1 Mansɛnu 1:52 - ALLALA KUMƐ

⁵² Silamɛni ko, “Nba, ni a ya a kɛ-nya latelen, n ti ko-wo-ko ma a la worɔ. Kɔnɔ ni a tora a gbɛ da la, n bi a fagala le worɔ serr!”

1 Mansɛnu 1:52 ပူးပေါင်းရင်းမြစ်များ

2 Samuwɛli 14:11

A ya a fɔ mansɛ ye tun ko, “N tigi, i yandi, ita Mari Alla madiya n ye alako n na-kelen-nyɔgɛ min bi nna dan doi tayili-sara-koe rɔ a na-kelen-nyɔgɛ la ka a faga, wo kana bɔnɛ lakoloya ka tenbi a fɔlɔtɛ la.” Mansa Dawuda ya a fɔ a ye ko, “A ye mabɛ Alla tɛma, yanba-gbalɛ ti yalan ila dan wo ma muk!”

1 Mansɛnu 1:51

Anu tara a fɔ Mansa Silamɛni ye ko, “I ma a yen, Adonaya ara kilan i la bawo a ara saraka-bɔ-tinɛ bolɔn filɛ bira. A ye a fɔla ko ile Mansa Silamɛni ni i keli a ye alako ni ile ti a faga.”

1 Mansɛnu 1:53

Mansa Silamɛni ya mɔgɛnu sɔ Marita Fani-Bɔn la Adonaya bi tinɛ. Anu nara a la tumɛ min, a ya a sa dugu ma Mansa Silamɛni kin kɔrɔ ka a madiya. Silamɛni ya a bole sa a kuma ka a fɔ a ye ko, “Ta ila bɔn la.”

Yobu 15:22

Woletɔ yili-latɛgɛ sa karagbɛlɛ bolo ko a si ke a burila, ado faan ye a makɔnɔna kan tinɛ do rɔ ka a faga.

Hɛnkilimaya-Kumɛnu 13:6

Ko-telenni-kɛ si mɔgɔ-latelennɛ kandan kɔnɔ karagbɛlɛyɛ si hakɛ-tigi labui fugbu!

Hɛnkilimaya-Kumɛnu 21:12

Alla min natelennɛ, wo kolan ye karagbɛlɛla bon-burɛ la, ado a si anu kasara pɔ!

Matiyu 10:30

Nba, wole don, hali wo kun-sigi, Alla ya wo bɛɛ yatɛ lɔn.

Luka 21:18

kɔnɔ hali wo, wo kun-sigi kelen bɛrɛn ti to-a-rɔ.

Kɛwɔlɛnu 27:34

Woletɔ n bi wo madiyala, wo yandi, wo ni fen dɔn. Wo makoe ye wo la wo niyila ko la. Ni wo ya fen dɔn, wo fenfen ti to-a-rɔ.”

1 Samuwɛli 14:45

Kɔnɔ kɛlɛ-dannu ya a fɔ Mansa Sɔli ye ko, “A kin Yonatan kɛ ni faga min bara male Isirɛla kunka, wa? Ade! Wo fɛ yan! Ma ara ma keli Mari la, hali Yonatan kɛ kun-sigi kelan ti wurun. Yonatan kɛ ya koe min ma male Isirɛla mɔgɛnu ye bi, a ya wo ma le bawo Alla le ya a dɛnbɛ.” Anu ya Yonatan latanka sayɛ ma.