1 Mansɛnu 18:26 - ALLALA KUMƐ

²⁶ Anu ya tura kelen bi ka wo faga. Anu ya a soge wo sa sɔgɔ-ladɛnnɛ wo kuma. Ka a bi sɔgɔmɛ ma ha tele latelan, anu bi anuna Beyali wo matarala. Anu bi gbele-gbelenna ka a fɔ ko, “Beyali, ma yabi. Beyali, ma yabi.” Anu ya saraka-mintan-tinɛ min nadan, anu tora anu dɔnna wola foolɛ rɔ. Kɔnɔ anu ma yabilɛ mumɛ yen anu yɛ la.

1 Mansɛnu 18:26 ပူးပေါင်းရင်းမြစ်များ

1 Mansɛnu 18:24

Anu ni anuna Beyali matara. Nde fanan si Mari matara. Kɛ filɛ, ni min ya tɛ layigi saraka-mintan-tinɛ kuma, ma damata Alla le wo la.” Anu dama sewara ka sɔn wo ma.

1 Mansɛnu 18:25

Wo kɔma, Nɛbi Ilaya ya a fɔ Beyalita nɛbinu ye ko, “Bawo wo siya, wo ni kelen bi tura filɛ kɛnu tɔ. Wo ni a ma iko ma ara a fɔ nya min. Wo ni wota bɛsɛ matara kɔnɔ wo kana ta sa de!”

1 Mansɛnu 18:27

Nɛbi Ilaya ya anu mayɛlan dabira tele-latelen-wati wo rɔ. A ya a fɔ anu ma ko, “Wo ni wɔrɔndɔ matarali-kɛ-tinɛ. Tumado Beyali ye a miri tinɛ le. Wo ni wo raya de! Tumado, a ara ta da kɔma. Ni wo ma, a ara a maga. Wo ni a lakunden, tumado, a ye kinɔgɛ le tɔ kɔrɛ.”

Bɔ-Koe-Iyipiti 8:14

Iyipiti kɛnu ya turukɔɔkɔ suyi wonu nadɛn belenna. Wonu tuli sumɛ ratiira anu kun na pu!

Aiseya 37:38

Lunyɛ do, ale Sɛnakaribu ye ala Bɛsi Nisirɔki kɔ tinɛ tumɛ min, ala den fila Adamɛlɛki anubɛ Sarisa tara anu fa wo faga nyɔ. Wonu ya anu buri tala Ararati nyamanɛ rɔ. Ala dan do min tɔgɛ Isahadɔn, wo sigira a gbɛ rɔ.

Aiseya 44:17

Kɔnɔ a si kɔlɔma wo toe ma bɛsɛ la. A si a nyɛnkin wo kɔrɔ ka a kɔ. A si a fɔ wo ye ko, “Nta alla le ile la, i yandi, n nakisi.”

Aiseya 45:20

Mari ko, “Nyamanɛla buiyi kɔmɛ, wole sibolo-gbɛrɛ minnu tora wo niyi la, wo ni wo kundɛn kan-tina-kelen kiti kan ma. Wole minnu bi wo wasila wola bɛsɛnu na wo bolo ka bɛsɛ wonu madiya minnu ti ke wo kisila, hɛnkili-wo-hɛnkili sa wo bolo.

Aiseya 46:7

Anu bi bɛsɛ wo sigila anu kan ma ka ta a la. Anu ba ban a sigila kan-tina-kelan min tɔ, a ti ke a ramagala nyɔ. Mɔgɔ wa a madiya, a ti ke a labirala. A ti mɔgɔ-wo-mɔgɔ kunyɛ bɔ kasarɛ kɔrɔ.

Yɛrɛmaya 10:5

Bɛsɛ wonu mani de dɔrɔn iko sogo-rakilan-fan. Anu ti kuma. Anu ti tagama, fɔ mɔgɛ wa wonu maduni. Wo kana kilan bɛsɛ wonu na. Anu ti mɔgɛ madumɛ, ado anu ti mɔgɛ madɛnbɛ.

Daniyɛli 5:23

Ile wo, ila mɔgɔ-banu wo, ila bara-musinu wo, ila fɛ-sigi-musinu wo, wo ara gbɛɛ min Allata mirannu tɔ minnu bɔra a Bato-Bɔn la. Wo ara a ma, i wara bila Ma Tigi Arinyɛnɛ-Mari la. Wo ye gbɛɛ minyɛ wo kun na, wo ye wola bɛsɛnu kɔla fanan minnu nadannɛ sɛnɛ la, anubɛ wodi-gbɛ, anubɛ silɛɛ. Donu nadannɛ nɛgɛ la, anubɛ kɔlɔma, anubɛ kuri. Nba wo ye bɛsɛ minnu kɔla, wonu ya sa, anu tolo sa, anu hɛnkili mumɛ sa. Kɔnɔ wo niyi ye Allatala min bolo, wo sa wo gbiliyala.

Yona 1:5

Kulun-tawɔli-kɛlɛ wonu kilanta dɔgɔma-ma-de! Bɛɛ donta ata bɛsi-madiyɛ rɔ. Anu donta dunɛnu nabuiyi rɔ kɔgɔ-yi rɔ alako kulɔn ni fɛya. Anu bi kɛ dama rɔ tumɛ min, wo ya a taran, Yona ye kinɔgɔla kulɔn wo kan tinɛ do rɔ a dan na.

Habakuku 2:18

Tɔnɔ-nyamintan ye bɛsɛnu na? Mɔgɛnu denu ya bɛsɛ wonu nadan. Bɛsɛ wonu bi foninyɛ le dɔrɔn fɔla wo ye. Ni bɛsi-tigi ya a yigi sa ala bɛsi-kumabɛlɛ wo rɔ, wo si tɔnɔ-nyamintan di a ma?

Habakuku 2:19

Wole karagbɛlɛnu, wo si wota nondɔn sɔrɔn de serr! Wo ye a fɔla kɔlɔma-kundi ye ko, “Kunden!” Wo ye a fɔla kuru-kundi ye ko, “I lasɔ!” Bɛsɛ kɛnu si a ma, wo ni ko-rayen kɛ, wa? Hali bɛsɛ wo makirinɛ sɛnɛ anubɛ wodi-gbɛ la kɔnɔ a niyi sa a rɔ.

Sɛfanaya 1:9

Minnu si sibolo-gbɛrɛnuta namunyɛ bi bɛsi-kɔ-tinɛ, wonubɛ minnu bi mɔgɔ-fagɛ anubɛ kankanyɛ kun na alako anu ni anu tiginuna bɔnnu nafa, Mari ko a si wonu tɔrɔ.

Matiyu 6:7

“Wo tenbi madiyali kɛla, wo kana sɛgi wo gbɛ ma ka to kuma kelen fɔla ka a fɔ ka a fɔ iko Alla-lɔnbɛlɛnu si a ma nya min. Anu bi anu mirila ko Alla si anu kan lamɔɛn ka a tɛgɛ anuna madiyali-yannu fɛ.

1 Kɔrɛnti 12:2

Yanni wo ni dɛnkɛninya Yisa ma tumɛ min, wo le ya a lɔn ko niyi sa bɛsɛ minnu tɔ, wonu ya wo lasama kila-bɛrɛ ma.

1 Kɔrɛnti 8:4

Woletɔ bɛsɛnu si kɔ soge minnu na, n si min fɔ wonuna ko la, wo le kɛ la. Ma ya a lɔn ko bɛsɛ, fen de wo la niyi sa min tɔ. Ma ya a lɔn fanan ko Alla kelen de!

1 Samuwɛli 5:3

Wo wulun sɔgɔma, so-burɔ-mɔgɛnu nara a taran, anuna bɛsɛ wo ara gbangban a sun ma tɔn-kenkirɛ wo yarɔ. Anu ya anuna bɛsɛ wo lawuli tun ka a sɔ a gbɛ rɔ.