛ anubɛ gbɛɛ-minnɛnu na. Wo kana hɔn niyi-kɛ-koenu na. Ni wo ya wonu ma, tele wo si wo latɛrɛna.

Luka 21:36

Wo ni wo yɛ lakalan ka madiyali kɛ tuma-wo-tuma alako wo ni sɛnbɛ sɔrɔn ka tanka koe kɛ bɛɛ ma minnu si ma. Wo ni sɛnbɛ sɔrɔn alako wo si wo sɔ nde, Hadama-dan yakɔrɔ nya min.”

Luka 22:46

A ya anu manyinika ko, “Wo ye kinɔgɔla nfenna? Wo ni wo lasɔ ka madiyali kɛ ko wo kana don magbɛrɛnkɛ rɔ.”

Romu 12:12

Yigi min bi wo rɔ, wo ni wo mara sewɛ rɔ. Wo ni wo munyu wola tɔrɔyɛnu kɔrɔ ka Alla madiya tumɛ bɛɛ.

1 Kɔrɛnti 15:24

Ala ban si ke worɔ. Duninya-kun-tiginu wo, nyina-kun-tiginu wo, sɛnbɛ-tiginu wo, Kirasiti si sɛnbɛ sɔrɔn anu dama kuma ka mansayɛ dantɛgɛ a Fa Alla ma,

1 Kɔrɛnti 7:29

N na-kelen-nyɔgɛnu, n bi min ma, wo le kɛ la. Wati ma yan tun. Ka a bi bi ma, musu-tiginu ni to iko musu sa minnu bolo.

Ɛfɛsa 6:18

Wo ni to madiyali kɛla tuma-wo-tuma koe bɛɛla ko la iko ata Ni-Sɛnimɛ ye wo labilala nya min. Wo yɛ bɛnnɛ ni to. Wo kana bandan madiyali kɛla Allata mɔgɛnu ye.

Filipai 4:5

Mɔgɛ bɛɛ ni a lɔn ko wo dinyanɛ, ado Mari na-tumɛ ara gbɛrɛn!

Kɔlɔsi 4:2

Wo ni to madiyali kɛla dɛɛ! Wo hɛnkili-lakanɛ ni to baraka-birɛ la madiyalɛ rɔ Alla ye.

2 Timoti 4:5

Kɔnɔ i ni i nyɛrɛ mara koe bɛɛ rɔ ka i munyu nyagbɛ kɔrɔ. I ni kawandi-bɔ-wɔlɛ kɛ ka i se-koe-bɛɛ kɛ Allala wɔlɛ kɛ rɔ.

Taita 2:12

Allata hinɛ wo ye ma karanna ko ma ni ma kan-kɔ sɔ wunduyogoyɛ la anubɛ duninya-natanu. Ma ni ma nyɛrɛ-bira-mɔgɛnu na anubɛ mɔgɔ-telennɛnu.

Hiburunu 10:25

Ma kana fara ma nyɔgɔn nadɛnna. Ma kana ma iko minnu ti ta ladɛn rɔ. Ma ni ma nyɔgɔn makawandi bɛrɛkɛ, ado bawo Mari na tele ara gbɛrɛn, a fisa, ma ni to ladɛn kɛla dɛɛ!

Hiburunu 9:26

Ni wo mara nun, kebi duninya danta tumɛ min, a si tɔrɔ siyaman. Kɔnɔ a wati-kanbalinɛ, Yisa nara iko kelen pe ka dan wo ma ka a nyɛrɛ ma sarakɛ la alako mɔgɛnu hakɛnu ni ban feu!

1 Pita 1:13

Nba, wo ni wo hɛnkili masɔ ka wo sɛbɛ don. Wo ni wo yɛ lakalan ka wo yigi sa Kirasitita duwɛ kuma, ado Kirasiti wa bɔ gbɛ rɔ tumɛ min, a si wo di wo ma feu!

1 Pita 3:7

Keinu fanan, wo ni wo miri wola musinu ma. Wo ni a lɔn ko wota sɛnbɛ kolo anutɛ ko, woletɔ wo ni anu bira a kin na ka anu gbiliya, ado Alla ye duwɛ min kɛla ka habadan-nimayɛ di wo ma, wo dama rakɛn wo sɔrɔn-koe rɔ Alla bolo. Ni wo ya wo ma, fenfen ti wola Alla-matarɛ tinya.

1 Pita 5:8

Wo ni wo yɛ laka, ado wo yɛ lakanɛ ni to dɛɛ! Wo yoge, Setanɛ ye wo manɛgɛnna iko yarɛ min bi borondo-borondola. A ye mɔgɛ nyinina, a si min dɔn.

Lankɛnimayɛ 16:15

Mari ko, “Wo ni wo tole masɔ! N bi nala wo latɛrɛnala iko kankan! Mɔgɔ-sewanɛ le wo tigi la min bi kila a ya la ka ala kurɛ makandan alako a lakolɔn kana na to tagamana miliyɛ bolo!”)