1 Mansɛnu 4:32 - ALLALA KUMƐ

³² A ya hɛnkilimaya-kuma waga sawa (3,000) fɔ. Wo kɔma, a ya bɛti waga kelen ani bɛti loli (1,005) sɛbɛ.

1 Mansɛnu 4:32 ပူးပေါင်းရင်းမြစ်များ

1 Mansɛnu 4:33

A ya kɔlɔmanu bara-koe fɔ ka a dabira a kinama-wɛ ma ha ka a sigi a dɔgɔmɛnu na. Kɔlɔma-kinama-wɛ minnu bi Lɛbanan nyamanɛ rɔ, a kumara wonu bara-koe rɔ. Hali bin-fɛran minnu bi fɛrɛnna dandan ma, a kumara wonu fanan bara-koe rɔ. A sogo wo, a kanbanma-fen wo, a gboloma-fen wo, a yi-kɔrɔ-fen wo, a kumara wonu damasi wara-koe rɔ.

Hɛnkilimaya-Kumɛnu 10:1

Den-hɛnkilimɛ si a ma, a sɔrɔnbagɛnu ni sewa kɔnɔ den-hɛnkilibɔnɛ si a ma, a sɔrɔnbagɛnu yisi ma ni gboya.

Hɛnkilimaya-Kumɛnu 25:1

Mansa Hɛsakaya min siginɛ Yuda nyamanɛ kun na, wola kɛdi-sɛbɛlɛnu ya hɛnkilimaya-kumɛ kɛnu sɛbɛ, Mansa Silamɛni ya minnu fɔ nun.

Makawandili Kumɛnu 12:12

Nna den, a ma i fɛrɛma fanan koe dola ko la. Kɛdi-sɛbɛ ti ban, ado karan-ba-dɛgbɛ si mɔgɛ rabɔ le.

Makawandili Kumɛnu 12:9

Kɔnɔ hɛnkili ye nde, karan-mɔgɔ bolo min kɛ, woletɔ n tora mɔgɛnu karanna. N ya hɛnkilimaya-kumɛnu nakɔrɔsi ka a lɔn ni tonyɛ ye anu tɔ.

Matiyu 13:35

A ya wo ma alako nɛbi ya min fɔ, wo ni kanbali. A ko, “N tenbi kumala anu ye, n si tilinu sa. Kebi duninya danta, Alla ma koe minnu nabɔ gbɛ rɔ fɔlɔ-nun, n si wonu fɔ anu ye.”